Yoshua 23
23
Ehotuba ya Yoshua narazage embaga
1Ebiro kabyabaire byahingwire bingi orwo Omukama yabaire yahaire Abaisiraeli emilembe batakirashana na babisha babo ababaire babataine, Yoshua akura agurusha. 2Ayeta Isiraeli yona: Abagurusi abebembezi, abaramuzi n'abakuru babo, abagambira ati, “Mbwenu nakura nagurusha. 3Kandi mukabona byona eby'Omukama Ruhanga wanyu yakoleire amahanga aga gona aha rwanyu, kuba n'iwe yabarashaniraga. 4Amahanga agakyasigaire munu ensi zago nzishondeire enganda zanyu obusika, kumoi n'ensi z'amahanga ago nasingire kwema Yorudani oburugaizoba kugoba aha Nyanja Mpango ya Mediterania obugwaizoba. 5Omukama Ruhanga wanyu alisinga ababisha banyu babairuke, mulye ensi yabo, nk'okwo yabaraganisize! 6Aha rw'ekyo mugume muno, mukwate mara mukore byona ebihandikirwe omu Mateka ga Musa. Amateka ago mutaliziza kugashobya. 7Amahanga aga agakyasigaire munu mutalyetaba nago orwo mulikutura nago. Baruhanga babo mutalibagamba mabara anga kunahira buso bwabo, anga kubakolera, anga kubafukamira. 8Ekikuru mwekwate Omukama Ruhanga wanyu nk'okwo mukakora na kir'eki. 9Aha rw'okuba Omukama akabinga amahanga gahango againa amani, kandi taliho muntu yashoboire kukwatangana na inywe na mambwenu. 10Omuntu omoi alibinga abantu 1,000, aha rw'enshonga Omukama Ruhanga wanyu n'iwe abarashanira nk'okwo yabaraganisize. 11Aha rw'ekyo mwelinde muno mugonze Omukama Ruhanga wanyu. 12Kamwakushuba enyuma mukaterana n'ensigalira z'amahanga aga agakyabasigairemu, mukasiigirana nago, mukashemera na bakazi babo na bonene bakashemera n'abanyu, 13mumanyire kimoi okwo Omukama Ruhanga wanyu ataligendelera kubinga mahanga mu nsi yanyu. Galibahindukira mutego, gababere mbarashuka, gahinduke nkoni y'okubatera embaju, gabe mahwa g'okubakoza omu maisho, mulemwe musilike omu nsi nungi egi ey'Omukama Ruhanga wanyu abatungire.”
14“Mbwenu akanya kagoba, naija kufa nk'abandi bona. Inywena buli omoi namanya aha mutima n'omu mwoyo okwo Omukama Ruhanga wanyu abatungire ebirungi byona ebyo yabaraganisize; bigobeleire byona ahali inywe, taliho na kimo ekibuzireho. 15Nk'okwo ebirungi byona eby'Omukama Ruhanga wanyu yabaraganisize bigobeleire ahali inywe, nikwo alibateza enaku zona hakabasilikya omu nsi nungi egi eyo yabatungire 16kamulichwa endaganoye eyo yabahangiire, mukagenda mukakolera baruhanga abandi, mukabafukamira nirwo alibanigalira muno, mukasilika bwangu omu nsi nungi eyo abatungire.”
Currently Selected:
Yoshua 23: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
