Sira 3
3
Oburagirwa aha bazaire
1Inywe baana mumpulilize inye isheinywe;
mukore ebyo ndikubagambira nirwo emilembe elibagumaho.
2Omukama akaha ishemuntu obushobora
bw'okugelera abaanabe,
kandi na nyinamuntu yamuha ekitinwa
abaanabe kumuhulira.
3Kaishe muntu akunira ishe ayatilira amafuge,
4kandi buli muntu wena aha nyina ekitinwa
ashusha omuntu alikubona eitunga.
5Kaishe muntu akunira ishe
na wenene abaanabe balimuha ebyera,
kandi ekyo alishaba alihulirwa.
6Aha ishe ekitinwa alirama,
kandi aligilira Omukama omuhuliro alishemeleza nyina.
7Owab'ogu okwo akolera Omukama
nikwo akolera abazairebe.
8Okunire sho omu bigambo n'omu bikorwa,
nirwo alikuha omugisha.
9Enshonga omugisha gwa ishemuntu
guramukya amaka gabo;
kyonkai omuraamo gwa nyinabo
gubakambulira ebyo basimbiizeho.
10Otalikunukuruza sho iwe kweteka eiguru,
kuba k'olikumukunukuruza tolibona kitinwa.
11Ekitinwa ky'omuntu kiruga omu kuha ishe ekitinwa,
kandi abaana okutakunira nyinabo baba bahemukire.
12Mwana wange, sho k'aligurusha omujune,
kandi orwo alikurora otalimujunaza.
13Nangu n'orwo alihunguka amagezi omutwaze mpora,
otalibona oina mani okamugaya.
14Obufura bwo wagilira sho tibwebeka,
bulikujuna kwatilira amafu gawe.
15Omu matangwa Omukama alijuka obufura bwawe akujune;
amafu gawe galyagilira okw'obona
eseluji omushana gujwire.
16Kaishe muntu anagirana ishe aba nashusha alikurogota,
na buli omoi anigaza nyina abona omuraamo gw'Omukama.
Obwetohya
17Mwana wange, eby'olikukora byona obikoze obwetohya;
aho oligonzibwa abo Ruhanga akunda.
18K'oliba muhango kushagaho,
obe mwetohya kushagaho;
19kityo n'Omukama alikushemelerwa.
20Amani g'Omukama gaba gangi,
kyonkai abetohya nibo bamusingiza.
21Otalitanira kilikukukiza mani,
anga kunyomoza ebyo otalikushobora.
22Ebyo bakuhaire kukora obe nibyo otaho amani,
ebishelekire tolikwetaaga kubimanya.
23Ebyo otaragiirwe bitakuhenda,
kuba oraboine ebintu ebishagire muno amagezi g'omuntu.
24Okwanguha kulengelera kukahabisa bangi,
25emibonere mibi ebagiza ebitekelezo ebikondamaire.
26Omuntu atagambirwa ahanyuma alibona enaku,
kandi kaishe muntu agonza akabi alikagwamu.
27Omuntu agumangana omutima agwerwa enaku,
omufakare ayongera obufu aha bundi.
28Ow'eikuru enaku tizimuhwaho,
kuba omuli wenene emize yasimbire emizi.
29Omutima gw'omugezi guhiga enshonga y'omugani,
kandi omumanyi ayenda kwikara ategire okutwi.
Okushumbusha abaanaku
30Amaizi garaza omuliro ogulikurabagira,
nikwo n'okushumbusha abaanaku kwatilira amafu.
31Agilira banu ekisha aba naleba omu maisho,
omu kanya k'alizangiranwa alibona ab'okumujuna.
Currently Selected:
Sira 3: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.