Sira 46
46
Yoshua
1Yoshua eya Nuni omurwani w'amani w'endashana,
n'iwe yasikiire Musa omu by'oburangi.
Nk'okwo eibaralye lyagiire aha kiito,
akaba murokozi mukuru w'endonkwa za Ruhanga.
Yayehoroza ababisha ababatabaliraga,
yabona atyo kubonera Isiraeli obutaka bwayo.
2Akabona atai ekitinwa
orwo yaimukize emikono akakwatira ebigo ebyo embanda!
3Omu bamwebembeire n'ohai ayabaire ali manzi atyo?
Manya wenene yarashaniraga Omukama.
4Eizoba tilyayemeleziibwe mukonogwe?
Ekiro kimoi tikyarugirwemu bibili?
5Akatakira Rukirabyona omunyamani
orwo ababisha bamufundize buli rubaju.
6Omukama muhango akamuhorora,
yasindika orubare rw'amani.
Yarashanisa kubi eihanga elyo,
omu busongoka bwa Betihoroni
yasilikya ababaire bakyamurashanisa.
Amahanga gamanye okwo aina amani
omu bikwato by'endashana,
n'okwo Omukama n'iwe yabaire amwemiremu omu ndashana,
aha rw'okuba akaba ayeheleire kimoi Omushobora.
Kalebu
7Kandi omu makiro ga Musa,
Yoshua akakora eby'obwesigwa,
wenene na Kalebu eya Yefune
bakakwatangana n'embaga, batanga abantu okufakara,
babachuleza, balekera okweboroboita kubi.
8Mara aba bombili omu bantu 600,000
ababaire nibagenza amaguru
nibabatwara omu butaka bwabo,
ensi elikusheshekana amata n'obwoki,
nibo bahonokire bonkai.
9Omukama akaha Kalebu amani yagurusha nago,
yatemba omu mabanga,
abaanabe balya ensi egyo obutaka.
10Abaisiraeli bamanyireho okwo kili kirungi
kuba besigwa aha Mukama.
Abaramuzi
11Kandi n'abaramuzi buli omoi n'eirangalye,
abatalikurongotorwa bihuku,
mara batarugire aha Mukama,
nibaijukwa nibasiimwa!
12Amagufa gabo nigakagarukwemu oburora
mbali gabyamire,
okwo bakuniirwe ruli
babe nikwo baijukwa batyo omuli baijukuru babo!
Samweli
13Samweli omugonzibwa w'Omukama mara omurangiwe,
akataho obukama,
mara yakora amajuta abatwazi b'eihangalye.
14Yaramuraga embaga kuhonderana n'Amateka g'Omukama,
Omukama nawe yalinda Yakobo.
15Bakamukunda okwo ali murangi
aha rw'enshonga y'obwesigwabwe;
n'ebigambobye bikamwolekya
okwo ali mubonekerwa w'okwesigwa.
16Ababishabe bakamufunza embaju zona,
yatakira Omukama omunyamani,
yatamba n'ekitambo ky'omwana gw'entama ogulikwonka.
17Aho Omukama yayema omw'iguru yasharuka nk'enkuba,
eirakalye lyahulirwa lina amani gangi muno.
18Yamaraho abebembezi b'eihanga lya Tiro,
n'abatwazi bona b'Abafilisiti yabamaraho.
19Samweli ogu kayabaire yaija kufa,
yayeta abantu yabakomeleza
omu maisho g'Omukama n'enkorwa majutaye ati:
“Tinkatwaraga ka muntu,
nangu n'ejozi y'ebiratwa, chei.”
Taliho muntu yamugambireho kigambo.
20Nangu n'orwo yabaire yafire akagendelera kuranga,
yagambira Omukama Sauli okwo alikwija kufa.
Yayemaga omu nyanga aranga,
kuchwa eihangalye emize.
Currently Selected:
Sira 46: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.