Eby'abalevita 17
17
Obutakatifu bw'obwamba
1Omukama agambira Musa ati, 2“Ogambire Aroni n'abatabani n'Abaisiraeli bona, oti, Eki nikyo kigambo eky'Omukama yahanga: 3K'omuntu wena wena omw'ihanga lya Isiraeli araitaga enumi anga omwana gw'entama anga embuzi omu rusisira, anga akagitira enjai yarwo, 4atagilesire aha mulyango gw'Eihema ly'Omuterano, kugihongera Omukama omu maisho g'ekiikarokye, omuntu ogwo arakwatwaga entambara y'okwita; yaita, omuntu ogwo bamuchwe omu bantube. 5Egi nkomeeko: Abaisiraeli baletega ebitambo byabo ebyo baraitiraga omw'ishwa, babiletere Omukama, babiletere omukuhani aha mulyango gw'Eihema ly'Omuterano, babitire Omukama bili bitambo by'emilembe. 6Omukuhani ashaimulire alutare y'Omukama obwamba aha mulyango gw'Eihema ly'Omuterano, kandi ebishaju abyokye birugwemu akatachu akanshemelera Omukama. 7Kityo baraba batakitira bazimu bitambo, abazimu abo balikushambatikana nabo. Eki kirabaga kiragiro ahali bonene eirai lyona omu mizarwa yabo.”
8“Kandi obagambire oti, Omuntu wena wena omw'ihanga lya Isiraeli, anga omu bagenyi arabafurukiragamu, arahongaga ekihongo ky'okwokibwa anga ekitambo, 9atakilesire aha mulyango gw'Eihema ly'Omuterano kukitambira Omukama ogwo bamuchwe omu bantube.”
10“K'omuntu wena wena omw'ihanga lya Isiraeli, anga omugenyi arabafurukiragamu, k'alilyaho obwamba ndimukambatanisa obuso, mara muchwe omu bantube. 11Aha rw'okuba oburora bw'omubili buli omu bwamba, kandi mbubahaire ahali alutare kwatililira emyoyo yanyu; aha rw'okuba obwamba nibwo bwatililira, aha rw'enshonga bwina oburora. 12Aha rw'ekyo nagambira Abaisiraeli nti, Taliho muntu omuli inywe kulya bwamba, nangu n'omugenyi wena wena arabafurukiragamu nawe atabulya. 13Kutyo n'Omwisiraeli wena wena anga omufuruki arabafurukiragamu, arashangwaga ahigire akakwata ekigunju anga ekinyonyi ekyakulibwa, asheshe obwamba bwakyo amare abushweke n'eitaka.”
14“Oburora bwa buli kitondwa bwamba bwakyo. Aha rw'ekyo nagambira Abaisiraeli nti, Mutalilya bwamba bwa kitondwa kyona kyona, aha rw'okuba oburora bwa buli kitondwa bwamba bwakyo; wena wena alikabulya bamuchwe. 15Kandi wena wena alikalya ekyefeleire anga ekisirwe ekikaaka, yaba mutaka anga mufuruki afure emyendoye, ayoge, ashube aikare ahagaire kugoba bwaigoro; aho arabaga ayezire. 16Kyonkai k'aliba atafuzire myendoye anga kwoga alikara n'entambaraye.”
Currently Selected:
Eby'abalevita 17: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
