1 VAMANGYI 8

Isanduku lya Kyaasa Lyeendwa Mmba ya Iterevya

(2 Fye 5:2–6:21)

1Nawe Mangyi Solomoni kandevaanga vandu va uruka loose lwa Israeli vandefika Yerusalemu. Naambo vandeondwa Isanduku lya kyaasa lyuka Sioni, kulya muriny wa Davidi vandelyivika kulya mmba ya Iruva. 2Kwikee ni suku-kuu mwiiri wa Ethanimu, vandu woose vakashekuumbya mbee ya mangyi Solomoni. 3Naasa vasongoru va uruka vekimaa isha, Vakohani vakakamara Isanduku lya kyaasa. 4Vakandelyivika kulya mmba ya Iruva. Yeema ando amwi na findo fingyi fyoose fyekee amwi nalyo 5Mangyi Solomoni ando amwi na vandu woose va Israeli, vakakwaanannya vakandeutya kiraso kyeekora, kya moonri na ng'umbe tilava yeekyena. 6Nalyo Vakohani vakandevika Isanduku lya Kyaasa efo mmba ya Iruva, alya ando kweele; kwasi ya mafisi alya atiri maaru. 7Maaru a mafisi yoo akaidima isikya Isanduku llya ando amwi na ngo tilya teekurikye Isanduku. 8Ngo eto nndu moose ashiidimaa itilollya asalalyi usumanu na alya ando kweele ya kweele. (Ngo eto fika nkonu wa inu mmbo tiiyo). 9Efo Isandukuny ekyo lya kyaasa kweifo kindo kingyi kuuta mapoo alya avii a mawe Mose eningyo ni Iruva kulya ifumbuu lya Sinai. Kyeeri kilya vana va Israeli vekeyuutwa kulya ushingeny Misri-fo. 10Kyeeri vakohani veifo vasomuka kulya mmba ya Iruva, ramu-ramu ifishi lyikamika lyikaishwa efo mmba. 11Nawo valaidimi itana kindo kyeendwa ni sa ilya ya ifishi. 12Naasa Solomon katereva indi, “Ni yewe Nndumi Iruva kuvikye nkyeere efo nginii-u, indi kwasauwa ikaa efo mafishiny na efo ireeminy 13Ulaalu shankutanya mmba yafo ando kwafo kwekaa llung'anu.”

Solomon Arera na Vandu

(2 Fye 6:3-11)

14Ndesa vandu veselelyi alya, Mangyi Solomoni, kavalola, katereva Iruva naambo navavikye mbora. 15Kaamba, “Arafuma Nndumi Iruva wa Israeli! Ammiindya kyaaasa kilya alevikya ndeye-akwa Davidi kyeeamba; 16Ukya llya shileuta vandu vakwa urukeny lwa Misri, nshilesauwe muri moose kunu urukeny lwa Israeli, kuve ando kwaindetannya mmba ya iindya-fo. Indi shankusauwa yewe Davidi kushillye vandu vakwa.” 17Nawe Solomoni kaamba, “Ndeye akwa Davidi enkudeesya itana mmba ando kweindya Nndumi Iruva wa Israeli; 18Indi Nndumi Iruva kammbia, ‘Makusaro afo ni mesha a ikunda ishitannya mmba. 19Indi nshi yewe kutanaa mmba eyo-fo. Ni mwana wafo, mwana wafo kumuni mmbwe yeto asheshitannya mmba yakwa.’

20“Ulaalu Nndumi Iruva ammiindya kyaasa kyakwe; na yeny mmbwe shikee mangyi ya Israeli ando a ndeye-akwa, shammiidima na itana mmba ando kweiindya Nndumi Iruva wa Israeli. 21Shaidima isongosya ando kwaivika Isanduku lya Kyaasa efo mmba eyo, Isanduku elyo lyitiri mapoo a mawe alya Nndumi Iruva eniingya vakuu veru kyeeri kilya ewoota kulya Misri.”

