Varome 14

Kulautye vengyi uvingo

1Yeto akee mfwafwa wa kikusiryo mmbwaryeny kwany, lyo mulamuutye uvingo-fo. 2Nndu wa kikusiryo mmbo akulyiiya shoonga toose, lyo yeto mfwafwa kikusiryony mmbo alya nyany sheni. 3Mwiilya shoonga toose nalamini yeto ara nalalya-fo, mashika woose mmba Iruva. 4A yewe ni vi ndesa kutani kwautya ungyi uvingo? Ni nndumi yeto wakwe muni amwiirikyaa ao nallemi. Ni yoo kwa nndumi yeto wakwe kweni asalalaa ao nawe. 5Nndu ungyi mmbo alollya mikonu myoose nshi kimwi-fo, na ungyi kalollya mikonu myoose nkimwi nsi. Nshaasa wo nndu alollya we muni. 6Yeto alollya nkonu mmbee ntorya mmwasi, ni Nndumi amwiidimisya indo, neeto mwiilya shoonga ni Nndumi da ansimba indo. Na lyingyi-se yeto ara nalalya kindo kive, ni efo kwa Nndumi avekai, kavemwaana. 7Mashika nkwiifo nta nndu umwi aidima ikaau na muu we muni-fo, nta yeto mwiifwa nnyafwa kyuuka nawe muni-fo. 8Mashika kwakooya lwiiyo na muu mmbo lweekyo ni Nndumi, na lukafwa mmbo lwafwa lukee na Nndumi. Kyasiany lukakaa na muu ao lukafwa mmbo lukee va Nndumi. 9Ekyo nkyo kileengye Kristo kafwa numa kawuya iruka naambo nashillye yewo vakee na muu kiwo neewo vafiiye.

10A nkyiki elyi kwautya mwanamau uvingo? Ao kwammina? Lyo lumanyi sheelyi yese loose mmbo lushesalalaa mbee ya kitima kya ushilyi kya Iruva. 11Kimmba kikee kireiye indi,

Yeny Nndumi shiiyo, woose mmbo vasheshifiiryaa ndi.

Na vandu woose vasheshaambaa paa.

12Niindo kikai, wo umwi weeru mmbo asheutaa yeekena lyakwe muni yoo mbee ya Iruva.

Yeengye vengyi misindara

13Naasany lulakiengere ikurera kikasha-fo, kyeendi ng'waana lurummbwe indi, kulave nndu avika kindo kyeengye mwanamaye nsindara ao kyentuula. 14Shiishi deny nesununndywa nnu na irina lya Nndumi Yesu, sheelyi nkwiifo kindo kikee kitefusu uka efo kiparikye-fo. Kyaindi yeto muni alollya kindo nkitefusu, kwakwe we muni mmbo kivaa kitefusu. 15Na nndu wafo kwakooya asherovywaa nriminy kyeendwa nshoonga, yewe mmbo kwamaangwa efo ikundeny lyafo. Kyeendwa nshoonga yafo kulasherovya nndu ulya Kristo alefwa kimaruma kyakwe. 16Naasany, mikaaye yaany misha ilashesendwa na ukasha-fo. 17Mashika umangyi lwa Iruva nshi ilya na ina-fo, ni usumanu, ufoo na ifura nnang'ani ya Mumuyo Mweele. 18Mashika yeto arundya Kristo nisha efo findony efyo mmbo asennya Iruva, naakwa ni vandu vakamwirikya. 19Naasa kwakooya niindo, lusore ngata ya ufoo na yeyo yekaarisana. 20Lola kulashelyamara ishora lya Iruva kweengywa nshoonga. Yee, fyoose mfisha; kyaindi nkikasha kwakooya nndu alya shoonga keengye vengyi nsindara. 21Nkyeni deny shire shilalya nyama ao ina wari ao itana kindo kingyi kyoose kwakooya nndu ungyi asheutaa-u nsindara. 22Kikusiryo kilya kukee nakyo kitire kwikee na Iruva. Ngoma nndu yeto nalalollyaa nyinyira we muni kya findo filya we muni afiirikye. 23Lyo mwiilya na nyinyira, mmbo ambutywa uvingo kyeamba anrenga, mashika elyi alya nalatiri iirikyo. Na wo kindo nndu atana kilaryani na kikusiryo ni ulyamari.

Currently Selected:

Varome 14: MASNT00

Highlight

Copy