Eby'abalevita 27
27
Enyongelera
1Omukama agambira Musa ati, 2“Ogambire Abaisiraeli oti, Orwo omuntu arakoraga ekiragano aha Mukama kumutambira omuntu kuhonderana n'emilengere yawe, 3aho omu emilengere egyo aha mushaija kwema ow'emyaka 20 kugoba ow'emyaka 60 zirabaga shekeli 50 z'efeza, kuhonderana n'eshekeli y'ahatakatifu. 4K'omuntu arashangwaga ali mukazi emilengere yawe zibe shekeli 30. 5K'omuntu arabaga ali w'okwema aha myaka etanu kugoba 20, emilengere yawe aha mushaija zibe shekeli 20, kandi k'ali mukazi zibe shekeli 10. 6K'omuntu arabaga ali w'okwema aha mwezi gumoi kugoba emyaka etanu, emilengere yawe aha mushaija zibe shekeli itanu z'efeza, kandi aha mukazi emilengere yawe zibe shekeli ishatu. 7K'omuntu arabaga ali w'emyaka 60 n'okutemba, aho emilengere yawe aha mushaija zibe shekeli 15, kandi aha mukazi zibe shekeli 10 z'efeza. 8Omuntu arashangwaga ali munaku muno kutashashura kwo walenga, aho alete omuntu omu maisho g'omukuhani, n'omukuhani amulenge eiguzi kuhonderana n'obushobora bwa kiragana.”
9“Kakiliba kili kitunganwa nk'eky'abantu bahongera Omukama, ekihongo kyona kyona ekyab'eki eky'omuntu wena wena ahongera Omukama kiba kitakatifu. 10Atalitaho kintu kindi aha mwanya gwakyo, anga kukihinga ekirungi aha mwanya gw'ekibi, anga ekibi aha mwanya gw'ekirungi. Kandi kayakuhingishanyia ekitunganwa n'ekindi, aho byombili kyonene n'ekyo yagonza kugarura birabaga bitakatifu. 11Kakirabaga kili kitunganwa ekihagare kitahongerwa Mukama kihongo, aho omuntu alete ekitunganwa omu maisho g'omukuhani. 12Omukuhani akilebe nka kili kirungi anga kibi; nk'okwo iwe omukuhani olikilenga nilyo liliba iguzi lyakyo. 13Kyonkai kayakuba nayenda kukichungura eiguzi alyongereho easilimia 20.”
14“K'omuntu arahongeraga Omukama enjuye, omukuhani agilebe nk'eli nungi anga mbi; nk'okwo omukuhani aligilenga nikwo eliba. 15Kigihonga kayakwenda kugichungura, agyongereho easilimia 20 z'eiguzi lyayo omu mahera, mara eliba ya wenene.”
16“K'omuntu arahongeraga Omukama ekichweka ky'ensi eli ya wenene agisikire, aho emilengere yawe eiganirane n'embibo yakubibwamu. Homeri y'embibo y'eshayiri elengwe aha shekeli 50 z'efeza. 17Kayakuhonga ensiye kwema aha mwaka gwa yubile, eiguzi ly'ensi egyo liliba nk'okwo olililenga. 18Kyonkai kayakuhonga ensiye yubile ehoiremu, aho omukuhani alenge eiguzi lyayo omu mahera kuhonderana n'emyaka esigaire kwija kugoba aha mwaka gwa yubile kandi omu milengere yawe omushaliremu. 19Kakihonga nsi yakwenda kugichungura, aho aha iguzi lyayo ayongereho easilimia 20 omu mahera, aho eikare eliye. 20Kyonkai k'aliba atenzire kugichungura, anga k'alishangwa ensi yagigulize omuntu ondijo, eliba etakichungurwa. 21Kyonkai orwo ensi yataishulirwa omuli yubile, eliba ehongeirwe Omukama; omukuhani agilye. 22K'alihongera Omukama endimiro ey'aguzire, etali kichweka kya nsiye ensikano, 23aho omukuhani alenge eiguzi lyayo kulemwa kugoba aha mwaka gwa yubile; omuntu ashashure eiguzi aha kir'ekyo, eiguzi elyo abe nilyo ahongera Omukama. 24Omu mwaka gwa yubile ensi egaruukire owo yaguzirweho, mukama wayo omu busika. 25Buli iguzi liganirane n'eshekeli y'ahatakatifu: eshekeli egire egera makumi gabili.”
26“Kyonkai omuzigaijo gw'ekitunganwa, orwo omuzigaijo guba gw'Omukama, omuntu tiyakuguhonga; ebe numi anga ntama, y'Omukama. 27Kakili kitunganwa ekihagare aho akichungulire aha milengere yawe, ashube akigelekeho easilimia 20 z'eiguzi lyakyo; anga kakitalikuchungurwa kiguzibwe nk'okwo omukuhani alikilenga.”
28“Kyonkai taliho kihongo eky'omuntu ahongera kimoi Omukama, kyona kyona omu bilibye, abe muntu anga kitunganwa, anga itakalye elisikano, kuguzibwa anga kuchungurwa. Buli ekyahongerwa Omukama kiba kitakatifu muno. 29Nangu n'omuntu ahongirwe atachungurwa bamwite.”
30“Egabo yona y'ebyezire, gwaba mwaka anga biraba bya miti, ekichweka kya ikumi ekyo ky'Omukama; mara kitakatifu. 31K'omuntu aligira egaboye akenda kugichungura, agyongereho easilimia 20 z'eiguzi lyayo. 32Kandi egabo yona erugire omu buhyo bw'ente n'omu buhyo bw'entaama, buli kitunganwa kya ikumi omuli bilinya ebilikubarwa omushumba kirabaga kitakatifu aha Mukama. 33Omuntu atalibaza nka kili kirungi anga kibi, nangu n'okukihingishanyia chei. Kayakukihingishanyia aho byombili kyonene n'ekyo yagonza kugarura birabaga bitakatifu; ekili kya 10 ekyo kitalichungurwa.”
34Egi niyo mihango ey'Omukama yahangiire Musa aha Ibanga lya Sinai kugambira Abaisiraeli.
Currently Selected:
Eby'abalevita 27: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