Kiterewo kya Solomon

(2 Fye 6:12-42)

22Naasa mbee ya vandu Solomon keenda kandesalala alya ando kwerasya, kaipoo maako akwe na uwe 23katereva kaamba, “Nndumi Iruva wa Israeli, llutiri Iruva sha yewe efo iruveeu nta urukeny kwasi ya ngina-fo! Kulevikyana kyaasa na vandu vafo kwavaora ikunda lyafo kyeeri vatira mavavaso afo na ikunda. 24Kyaasa kilya kuledeerya ndeye-akwa Davidi kwakiindya; na findo fyoose fikavevutikashaasa kulaamba. 25Ulaalu, Nndumi Iruva wa Israeli, Shakutereva naambo kwiidimi-se yiindya naakwa nkyaasa kilya kwenreeya ndeye-akwa sheelyi kunu kwakwe mfo kundo umangyi lushokaa llung'anu kyeeri kyoose kwakooya vashekwiindyaa ndesa kikwaani. 26Woi Iruva wa Israeli, luniingeny findo fyoose five dede yafo ndesa kulemaa ivikyana kyaasa na ndeye-akwa Davidi we ishinga lyafo.

27“Ni dede Iruva kushiidima yaang'anya kunu ulaniny? A kwakooya naakwa ni efo iruveeu kulakeeyang'anya-fo, mmbo kishiidimika inda kuidimi yang'anya kunu mmba yei shilekutannya? 28Nndumi Iruva wakwa, Yeny shikee ishinga lyafo mmbo shakutereva kwaarannyi kiterewo kyakwa ekyo shiifo shikutereva nkonu yeu wa inu. 29Lola mmba yei kuiringe kio na nsanyiny ando kwa itereva kulesauwa yewe kumuni. 30Arannya fiterewo fyakwa na fya vandu vafo elyi veefo vashaa na yaandi ikutereva kwikee yefo iruveeu, kulwaarannyi na ilufwaaya.

31“Kyeeri vandu vafingyo mwaandu kyeendwa ni mitannyi yaawo. 32Woi Nndumi Iruva kuvaarannyi na ivasarya. Kuutye uvingo yewo veesi na ifwaaya valya vatannyi ulyamari. 33Kyeeri vandu vafo Israeli vakapoo ni vakiduva vawo. Kyeendwa ni elyi vakulyamarya yewe, vakamanya na ikwaalukya yewe na fiterewo vakunyiisye, 34Woi Nndumi Iruva wa iruveeu vaarannyi na ivafwaaya kundevaviirya uruka elo kuniingye vakuu vawo. 35Kyeeri vandu vatura mmbwa kyeendwa ni ulyamari valekutannya, vakamanya na ikwaalukya yewe na fiterewo vakunyiisye, 36woi Nndumi Iruva kuvaarannyi na isarya mangyi na vandu woose va Israeli. Kuvaloshe vaidiimi itana fya usumanu. Na kyingyi woi Nndumi Iruva, kurike mmbwa efo urukeny lwafo, elo kuvaniingye kulaefo nndu ashiidimaa ivasoka.

37“Kyeeri shaa yasha urukeny, ao ndwari shikasha, ao mwaaka vareta mmbwa na vandu ivoywa ni (nrenga ya fira) vakiduva, ao vandu iwoywa ni saka na ilwaayo, 38Kwaarannye fiterewo fyawo kwakooya vandu vafo Israeli vakunnyiisa na yoorwa maako awo usumanu na mmba yafo ya iterevya. 39Ita fiterewo fyawo kuvaarannyi efo kyeny kwafo iruveeu, kuvasarye na ivaekya. Ni yewe kumuni kwiishi mirima ya vandu na makusaro awo. Utya wo nndu ndesa kikwaani nawe. 40Naasa vandu vafo vaidimi ikuindya kyeeri kyoose vasindi yaa urukeny elu kuniingye vakuu veru.

