1 VAMANGYI 10
10
Isheywa ni Malkia wa Sheba
(2 Fye 9:1-12)
1Malkia wa Sheba ekiita mbony ta mangyi Solomoni na filya alerera kya irina lya Nndumi Iruva, kasha immbesa mbony kwi fyaaso. 2Kaanga Yerusalemu aryani na Varundi vake, amwi na ngamula erye mafura afwaama nisha, na saabu shiingi nnu, na finfo fiingi fya wuuru uniini, ekilolya Solomoni karera nawe findo fyoose fyekee efo nriminy wakwe. 3Nawe Solomoni kanrambuya wo kindo ndesa alemmbesa nta nalasarise-fo kindo nrimin mmbwakwe kulore alembia. 4Nawe Malkia wa Sheba ndesa alelollya urililalyi lwa Solomoni na mmba ilya aleitana, 5na shoonga yekee meseny yakwe fyeelya na fyeena, na mashinga akwe na soori tawo, na shia yeyo ashiraa nafike efo mmba ya Nndumi Iruva, kaukwa mmuu kauma muungaya. 6Kavia mangyi; Ni dede eti nto mbony tilya shileitya ukya kulya urukeny lwakwa kya mbony tafo na urilalyi lwafo. 7Indi yeny nshileirikya kya mbony eto valeshivia-fo, kutani elyi shafika na ilollya na miso akwa shimuni, nta nshilevyo kyenga kya findo efi shallolya na miso akwa-fo, yewe mmbo kwiilannyi urilalyi na ivesyo mmwasi ya mbony tilya shileeta. 8Ngoma vandu vafo, ngoma mashinga yaa afo asalala mbee yafo wo nkonu eshaarannya urilalyi lwafo. 9Nndumi Iruva narumishwa, Iruva eto alesennywa, naambo nakuvike kiriny kya ushilyi kya Israeli kimaruma elyi Nndumi Iruva akundye Israeli llung'anu, kakwaallwa kuve mangyi ya isalallya usumanu na uvingo. 10Naasa kaniinga mangyi talanta ta saabu iyana na makumi avii; na mafura afwaamaa nisha meengyi nnu, nnu, na masaa meengi a wuuru uniini; nta mfindelollyo findo fifye yendi sha efyi Malkia wa Sheba aleniinga mangyi Solomoni-fo. 11Nalyo tikasha-se merikebu ta Hiramu tikurikye saabu uka Ofiri, miri ya msandali ikeendwa yuuka Ofiri miingi nnu sanda na masaa a wuuru uniini. 12Mangyi kaseelesa ngo ta mmba ya msaandali ta mmba ya Nndumi Iruva, na ta mmba ya mangyi, fya na vimbi na vinanda, fya veembi yewo, kufike inu nkuleendwa nta ilollyo msandali ingi sha eyo-fo. 13Nawe mangyi Solomoni kaniinga Malkia wa Sheba findo na masaamengyi. Ekimaa iwarya masaa yoo kakwipoo ando amwi na varundi vakwe kawuya urukeny lwakwe.
Umasi lwa Mangyi Solomon
(2 Fye 9:13-28)
14Wo mwaaka Solomoni mmbo eekyeeirikyo kilo fiku makumi avii na fivii fya saabu. 15Kilya kya mmwasi kilesha-fo kyikava ni mbusha ya valya vekapa mbusha, sanda na vamangyi na vashilyi va uruka. 16Mangyi Solomoni kasongosya ngao mayana avii ta saabu, shisangye; Wo ngao imwi yetiri kilo mfungare ta saabu. 17Na ngao mayana araru ta saabu, ikee shiilyise, na wo ngao imwi ikavikwa mane isaru ta saabu. Mangyi kavika efo mmbeny ya miriny ya Lebanoni. 18Lyingyi mangyi kasongosya kiri kya ushilyi kiniini kya mbembe, kakisikya na saabu ikee shiilyise nisha. 19Kiri ekyo kikatira fiteere firindaru numa ya vayo kyikava kya kiringitya, na maako taari toose ando kwekaa rembo, na miiso ivii tiselelyi mbai ya maako yoo. 20Na miiso ikumi na ivii tikasalala kulya titereny filya firindaru imwi kunu na ingyi kunu; kyekee ni kiri kilandelollyo kingyi efo umangyi lwawo. 21Na fia fyoose fya mangyi Solomoni fya iniiya na fyeelyiiya fyekee saabu sheni, na fia fyoose fya mmba fya miri ya Lebanoni fyekee fya saabu ikeshisangye; nkweifo fia fya fesa-fo mashika efyo mmbo fyekee findo fya tangalu kyeeri kya mangyi Solomoni. 22Kimmba mangyi etiri meli shiingyi ta kulya Tarshishi na Hiram tikavaan timweengye saabu, fesa, mbembe, na mafwe na tausi lyimwi wo myaaka iraru. 23Naasa mangyi Solomoni kawa isimba na itira urango usha kairya vamangyi woose ulaniny. 24Ulana loose mmbo lukeeruya ikwaanannya na mangyi Solomoni, naambo vaidimi imwaaranya ni elyi akee nndu niinge urango usha ni Iruva. 25Wo nndu kamweengye findo fyakwe fya pya, fya fesa, na saabu, na soori, na fisha, na mafura afwaamaa, nafrasi, na nyumbu vakatana indo wo mwaaka. 26Solomoni kasangirya mitika na vesaama frasi, nawe etiri mitika kyiku na mayana aana, na vesaama frasi fiku ikumi na fivii, nawo evavikye efo miriny ya mitika kulya Yerusalemu ando amwi na mangyi. 27Mangyi kaallwa fesa tikawa sha mawe kulya Yerusalemu, na mieresi ikava miingyi sha mikuu ike kulya Shefela. 28Frasi tilya mangyi Solomoni etiri tikeendwa tuuka kulya Misri, tikaniingyo vekapa mbusha va mangyi, kwa makamba na wo ikambana wuuru lwavyo. 29Ikari lyeshiidima yuurwa lyuka Misri kwa Shekeli mayana arindaru ta fesa, na frasi kwa iyana na makumi araru; ni indo valetannya vamangyi woose va Vahiti na Vashamu vakaveengye mitika na frasi.
Currently Selected:
1 VAMANGYI 10: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
