Orubara 3
3
Batabani ba Aroni
1Aba nibo bana ba Aroni na Musa omu makiro ago Omukama yafumoire na Musa aha Ibanga lya Sinai. 2Aga mabara ga batabani ba Aroni: Nadabu omuzigaijo, Abihu, Eleazari na Itamari; 3nibo bakuhani abakozirwe amajuta, abo Aroni wenene yatendekire kukora omwoga gw'obukuhani. 4Kyonkai Nadabu na Abihu bakafa, bagwa omu mabona g'Omukama omw'Irungu lya Sinai orwo babaire nibamutambira ekihongo ky'okwokibwa ekihagaire. Mara bakaba bataina bana. Kityo Aroni ishebo akyarora, abakozire omwoga gw'obukuhani ni Eleazari na Itamari.
Abalevita nibarondwa kuheleza abakuhani
5Omukama agambira Musa ati, 6“Leta ab'oruganda rwa Levi, obate omu maisho ga Aroni omukuhani, babe nibamukolera. 7Bamukolere emilimo eyo yakukozire, kandi bakore n'ey'enteko yona omu maisho g'Eihema ly'Omuterano. 8Bamanye ebintu byona ebikwete aha Ihema ly'Omuterano, kandi orwo balikukora emilimo aha Ihema elyo, bakolere n'Abaisiraeli bona. 9Abakuhani obakwase Aroni n'abaijukuru. 10Aroni n'abaijukuru obakwase emyoga y'obukuhani bagikore. Kyonkai k'omuntu ondijo wena wena alibetahyamu, ogwo aitwe.”
11Omukama agambira Musa ati, 12“Omu Baisiraeli narondamu Abalevita aha mwanya gw'emizigaijo yona omuli Isiraeli. Abalevita barabaga bange, 13ahakuba emizigaijo yona eba yange. Kiro ekyo naisire emizigaijo yona omuli Misiri, nkaronka emizigaijo yona omuli Isiraeli yaba yange, omuntu n'ekitunganwa. Abo baliba bange. Omukama n'inye.”
Abalevita nibabarwa
14Omukama agambira Musa omw'Irungu lya Sinai ati, 15“Bara ab'oruganda rwa Levi kuhonderana n'amahiga gabo n'ebika byabo. Aketwa mushaija wena omubare, kubandiza aha w'omwezi gumoi kutemba.” 16Kityo Musa ababara nk'okwo Omukama yagambiire, nk'okwo yahangiirwe. 17Aga nigo mabara ga batabani ba Levi: Gerishoni, Kohati na Merari. 18Baijukuru ba Gerishoni kuhonderana n'amahiga gabo, amabara gabo nig'aga: Libuni na Shimei. 19Baijukuru ba Kohati kuhonderana n'amahiga gabo ni Amuramu, Izihari, Heburoni na Uzieli. 20Baijukuru ba Merari kuhonderana n'amahiga gabo ni Mahali na Mushi. Aga nigo mahiga g'Abalevita, nibyo bika byabo.
21Gerishoni niwe alikutabukwaho enganda ibili: Abalibani n'Abashimei. Ezi nganda ezatabukaga omu Bagerishoni. 22Orubara rwabo bona abaketwa bashaija, kwema aha w'omwezi gumoi kutemba, nibagoba 7,500. 23Amaka g'Abagerishoni gasisiraga enyuma y'Eihema obugwaizoba. 24Omukuru w'eihiga elyo ly'Abagerishoni yabaga Elisafu eya Laeli. 25Omwoga gw'Abagerishoni omw'Ihema ly'Omuterano, gwabaga kumanya ekiikaro, Eihema lyonene n'eby'okulishwekesa, n'orutimbe rw'omulyango gwalyo, 26entimbe za nyakabuga, ekisika ky'omulyango gwa nyakabuga eyazingoraga ekiikaro na alutare hamoi n'emiguha yayo: Eikora lyona elyabaire likwete ahali ebi byona.
