Eby'abalevita 7
7
Ebihongo by'endihi
1“Eli nilyo iteka ly'ekihongo ky'enyatano y'entambara. Kitakatifu muno. 2Omu mwanya mbali baitira ekihongo ky'enyatano y'obufu niho baraitiraga ekihongo ky'enyatano y'entambara. Kandi obwamba bwakyo babushaimulire alutare kugizingora. 3Ebishaju byayo byona bihongwe: Ebishaju by'eikira, orushaju rw'amara, 4ensigo zombili n'ebishaju biziliho omu nyugunyu, n'ekiteko ky'eine eky'oraihiranagaho n'ensigo. 5Omukuhani akyokezega ahali alutare kili kihongo ky'Omukama ekyokesiibwe omuliro. Kihongo ky'enyatano y'entambara. 6Buli mushaija omu bakuhani yakukilyaho; kilirwega omu mwanya gutakatifu. Kyonene kitakatifu muno. 7Ekihongo ky'enyatano y'entambara nikishusha ekihongo ky'enyatano y'obufu, byombili nibikwatwa eiteka limoi; omukuhani arakikoza enyatano akitware. 8Omukuhani arahongaga ekihongo ky'omuntu wena wena eky'okwokibwa atwarega oruhu rw'ekihongo ekyo ky'okwokibwa ekyo yahonga. 9Kandi buli kihongo ky'emyaka ekyokeziibwe omu kyoto, na byona ebitekatekeirwe aha rukarango anga aha sahani, kirabaga ky'omukuhani ayakihonga. 10Na buli kihongo ky'emyaka ekitabirwemu amajuta anga kibe kyomire, kirabaga kya batabani ba Aroni bona, omuntu na mutahiwe babegane bwiganwa.”
Ekihongo ky'obumoi
11“Eli nilyo iteka ly'ekitambo ky'ebihongo by'emilembe eky'omuntu yakuhongera Omukama. 12K'arakihongaga aha rw'esimi aho akihonge n'ekihongo ky'esimi eky'ekeki zitabirainwe n'amajuta, n'ekeki zitatumbisiibwe zisiigirwe amajuta, n'ekeki z'ensano enungi etabirainwe n'amajuta bunyanungi. 13Ekitambo ky'ebihongobye by'emilembe aha rw'esimi akileterane n'ekihongokye ky'ekeki z'omukate gutatumbisibwe. 14Ezab'ezi ahongega ekeki emoi ahali buli kihongo, kili kihongo ky'Omukama. Kirabaga ky'omukuhani arashaimuraga obwamba bw'ekihongo ky'emilembe. 15Enyama y'ekitambo ky'ebihongo by'emilembe aha rw'esimi elibwega aha kiro ky'ekihongokye. Atagira yoyarazaho kugoba bwankya. 16Kyonkai k'ekitambo ky'ekihongokye kiraba kili kihongo ekiragainwe handiki kibe kihongo ky'obweyendezi, kilibwega aha kiro eky'arahongeragaho ekitambokye, na bukeire ekirashangwa kiraireho kiraliibwaga. 17Kyonkai enyama y'ekitambo erasigaraho kugoba aha kiro kya kashatu egyo eyokibwe omuliro. 18K'enyama yona yona y'ekitambo ky'ebihongobye eby'emilembe eraliibwaga aha kiro kya kashatu, ogwo aragihongaga taikilizibwega nangu n'ekitambo kyonene kukisiimirwa. Kirabaga kinyamunuge, kandi n'arakilyaga arakwatwaga entambara.”
19“Enyama eragobaga aha kintu kyona kyona ekihagare etalilibwa; eyokesibwe omuliro. Abalikwera bona bakulya enyama, 20kyonkai omuntu aralyagaho enyama y'ekitambo ky'ebihongo by'emilembe ali muhagare, bamuchwe omu bantube. 21Kandi k'omuntu wena wena arakoragaho ekihagare, kibe kihagaro ky'omuntu anga eky'ekigunju anga ekinyamunuge kyona kyona, akashuba akalya enyama y'ekitambo ky'ebihongo by'Omukama eby'emilembe, omuntu ogwo bamuchwe omu bantube.”
22Omukama agambira Musa ati, 23“Ogambire Abaisiraeli oti, Mutalilya bishaju, bibe by'enumi anga entama, anga embuzi. 24Ebishaju by'ekigunju ekyefeleire, anga eby'ekitaagataagwirwe ebikaaka, mwakubikoza omu ngeli endijo kyonkai mutabiliire. 25Aha rw'okuba buli muntu aralyaga ebishaju by'ekigunju ekihongeirwe Omukama kyokesiibwe omuliro bamuchwe omu bantube. 26Kandi mutalilya bwamba bwona bwona bw'aba bwa kinyonyi anga bwa kigunju hona hona omu buturo bwanyu. 27Omuntu wena wena arakalyaga obwamba bamuchwe omu bantube.”
28Omukama agambira Musa ati, 29“Ogambire Abaisiraeli oti, Omuntu arahongeraga Omukama ekitambo ky'ebihongo by'emilembe aletere Omukama ekihongokye kuruga aha kitambo ky'ebihongo by'emilembe 30kyokibwe, akikwate wenene akiletere Omukama. Ebishaju abileterane n'enkoro. Enkoro egyo agichunkeze omu maisho g'Omukama. 31Omukuhani ayokeze ebishaju ahali alutare, kyonkai enkoro ya Aroni n'abatabani. 32Ekirumbu kya bulyo eky'ekitambo ky'ekihongo kyawe eky'emilembe okihe omukuhani. 33Mubatabani wa Aroni arahongaga ebishaju n'obwamba bw'ebihongo by'emilembe, omugabogwe atware ekirumbu kya bulyo. 34Enkoro erachunkezibwa, n'ekirumbu ekyo byombili nibiruga aha kitambo ky'ebihongo by'emilembe ky'Abaisiraeli, nimbiha Aroni omukuhani n'abatabani, mushondo gwabo gw'ebiro byona. 35Ogu nigwo mushondo gwa Aroni n'abatabani kuruga aha bihongo by'Omukama ebyokesibwe omuliro, gukahabwa omugisha aha rwa bonene kir'ekyo baronkirwe kuba bakuhani kukolera Omukama. 36Omukama akahangira Abaisiraeli ebi kubiha abakuhani, aha kiro ekyo bakozirwe amajuta. Mugabo gwabo gw'ebiro byona omu mizarwa yabo.”
37Eli nilyo iteka ly'ekihongo ky'okwokibwa, eky'emyaka, ekihongo ky'enyatano y'obufu, ekihongo ky'enyatano y'entambara, eky'eitendeka, n'ebihongo by'emilembe. 38Nibyo bihongo eby'Omukama yahangiire Musa aha Ibanga lya Sinai, kiro ekyo yahangiire Abaisiraeli kumutambira ebitambo omw'irungu lya Sinai.
Currently Selected:
Eby'abalevita 7: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
