Sira 19
19
1Omuntu akora ogw'etamiiro talitunga;
agaya obuntu obuke buke agenda nalemwa mpora mpora.
2Amarwa n'abakazi bihabisa abashaija b'amagezi,
kandi omushaija ashera n'abamalaya aba ali mujaja muno.
3Alijunda alibwe enzito,
mara obujajabwe bulimwisa.
4Ayanguha kwesiga banu aba aina amagezi gake,
afakara aba nayeshobya wenene.
5Ashemelerwa emize mibi,
alibona ekibonabonyio.
Orugambo
6atenda rugambo atantara ensika.
7Batalikubarulira fumoro okagitebya,
mara oliba otafeleirwe n'akake.
8Aliba munywanyi wawe anga mubisha wawe
otalikimutebeza;
kabutali bufu kukibika, otalikyatura;
9kuba haliho ayakushangwa akulebire nakuhulira,
akanya kaija kagoba akutamwa.
10Oina ekigambo eky'ohuliire? Kikugwemu.
Obe manzi! Tikilikwija kukubarura.
11Ekigambo nk'eki kishasa muno omufera,
n'iwe ashusha omukazi alikurumwa.
12Ekigambo nk'ekyo aha mufera
kili nk'omwambi ogukwatiire omu kibero.
13Kawakuhulira bati munywanyi wawe aina eky'ashobize,
omubaze nka nikwo.
Rundi gakuba gatali mazima.
Kagaligo talikishubira.
14Kawakuhulira bati mutahi wawe aina ekyo agambire,
omubaze nka nikwo. Rundi gakuba gatali mazima.
Kagaligo, talikigamba rundi.
15Kawakuhuliraho munywanyi wawe ekigambo, omubaze;
enshonga emirundi nyingi kuba okulegelera omuntu bushai.
Kityo otalyesiga buli kintu ekyo wahulira.
16Omuntu nashobora kurahukwa aha rulimi atakigendeleire.
N'ohai ow'orulimirwe rutakahenaga?
17Mutahi wawe kawakumuhulizaho eky'okukutamisa,
18obanze omubaze otakamukangire;
19oshube obilekere Rukirabyona
n'iwe alibiramura kuhonderana n'Amatekage.
Obumanyi nyakabara
20Okutina Omukama n'okuhikya Amateka,
21nibwo bumanyi bwonene.
22Okumanya buli kantu akakwete aha mize mibi
obwo ti bumanyi;
kandi okuhondera eby'abafakare balikugamba
ago nago ti magezi.
23Habaho amagezi agabi muno,
kyonkai habaho omufera ow'okuba mufera
aha rw'okutagira bumanyi.
24Hakili omuntu ataina magezi kyonkai atina Ruhanga,
kukira omuntu omugezi muno kyonkai nachwa Amateka.
25Nikishoboka omuntu kuba mugezi ow'okutangaza,
kyonkai otabaire mwesigwa;
anga omuntu kugira amakune ag'obufera
ngu abone eky'alikwenda.
26Haliho omuntu ekihwamwoyo kunaga orukya oti ajunaire,
kyonkai omunda aijwire obugobya.
27Ayehurubasa aha maisho oti talikuhulira;
k'arasiga hataliho amulebire aina okwo arakugira.
28Obuburwa mani kaburamutanga okukora kubi,
orwo arakwasa obushango aragirakwo.
29Emishusire y'aha maisho niyo omuntu amanyikiraho,
n'omuntu ow'amagezi amanyikira aha busobwe
orwo wamutanganwa.
30Emijwalire y'omuntu n'okusheka akakankabuka
n'emitambukireye byoleka okw'ali.
Currently Selected:
Sira 19: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.