Sira 1
1
Oburungi bw'Obumanyi
1Bumanyi atabuka ahali Mukama
mara agirwa wenene eirai lyona.
2Omushenye gw'enyanja,
amatonya g'enjura,
n'ebiro eby'eirai lyona
n'ohai ayakubibara?
3Obwemi bw'okugoba aha iguru,
obukika bw'ensi,
oburai bw'enyanja n'obumanyi
n'ohai ayakubihenjuza?
4Bumanyi akatondwa mbere ebintu byona bitakatonzirwe;
5kandi okushobokerwa nyakabara kubaho kwema eirai lyona.
6N'ohai owo baragambiire entabuko ya Bumanyi?
7Ebitekelezobye eby'amagezi bimanyw'ohai?
8Omumanyi ab'omoi mara w'okutinisa muno,
asingiire aha nketoye.
9Omukama wenene n'iwe yatonzire Bumanyi,
akamubona yamwetegeleza,
ebyo yakozire byona akabikoza muno Bumanyi.
10Bumanyi atura n'abantu bona nk'okwo ayenda,
Kandi abagonza Ruhanga abatunga Bumanyi ogwo.
11Okutina Omukama kitinwa mara kyebugo,
rukinga rw'ebyera n'amashemelerwa.
12Okutina Omukama kugiza omutima amashemelerwa,
kugiza ebyera n'ebishanda n'oburora burai.
13Atina Omukama ahanyuma aligoshoka,
omu kufakwe aliba kilimugisha.
14Okutina Omukama niyo mbandizo ya Bumanyi,
abesigwa babakwa nawe enda.
15Akatulira kimoi omu bantu kwema akarai kona,
na baijukuru babo balimwesiga.
16Okutina Omukama nikwo kugira Bumanyi okamumarayo,
atunga abantu ebirungi bingi muno.
17Amaju gabo gona agaijuza ebintu ebirungi,
n'esitoa zabo azijuza atyo.
18Okutina Omukama n'iwe Bumanyi nyakabara,
agiza abantu emilembe nyingi
n'omuraro gurungi.
19Omukama akabona Bumanyi yamuha abantu,
yabaha amagezi n'okushobokerwa
yabibagwisiza nk'enjura,
abagumira kimoi ahali Bumanyi
abaha ekitinwa kingi.
20Okutina Omukama niyo ntabuko ya Bumanyi,
21abamugira babona oburora burai.
Okwebalira
22Ekiniga kitaina nshonga tikyetongerwa,
kuba omuntu ekinigakye kimuleteleza agwa omu kabi.
23Omuntu enyegumisiliza ayegumisiliza
alemwa agenderwage,
aija abona ebyera bingi muno.
24Aikara amemire kugoba orwo agenderwage,
aho abantu baija bamusiima okwo aina amagezi.
Obumanyi n'okukunira Ruhanga
25Bumanyi agira empanika y'ebigambo by'obumanyi,
kyonkai okutina Ruhanga guba muziro gw'omufakare.
26K'oligonza Bumanyi oyekomye emihango,
nirwo Omukama alikutunga Bumanyi ogwo.
27Kuba okutina Omukama n'iwe Bumanyi na Magezi,
enshonga Omukama wenene
ashemelerwa obwesigwa n'obwetohya.
28Oyekomeleze okutina Omukama;
otalimufukamira na mutima gubeganukire.
29Otaliba ngobya mu bantu,
n'omunwa gwawe oligumanya.
30Otalyekuza bikaija bikakuhinduka okekwasa enshoni.
Omukama yakuzora enama zawe omu nteko
aha rwa iwe okutamutina n'okwijura obugobya.
Currently Selected:
Sira 1: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.