27Kohati niwe alikutabukwaho Abamuramu, Abaizirahi, Abaheburoni n'Abauzieli. Ezi nganda ezatabukaga omu Bakohati. 28Orubara rwabo bona abaketwa bashaija, kwema aha w'omwezi gumoi kutemba, bakaba nibagoba 8,600. Omwoga gwabo bakoraga emilimo y'ahatakatifu. 29Amaka g'Abakohati gasisiraga rubaju orwa kasi orw'ekiikaro. 30Omukuru w'oruganda rw'Abakohati yabaga Elisafani eya Uzieli. 31Omwoga gwabo balebeleraga Esanduku ly'Endagano, emeza, ekinara ky'etara, alutare zona, ebikwato by'ahatakatifu ebyo abakuhani bakoza hamoi n'ekisika: Eikora lyona elyabaire likwete ahali ebi byona. 32Eleazari eya Aroni omukuhani niwe yakuliraga abebembezi b'Abalevita, n'okulebelera abakozi b'ahatakatifu.
33Merari natabukwaho Abamahali n'Abamushi: Ezi nganda ezatabukire ahali Merari. 34Orubara rwabo bona abaketwa bashaija, kubandiza aha w'omwezi gumoi kutemba, bakaba bali 6,200. 35Omukuru w'oruganda rw'Abamerari yabaga Zurieli eya Abihaili. Rubaju orwa bikara orw'ekiikaro nirwo rwabaga busisiro bwabo. 36Abamerari abo bakaba bakwasiibwe efuremu z'ekiikaro, emihingo, enyomyo n'amaguru gazo, na buli kamoi akakwete aho: Eikora lyona elyabaire niligendanwa n'ebi byona. 37Kwakwo enyomyo eza nyakabuga obuzingora n'amaguru gazo, n'enkondo n'emiguha. Byona ebi byalebelerwaga Abamerari.
38Musa na Aroni n'abatabani nibo basisiraga omu maisho g'ekiikaro, omu maisho g'Eihema ly'Omuterano, bolekeire oburugaizoba. Emichonchozo eyakorwaga ahatakatifu aha rw'Abaisiraeli, yamanywaga bonene abo. Omuntu ondijo wena wena kayakugobire ahatakatifu bamwitaga. 39Abalevita bona abo Musa na Aroni babazire bahangiirwe Omukama, nk'okwo amahiga gabo gabaire gali, abaketwa bashaija bona kwema aha mwezi gumoi kutemba, bakaba nibagoba 22,000.
Abalevita nibatwara obuzigaijo
40Omukama akagambira Musa ati, “Abaisiraeli bona abashaija emizigaijo, kubandiza aha mwezi gumoi kugendelera, obabare nobahandika amabara. 41Onyahulire Abalevita bona, inye Omukama, bakwate omwanya gw'Abaisiraeli bona emizigaijo. Onyahulire n'ebitunganwa by'Abalevita abo bilye omwanya gw'ebitunganwa emizigaijo byona by'Abaisiraeli.” 42Kityo Musa abara Abaisiraeli bona emizigaijo, nk'okwo Omukama yamuhangiire. 43Abaketwa bashaija bona emizigaijo okwo babazirwe nibahandikwa amabara, kuruga aha b'omwezi gumoi kutemba, bakagoba orubara rw'abantu 22,273.
44Kandi Omukama agambira Musa ati, 45“Abalevita obateke aha mwanya gw'Abaisiraeli bona emizigaijo. N'ebitunganwa by'Abalevita bilye omwanya gw'Ebitunganwa by'Abaisiraeli emizigaijo. Abalevita barabaga bange: Omukama n'inye. 46Orwo Abaisiraeli emizigaijo balikukiraho Abalevita abantu 273, abalikushagaho abo obachungure. 47Buli muchungurwa omushashulire ebichweka bitanu by'eshekeli kuhonderana n'eiguzi ly'eshekeli y'ahatakatifu ey'egera 20. 48Empiya ezo ez'orachunguza Abaisiraeli emizigaijo abalikushaga ozikwate ozihe Aroni n'abatabani.” 49Balinya abashagire aha kuchungurwa Abalevita bakechunguza empiya, 50bazikwata baziha Musa, nizo shekeli 1,365 eziganiraine n'eshekeli y'ahatakatifu omw'iguzi. 51Empiya ezo ezo bayechungwize, Musa akaziha Aroni n'abatabani, nk'okwo Omukama yamuhangiire.
Currently Selected:
Orubara 3: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
