Sira 44
44
Ekitinwa kya Ruhanga omuli batatenkurw'ichwe
1Mbwenu katusingize abantu b'eiranga,
batat'enkurw'ichwe omu mizarwa yabo.
2Omukama akabahaisa ekitinwa kihango,
bamanyikirwaho obukurubwe obw'okwema karai.
3Haliho ababaire baina engoma bali batwazi,
bali bantu ruranganwa aha rw'obushobora bwabo.
Bakaba baina amagezi nibahanura,
n'okuranga nibaranga.
4Bakaba bali bebembezi b'embaga nibagihabura,
begire baina amagezi ag'okujuna abantu,
n'omu kwegesa bagambaga eby'obumanyi.
5Abandi bakazina ebizina,
bazina n'engeera bazihandika.
6Haliho ababaire bali batungi baina obwihyo,
batwirege omu maka gabo.
7Abo bona bakunirwaga omu makiro gabo,
babaga byebugo omu biro byabo.
8Haliho abandi abasigiire eibara,
nangu abantu bakyabasiima.
9Kyonkai haliho abandi abatakiijukwa,
bakahwaho okw'obon'oti tibabaireho.
Bakashusha abatazairwe,
kumoi n'abaana babo ababarugire nyuma.
10Nawe aba bakaba bali bantu b'obuganyizi,
ebikorwa byabo ebirungi tibikebekaga.
11Emiramuukire yabo niyo eliba ya baijukuru babo,
n'ebyo basigire baijukuru babo balibishanga.
12Baijukuru babo bemelera aha ndagano,
balikasinga, n'abaana babo kutyo.
13Baliikara baramukire ebiro byona,
n'ekitinwa kyabo tikilyebeka.
14Baliziikwa omu milembe,
n'eibara lyabo lilitura emizarwa yona.
15Amahanga galirangana obumanyi bwabo,
n'enteko elibasingiza.
Enoki
16Enoki akashemeleza Omukama yamutwara;
emizarwa yona yagibera bulebero bw'okwechuza amafu.
Noa
17Noa akaboneka ali muhikiilire mara mugorogoki,
orwo ekibonabonyio kyaizire yakirokokaho.
Orw'ekyo orwo omutunga gwaizire,
ensi yabona ow'okugisigaramu.
18Omukama yakora nawe endagano ez'eirai lyona,
Ruhanga yaragana okwo abantu tibalishuba kwitwa mutunga.
Aburahamu
19Aburahamu akaba ishenkuruza amahanga gangi,
takazokaga muntu n'omoi ow'okumwigana kitinwa.
20Akakwata Amateka ga Rukirabyona,
Rukirabyona yakora nawe endagano.
Endagano egyo akagihamisisa akabonero aha mubiligwe,
Ruhanga orwo yamulengire yamushanga ali mwesigwa.
21Orw'ekyo Omukama akamunahilira yamumara enanu,
okwo amahanga galiherwa omugisha omuli baijukurube;
n'abaanabe abahindure bangi nk'enyanyinyi,
abasikise ensi kwema nyanj'egi kuturuka nyanj'eli
kuruga aha Mwiga gwa Efurati kugoba aha ndekelero y'ensi.
Isaka na Yakobo
22Isaka nawe akamumara atyo enanu
aha rwa Aburahamu ishe.
23Yashuba yagarukamu endagano na Yakobo
okwo abantu bona balibona omugisha;
yamuhera kimo emigishaye,
yamuha ensi obusika,
ensi egyo yagyata,
yagigabira enganda ikumi na ibili.
Currently Selected:
Sira 44: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.