1 SAMUELI 25

Ufu lwa Samweli

1Nkisuku Samweli kafwa, na Israeli woose vakakuumbya ando amwi, vakamuiya, vakandika kyeny kwakwe kulya Rama.

David na Abikaili

2Nalyo Davidi kandesoka na kulya kasa ka Maoni. Nafo kweefo nndu eetiri masaa kulya Karmeli. Nndu yeu kava nsuri deny, nawe mmbo eetiri moonri fiku firara na mburu kiku. Nawe mmbo eesemaa moonri mafwaa yoo Karmeli. 3Nndu eto evangwaa Nabali, na nka wakwe ni Abikaili. Nkaakwe mmbo eetiri urango nnu kasenya miso, lyo mmi wakwe kava nndu nrung'ani, mwiitana meesi, nawe ekee wa ufyari lwa Kalebi. 4Naasa llya Davidi ekee kulya kasa kaita sheelyi Nabali mmbo akeesema moonri mafwaa. 5Nawe Davidi kanrumya vasoro ikumi, kavavia, “Enden kulya Karmeli kwa Nabali munrwaaye fiidikiro fyakwa.” 6Mukamfika-fo mumbye indi, “Ufoo lukae na yewe, na efo kyeny kwafo, nalo lukae na vandu vafo woose.” 7Na yeny mmbo shileeta sheelyi kutiri vandu vakeesema moori afo mafwaaa. Veesi vafo mmbo vekee neese, nta lulavatanyi ukasha, nta mmbaletura kindo llya vekee efo, Karmeli-fo. 8Vavese mbony eto nawo vakoongoyaa fyoose. Naasany warya vasoro yeva, kimmba lwasha nkonu wa pule. Mmbo shakutereva kuvaniinge kindo kyoose ekyo kukooyaa kwiitiri, wo vakee sha mashinga afo na yeny Davidi shikee nsero wafo. 9Naasa vasero valya vekifika kwa Nabali, vakaamba na marero yoo moose Davidi alevaruma, vakamaa, vakamalallya. 10Naasa Nabali kavia vasoro yewo na Davidi, “A Davidi ni vi? A mwana wa Yese mmbwe vi? Fyeeri efi mashinga mengi mmbo akeerisha kwa vandumi vawo. 11A yeny mmbo shiniingyaa nkate wakwa, na mura, na findo efyo shanshishya vandu vakwa yewo vakeesema moonri akwa mafwaa, shiniingye vandu shilaishi nta kundo vafuma nafo?” 12Naasa vasoro valya va Davidi vakainduka vakeenda, vakasheruuya Nndumi Iruva waawo marero yoo moose. 13Naasa Davidi kavia vandu vakwe, “Nkye nndeny, wo nndu na usu lwakwe, Davidi nawe keepoo usu lwakwe, vakasora Davidi.” Nawo vekee vandu mayana aana: vandu mayana avii wo vakarewa veringaa kyeny.

14Lyo nsoro umwi kandevia Abikaili mbony tilya, kaamba, “Davidi mmbo aleruma vandu wooka kulya kasa naambo vasheidikira mmi wafo, lyo we kavainyala.” 15Nawo ni vandu valelutanya mesha nnu, nta llulelollya ukasha loose ao ireta nta kindo-fo kyeeri ekyo kyoose lwekee nawo. 16Vandu yeva mmbo vekee varingi veru kio na nsanyiny kyeeri kyoose lwekeyiisa moonri. 17Ulaalu manyany kukusare kyeetana, “Mashika mmbo kyanrerwa kikasha nnu kya Nndumi Iruva weeru na mmba yakwe shoose, kimmba akee nndu nalavaa, nta kilamaa nndu narere nawe.” 18Abikaili kaangusya yiipoo mikate mayana avii, na mboloko ivii ta mfinyo, na suva shishishe isaanu, na bakuri isaanu ta piisi, na fivale iyana fya ndunda ta nsabibu, na mikate ya ndunda mayana avii, karika mishungu. 19Kookafo kavia vasoro vakwe, “Nkye ndifony, shiifo nshaa. Lyo nnyalevia mmi wakwe Nabali-fo.” 20Elyi eefo asaamyi nshungu wakwe eshoolokaa ando a kisambalo, kalollya Davidi nawe eshoolokaa ariani na vandu vakwe, kavakooya. 21Nawe Davidi mmbo emmaamba, “Naasa mmbo kileva kya ruu parany elyi shileringya nndu yeu masaa akwe moose, kilareke nta kindo kimwi kyakwe.’ We ulaalu mmbo ashitaa na makasha ando a mesha. 22Iruva nashitanyi sha vakiduva vakwa, kwakooya elyi kwiikyaa efo kwakwe kusherewaau nta kimwana kya kyuumi.

