Orubara 9
9
Pasika ya kabili
1Omu mwezi gwa mbere gw'omwaka gwa kabili, Abaisiraeli barugire Misiri, Omukama akagambira Musa ati, 2“Abaisiraeli bashemeze Pasika omu makiro gayo agaragiirwe. 3Aha bwaigoro bw'ekiro kya ikumi na binai eky'omwezi ogu, mube nirwo mushemeza Pasika; kuba nigwo mwanya gwayo oguragiirwe. Omu kugishemeza mwekomye ebiragiro byayo byona n'emigenzo yayo yona.” 4Kityo Musa agambira Abaisiraeli kushemeza Pasika. 5Omu bwaigoro bw'ekiro kya ikumi na binai ky'omwezi, bashemeza Pasika egyo omw'Irungu lya Sinai. Abaisiraeli bakakora nk'okwo Omukama yahangiire Musa. 6Hakaba haliho abantu ababaire bahagaire aha rw'okukwata abafu. Kityo bakaba batalikushobora kushemeza Pasika kir'ekyo. Aho baija ahali Musa na Aroni kiro kyonene ekyo, 7babagambira bati, “Ichwe tuhagaire aha rw'okuba tukwete abafu. Mbwenu aha orwo Abaisiraeli balikuhongera Omukama ebihongo, nitutangwa kumuhongera?” 8Musa abashubamu ati, “Linda, mbanze mpuliire ekyo Omukama arampangira kambahorora.”
9Omukama agambira Musa ati, 10“Ogambire Abaisiraeli okwo k'omuntu wena wena, nangu n'omuli baijukuru banyu, alihagara aha rw'enshonga akwete omufu anga yashangwa ali harai omu rugendo, ogwo nashobora kushemeza Pasika. 11Omu bwaigoro bw'ekiro kya ikumi na binai ky'omwezi gwa kabili bashemeze Pasika. Balye akataama ka Pasika n'omukate ogutatumbisiibwe n'emikubi elikushalira. 12Akatama bakalye kona, batagira kyobarazaho kuhika bwankya. Kandi batakahenda igufa. Pasika bagishemeze nk'okwo ebiragiro byayo bilikugamba. 13Kyonkai omuntu aliba nayera mara atali mu rugendo, kyonkai akanga kushemeza Pasika, ogwo aliba atali Mwisiraeli, orwo atahongerea Mukama kihongo kya Pasika omu kiro ekiragiirwe. Akhalimurugira omu bufubwe obwo niwe alikamanya. 14K'omugenyi alibafurukiramu, akashemeza Pasika y'Omukama nk'okwo ebiragiro n'emigenzo yayo bilikugamba, mugire ekiragiro kimoi: Ekilikukwata omuzarwa kibe nikyo kikwata omufuruki.”
Ekichwi ky'omuliro
(Oku 40:34-38)
15Kiro ekyo baimukya ekiikaro, Ekichwi kikashweka ekiikaro ekyo, ekyo Omukama yasingiragamu, Ekichwi kikabunda ekiikaro ekyo kwema bwaigoro kutuuka bwankya, mara kikaba nikishusha omuliro. 16Kiikara kityo orubelera, nikibunda ekiikaro buli kiro. 17Orwo ekichwi kyarugaga aha Ihema, Abaisiraeli bafuruka. Mbali kyayemeleraga baba niho basisira. 18Orwo Omukama yahangiraga Abaisiraeli kufuruka, bafuruka. Orwo yabahangiraga kusisira, basisira. Orwo ekichwi kyashangwaga kikyabunzire ekiikaro, baikaraga omu rusisira. 19Nangu n'orwo kyakukibunzire ebiro bingi, Abaisiraeli bayekomyaga omuhango gw'Omukama, tibafurukaga. 20Orundi ekichwi kyamaraga ebiro bike aha kiikaro, kyonkai bahonderaga omuhango gw'Omukama baikara basisiire. Orwo yabahangiraga kufuruka, bafuruka. 21Kandi orundi ekichwi kyayemaga bwaigoro kuturuka bwankya. Orwo bwankya kyayamuukaga, baimukya. Anga kakyakusibire kitabonekire, n'omu kiro kikabura, baguma bagenzire. 22Ekichwi kyamara biro bibili anga omwezi n'okushagaho, kili aha kiikaro, Abaisiraeli baikaraga basisiire, tibafurukaga. Kyonkai orwo kyayamuukaga, bafuruka. 23Orwo Omukama yabahangiraga kusisira, basisira. Orwo yabahangiraga kufuruka, bafuruka. Okwo yahangiraga Musa nikwo bakoraga.
Currently Selected:
Orubara 9: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
