Orubara 11

Omwanya gwa Tabera

1Ahanyuma abantu babanza kweboroboitera Omukama aha rw'amatangwa agabagwireho. K'Omukama yahuliire okwo bamweboroboitera yabanigalira muno. Nirwo yasindikire omuliro gukokya empelero z'orusisira. 2Kandi aho abantu bonene batakira Musa. Musa ashaba aha Mukama, omuliro gwarara. 3Nikyo omwanya ogwo gwayeteirwe Tabera aha rw'enshonga y'omuliro ogwarugire aha Mukama gukokya omu nsisira zabo.

Musa naronda abebembezi nshanju

4Omu Baisiraeli abo hakaba halimu abagendaga nabo, baija bagira orwoyoyo rungi muno orw'enyama. Abaisiraeli nabo babanza kushuba kujojoba nibagira bati, “Katwakuboine enyama tukagilya! 5Nitwijuka enfuru ezo twalyaga bushai tuli Misiri, amatango, emyongo, emikubi elikushusha ebitunguru, ebitunguru byonene n'ebitungurusumu. 6Nawe mbwenu amani gatuhwa, mara taliho kantu kona kona shana manu egi eyo tulebire kushai!”

7Manu egyo yashushaga enjuma z'omugusha, kandi rubaju orundi eteleramu nk'oruzinga. 8Abantu bagendaga bagikumakuma bagisa aha mbengo anga bagitwanga omu bitwangiro. Bakaba nibagichumba omu nyungu nibagihamu ekeki. Eminulire yayo ekaba neshusha ekeki ezo batairemu amajuta. 9Orume karwagwaga omu nsisira omu kiro, manu nayo eizirana n'orume orwo.

10Musa ahulira okwo abantu omu maka balikweboroboita, buli muntu ayemire aha Ihemalye aha mulyango najojoba. Aho Omukama anigara muno na Musa atamwa. 11Musa abaza Omukama ati, “Waitu nk'omwiru wawe wamukora kubi? Kiki kutanganyira, kunsebeka embaga egi yona? 12Inye abantu bona nkabazara? Nkabaihya Misiri k'oija kungambira oti, ‘Obakikire omu kifuba nk'okwo omulezi akikira enkelemeke kubatwara omu nsi eyo wanahilire baish'enkurubo okwo oligibaha bonene aba?’ 13Inye enyama y'okuha abantu aba bona ngihe nkahai. Aha rw'okuba nibanjojobera bati, ‘Otuhe enyama y'okulya.’ 14Tindikushobora kutwara mbaga egi yona nyenkai, nensikilira muno. 15K'oraba noyenda kungira otyo, onyite aho n'aho, nawe k'oraba nonganyira, ntabona naku ezo.”

Omukama naha Musa ab'okumuhwera

16Omukama ahorora Musa ati, “Onshombokeze abantu nshanju omu bakuru b'Abaisiraeli, ab'olikumanya okwo baina obukuru mara bebembezi omu mbaga. Obalete aha Ihema ly'Omuterano oyemelere nabo. 17Inye ndasongoka nfumore naiwe honene aho. Ndabaha obushobora nk'obwawe, baije bakukwase kutwara embaga, oleke kugitwara iwe wenkai. 18Ogambire abantu oti, ‘Mweyeze kuba nyenkya nimwija kulya enyama. Mweboroboisire Omukama yahulira.’ Mugizire muti, ‘N'ohai aratuha enyama tukalya? Orwo twabaire tuli Misiri tukaba tulige.’ ” Aha rw'ekyo Omukama naija kubaha enyama mulye. 19Mara timulikwija kugilya kiro kimoi anga bibili anga bitanu anga ikumi, nangu n'amakumi gabili, 20muragilya omwezi gwona, elemwe ebanukire kubi, ebatame. Manya n'inywe mushengire Omukama asingiire omuli inywe, mwamujojobera nimugira muti, “Ekyatwihire Misiri kiki?” 21Musa agamba ati, “Leba, nyina abantu elaki mukaga omu rugendo; washuba waitu wagamba oti, ‘Ndabaha enyama y'okulya omwezi gwona!’ 22Mbwenusi aho babaitire amahyo g'entaama n'ag'ente, enyama kwija kubamara? Anga babajubire enfuru zona omu nyanja, nizo zirabagoba?” 23Omukama abahorora ati, “Obushobora obwange tibulengwa. Mbwenu orabona okwo ekyo nagamba kirabakwo anga chei.”

24Kityo Musa aruga omw'Ihema ly'Omuterano, agambira abantu ebyo Omukama yagamba. Ashombokya abantu 70 omu bakuru b'Abaisiraeli, abazingoza Eihema. 25Aho Omukama asongoka omu kichwi afumora na Musa; amara aha abakuru abo nshanju obushobora nk'obwa Musa. Orwo bagizire obushobora babanza kuranga. Kyonkai bakaranga elyo lyonkai, tibagendeleire.

26Mbwenu omu rusisira bhakaba hasigairwemu abantu babili: Elidadi na Medadi. Na bonene bagobwa obushobora. 27Nikwo omusigazi omoi kwiruka akagambira Musa ati, “Elidadi na Medadi bali omu rusisira nibaranga.” 28Yoshua eya Nuni, omuhwezi wa Musa, omoiho omu ndonkwaze, agira ati, “Rugaba rwange Musa, obatange.” 29Kyonkai Musa amubaza ati, “Wachuba, wabona bankira? Hakili nangu eihanga lyona ly'Omukama bakubaire barangi, hakabaha obushobora!” 30Musa n'abakuru bona b'Abaisiraeli bashuba omu nsisira.

Endahi

31Omukama asindika omuyaga, gwihya gwemire omu nyanja, guleta endahi, guzigobya bwatana aha nsisira, orugendo rw'ekiro kimoi kwema aha nsisira ezo buli bwolekera. Zonene zikaba niziharara nk'emita emoi kwema ahansi. 32Mushana ogwa kir'ekyo gwona kukeisa n'obwire, n'ekiro ekyahondeireho kyona, abantu bagenda kukwata endahi ezo. Ayakwete zike akakwata ehomeri ikumi. Bamara kuzita bazanika buli hantu obuzingora bw'ensisira. 33Orwo babaire babanza kukanjura, Omukama abanigalira, abateza ekibundo kihango muno. 34Aha rw'ekyo halinya haketwa Kiburoti Hatava#11:34 Hatava Kiburoti Hatava, nyanga z'orwoyoyo. orwo baziikiremu abantu abaisiibwe orwoyoyo rw'enyama. 35K'abantu barugire Kiburoti Hatava bagya Hazeroti, niyo baikaire.

Currently Selected:

Orubara 11: RHAY01

Highlight

Copy

Compare