41“Kyeeri nndu wa uruka lwa kwaasha ashiita mashora yoo maniini kutannyi vandu vafo, 42nawe kakunda isha kunu mmba yafo ya iterevya, 43kumwaarannyi kiterewo kyakwe. Efo kyeny kwafo iruveeu, kumwiite na indentannya ekyo akutereva; na inkunda kimwi sha vandu vafo Israeli. Nawo vamanyi sheelyi Mmba yei shiletana ni ando kwa yiindya Iruva. 44Kyeeri kwaruma vandu vafo indekapana na vakiduva vawo, wo ando vakai vakakutereva veindutye kisangu kyawo na kunu muriny yeu kulevasauya, na mmba yei shilekutannya, 45arannya fiterewo fyawo. Ita vandu vafo efo Iruveeu na ivaidimisya ivinga. 46Kyeeri vandu vafo vakulyamarya woose piny, na kimaruma kya irooywa nngoo kwavalekeya vakakapwa na ikurikwa mifungwa mbakiduva vakadefingywa urukeny kungyi; nakwaa uruka llwa lukee kwaasha, 47arannya fiterewo fya vandu vafo. Kwakooya kulya urukeny llwa, valollya ulyamari lwawo vakakurya na ikutereva usari kya efyo valekulyamarya, vaarannyi fiterewo fyawo woi Nndumi Iruva. 48Kwakooya ni kya dede vakarya efo urukeny elo, vakaalashika na ikutereva veindutye fisangu fyao na efo urukeny elo kuniingye, vakuu veru, kunu muriny yeu kuleusauwa kumuni, na kunu mmba yei yafo yeeterevya shilekutannya, 49nasaany varannye kiterewo kyawo, efo kyeny kwafo iruveeu, aranya vandu vafo kuvalillye. 50Vafwaaye ngyulyamari tawo toose, na makasha moose valenkutannya, na ifweerisa vakiduva vawo woose. 51Ni vandu vafo yewe kumuni kulewoondwa kulya Misri na sina.

52“Kwaarannye woi Nndumi Iruva, na ilillya vandu vafo Israeli na mangyi yaawo, kwiite fiterewo fyawo kyeeri veefo vatareva ngarami yuuka kwafo. 53Ni Yewe kuvasauye efo nnang'ani ya vandu kwavaallwa vandu vafo, shaasa kwevavya na kana ka Mose kyeeri kilya kweuta vakuu veru kulya Misri.”

Kiterwo kya Ifurumya

54Solomon ekimaa kiterewo kyakwe kwa Nndumi Iruva mmbo alesalala shumu mbee ya ando alya kweterevya alya ando eefirye ndi na maako akwe eorotye na uwe. 55Na unyanga waasha katereva Iruva naambo aidimi ivikya vandu woose mbora valya vekuumbye-u, Kaamba, 56“Rumisheny Nndumi Iruva yeu aleniinga vandu woose ufoo, ndesa we muni alevika kyaasa. Mmbo aleindya fyaasa fyakwe fyoose filya ammiivya ishinga lyakwe Mose. 57Nndumi Iruva weeru akee na yese ndesa alekaa na vakuu veru, nalashelurekywa nta ilureeya kwasha. 58Alwiidimisye imwiindya we muni, naambo lwiidimi itana shaasa we akunndye na iindya mavavaso alya aleniinga vakuu veru. 59Woi Nndumi Iruva weeru kukummbwe fyeeri fyoose fiterewo na fyeerero fyeru. Kyeeri kyoose kuvalilye mashoya vana vafo Israeli amwi na mangyi yaawo. 60Llyo na masanga a ulana loose vashemayaa sheelyi yewe Nndumi Iruva mmbwe Iruva kulaifo ungyi. 61Na yeni, vandu vakwe, muve varilalyi kwa Nndumi Iruva weeru, muveyiindya wikimbi na mavavaso akwe moose.”

Isamya Mmba ya Iterevya

(2 Fye 7:4-10)

62Nawe Mangyi Solomoni na vandu vakwe woose vakaniingya Ndumi Iruva kiraso, 63Mangyi kashisha ng'umbe 22, 000 na moonri 120, 000 kyikava kiraso kyawo vaniingya. Nalyo mangyi na vandu vakwe woose vakasamya mmba ya Iruva. 64Na nkonu yeto muni-da mangyi kasamya kyenga kya nnang'ani kya kari, alya mbee ya mmba ya Iruva kaniingya fimu na firaso fya ikora fya mafura. Kutani indo kimaruma kya inyiiyo ni mwaanya alya ando kwa iniingya firaso fyoose. 65Solomoni kavika ifura iniini ando amwi na vandu vakwe Israeli alya mmba ya Iruva, ando a mikonu mfungare. Vakakuumbya vandu veengyi wooka Hamati na Vafiitani na mura wa Misri. 66Kufike nkonu wa nyanya, Solomoni kasama vandu vakeenda kyeny. Veefurye kimaruma kya mbora aleniinga Davidi ishinga lyakwe ando amwi na vandu vakwe Israeli.

Currently Selected:

1 VAMANGYI 8: MAS2

Highlight

Compare

Copy