Sira 48
48
Eliya
1Ahanyuma omurangi Eliya yaimuka nk'omuliro,
ekigambo ekye kyayakaga nk'orumuli.
2Akabateza eifa,
n'okutayugakwe kwabarugiramu orufu bafa bangi.
3Akagamba omw'ibara ly'Omukama eiguru yalikoma,
kandi emirundi eshatu yahanantura omuliro.
4Okaba munyakitinwa otai, Eliya,
omu bigiro byawe by'okutangaza!
N'ohai aragiirwe kwebuga nka iwe?
5Omw'ibara lya Rukirabyona,
okahimbura omufu wamwihya Hadesi,
6abakama wabagobya aha kusilika,
abashaija enyanwanwa wabaihya aha bitabo byabo.
7Aha Ibanga lya Sinai okahulira Omukama nakuhabukira,
kandi aha Ibanga lya Horebu
wamuhulira narahira kubonabonyia ababishabe.
8Okakora abakama amajuta ab'okwehoroza ababisha abo,
n'abarangi ab'okukusikira.
9Iwe ayabaratwirwe akazimu k'omuliro,
wagenda omu gali elikusikwa efarasi z'omuliro.
10Ebihandiko nibigamba okwo obukiro obwagambirwe
kabuligoba oligaruka,
kugwisiliza ekiniga kya Ruhanga kitakabarukire,
ishemuntu kuhinduka omwanawe,
n'okugaruraho enganda za Yakobo.
11Baberwa abakuboine n'abafire nibakugonza;
naichwe kwakwo tulibona oburora.
Elisha
12Eliya kayabuliire omu kazimu,
omwoyogwe gwaijura Elisha wena.
Omu burorabwe tiyajungumbisiibwe mutwazi wena wena,
kandi taliho n'omoi ayamushuntamire aha mutwe.
13Taliho kyamugumiire,
kandi kayafire omutumbigwe gwaranga.
14Nk'okwo yakozire eby'okutangaza akyarora,
nikwo yakozire n'eby'okushobeza yafire.
15Aha rw'ebi byona abantu tibayechulize,
amafu gabo tibagalekeire,
balemwa babaihya omu nsi yabo babatwara endore,
bayemalira omu nsi zona.
Hakasigarwamu abantu bake muno,
kyonkai baikara n'abatwazi babo ab'oruganda rwa Daudi.
16Bamoi omuli abo bakakora ebyo Ruhanga yasiimire,
kyonkai abandi batungika obufu ahali bunu.
Hezekia
17Hezekia ekigokye akakyombekera eboma,
yakitahyamu n'amaizi.
Akakwata ebyoma yabishokoza ebiina omu rwazi nyabwazi,
yabyombeka amaziba g'amaizi.
18Omu birobye nirwo Senakeribu yatabaire,
yatuma Rabushake.
Rabushake n'eikurulye yaimukya omukono
yakoleeza muno Sioni.
19Abantu bakwaikuka emitima, bajugumba emikono,
bashaga abakazi balikurumwa.
20Kyonkai batakira Omukama omuganyizi,
bamwanjalira emikono.
Omutakatifu yayanguha yayema omw'iguru yabahulira,
yatuma omurangi Isaya kubarokora.
21Omukama akamotora orusisira rw'Abasiria,
omumalaikawe yabaita yabamaramu.
22Enshonga Hezekia akakora ebyashemeleire Omukama,
yarondora kakimoi Daudi ishenkuru,
nk'okwo murangi Isaya yamuragiire,
kuba Isaya ogwo akaba ali muntu muhango
mara ebyo yabonekerwaga yabigambaga n'obwesigwa.
23Omu birobye eizoba likagaruka enyuma,
n'oburora bw'omukama yabwongera omu maisho.
24Omu mani ga Mwoyo akabona ebilibaho aha maheleruka,
yahumuliza n'ababaire nibachura omuli Sioni.
25Akabashurulira ebilibaho kuturuka aha maheleruka,
yabashurulira n'ebishelekire bitakabaireho.
Currently Selected:
Sira 48: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.