23Abikaili ekilollya Davidi kaangusya uviny yooloka nshunguny, kawa kifulufulu yoo mbee yakwe. 24Kawa yoo marendeny akwe, kaamba, “Woi Nndumi Iruva wakwa uravi yelu llwakwa yeny shimuni, uravi yelu lushiwoye yeny, woi mmbee aranya kishinga kyafo kiireraa neewe.” 25Shakutereva woi Nndumi Iruva wakwa, kulalole mbony ta nndu yeu wa tangalu Nabali-fo, Shamashika shaasa irina lyakwe lyikai niindo nawe akai. Ni urung'ani. Lyo yeny kishinga kyafo nshilelollya vasero yewo Nndumi Iruva wakwa kulevaruma-fo. 26Naasany woi Nndumi Iruva wakwa na irina lya Nndumi Iruva na irina lyafo, kimmba Nndumi Iruva ankwiima kulashepuswa samu nta kulakitaiye kiduva, naasany ulaalu vakiduva vafo neewo vakukundye makasha vavake Nabali ulaalu. 27Na findo efi fya pya sheengye Nndumi Iruva wakwa nafiwarye maakony a kishinga kyakwe naniingye vasero vakwe variani nawe. 28Mmbo shakutereva kusarye ukasha lwa kishinga kyafo, mashika shiishi deny nkuti Nndumi Iruva navangise mmba ya Nndumi Iruva wakwa, mashika elyi ava mwiikapana fira na Nndumi Iruva, nalo uravi llushelollyoo kwafo nta kyeeri kimwi-fo. 29Naakwa nndu wa vandu aamba ni ikureiya nakuwae, Nndumi Iruva mmbo ashenringaa, we Iruva wafo, na vakiduva vafo vashefwallyo kwaasha. 30Na elyi Nndumi Iruva asheinutyaa efyo fyoose avikye Nndumi Iruva wakwa kyaasa, neekusaleesa kushillye Israeli, 31eki nkisheendee nsindara nta isukya Nndumi Iruva wakwafo, kimmba nalandepuswe samu ya nndu kikee kya ruu, ao nta itaiya kiduva kwa yewo vansuuye-fo, “Neelyi Nndumi Iruva, iruva asheinutyaa mesha yoo kwafo llyo kushikummbwe na yeny kishinga kyafo.”

32Na Davidi kavia Abikaili, “Nndumi Iruva, Iruva wa Israeli navikkywa mbora, yeto akuruma nkonu yeu kukwaanannye neeny! 33Lyivikywa mbora ikusaro lyafo na kuvikkywa mbora yewe kweedima ishipaaya inu shilapusswe samu na itayya kiduva na woko lwakwa shimuni. 34Mashika dede ya Nndumi Iruva, Iruva wa Israeli, yeto ashiima shilakuwaa, kukooye kulore kwaangusya ishisheya, Nabali yeu nnyereeyoou nta mwana n-du wa kyuumi kufike ngama-fo. 35Nalyo Davidi kawarya findo filya fya pya maakony a Abikaili, kammbia, “Naasa kuwuiyeny na ufoo kweende kyeny.” Shankwiirikya yewe neefyo kwashivia. 36Naasa Abikaili kashekooya mmi wakwe Nabali, ammbika sukukuu niini ya kimangyi, kakyesa nnu mashika ennangwa, mmbwari. Nkyo Abigaili nnyalemmbia nta kindo kimwifo, fika elyilya ndesi. 37Nalyo elyi lya ndesi kyeeri wari wammaa isya nrony, nkaakwe kammbia fyoose shaasa kyava, nawe kaawukwa kava sha iwe. 38Kwiikisia mikonu ikumi, Nndumi Iruva kakapa Nabali, kafwa. 39Davidi eekita Nabali amfwa, kaamba, Nndumi Iruva naarafumwa yeu alekaa kyaalu kyakwa kya efyo Nabali aleshitannya, nawe kashiima yeny ishinga lyakwe shilashelyamara. Nawe Nndumi Iruva kaviirya Nabali uravi lwakwe muni. Nawe Davidi karuma vandu vandeende Abikaili nave nka wakwe. 40Nawo vandu va Davidi vekisha kwa Abikaili kulya karmeli, vakammbia, “Davidi mmbo aluvia lushekwiipoo kundeva nka wakwe.” 41Nawe kawa si kifulufulu kaamba, “Lola kishinga kyafo mmbo kikee ishinga lyeesangya vasero vafo marende.” 42Nalyo Abikaili kaangusya, kasaama nshungu aryani na fishinga firaanu fyeemwiimya, kasora varumi yewo va Davidi kandeva nka wakwe. 43Nawe Davidi ammoora Ahinoamu wa Yezreeli ulaalu katira na Abikaili kava nka wakwe. 44Nalyo kyeeri Sauli emmuninga mfu wakwe Mikali ulya aleniingwa Palti wa Laishi nndu wa Galimu.

Currently Selected:

1 SAMUELI 25: MAS2

Highlight

Compare

Copy