Usukuyony 5
5
Kitabu na Ngurana ya Iruva
1Naasa shalollya efo wokony usha lwa yeto akee rembo uwe ya kitima kilya kya itumbe kitabu kyikee kireiye mmba na efo kwa numa, kyikee kikape muuri mfungare. 2Shalollya nsu atiri finya deny, evambisaa irero na unyanga uniini nnu, eshambaa, “Ni vi yeto asumani itarambwa kitabu ekyo na ifisha muuri eyo ya vayo?” 3Nta nkulakaa-fo nndu iruveu, nta kunu ulaniny, nta efo si ya vayo, aleidima irua kitabu ekyo-fo, nta ikilla-fo. 4Na yeny shafua nnu elyi kulewiika nndu asumani irua kitabu ekyo nta ikilla. 5Naasa umwi wa vamiku valya kashivia, kulafwe-fo, lola-te, kwiifo Miiso ya ufyari lwa Yuda, wa Isindeny lya Davidi, we mmbo alevinga kutani aidima irua kitabu kilya, na muuri ya vayo mfungare. 6Shalollya yoo nnang'ani ya kitima kilya kya itumbe na valya vatiri muu vaana, na yoo nnang'ani ya vamiku valya, Ngurana ya Iruva esalalyi-u, akee sheelyi akee nshishe, atiri mbembe mfungare na miso mfungare na yeto nto Mimuyo mfungare ya Iruva yeyo ilerumwa ulaniny koose. 7Kasha, keepoo kitabu kilya na woko lwakwe usha, mmbwe yeto akee rembo yoo kitiminy kilya kya itumbe. 8Kyeeri aleipoo kitabu kilya, valya vatiri muu vaana na vamiku valya makumi avii na vaana vakawa si yoo mbee ya Ngurana ya Iruva, wo umwi waawo etiri kivale, na fipete fya saabu fiishwe mafura afwaamaa, nafyo mfyo fiterewo fya veele. 9Nawo vakeemba kiimbo veshaambaa, “Nnyewe kusumani irua kitabu ekyo na iporommwa muuri ya vayo, mashika elyi kuleshishwa, kwaurya Iruva vandu va wo isanga na wa kishomu na wo mmba, kwawoora na samu yafo. 10Kwavaallwa vana va umangyi na vakohani va Iruva weeru; nawo mmbo vakee ishillya kunu irukeny.” 11Shalollya na iita ngyunyanga ta vasu veengyi taari toose ta kitima kilya kya itumbe, na ta valya vatiri muu, na ta vamiku valya, na yeekena lyawo lyefikye fiku ka fiku ka mafiku. 12Vakarera na unyanga uniini vakaamba, ni Ngurana ya Iruva yeyo ileshishwa isumani iwarya wiidimi na usuri na urango na finya na wiindi na uniini na mbora. 13Na wo kyuumbe ekyo kikee iruveu na yaa ulaniny na efo si ya uruka na uwe ya yeeve, na efyo fyoose fiifo, shafiita fishaambaa, “Mbora na wiindi na usuri na wiidimi mfya yeto akee rembo uwe ya kitima kya itumbe, na Ngurana ya Iruva, llung'anu na llung'anu.” 14Na valya vatiri muu vaana vakaamba, “Amen.” Na vamiku valya vakawa si, vakafiirya ndi.
Currently Selected:
Usukuyony 5: MASNT00
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.
