Yoshua 19

Ensi eyo Simeoni yagabiirwe

1Omushondo gwa kabili gukashohora guli gw'oruganda rwa Simeoni. Nk'okwo amahiga garwo gali, ensi yabo yagobaga omu y'oruganda rwa Yuda. 2Obusika bwabo bwinamu ebigo ebi: Beerisheba, Sheba, Molada; 3Hazarishuali, Bala, Ezemu; 4Elitoladi, Betuli, Horima; 5Zikilagi, Betimarikoboti, Hazarisusa; 6Betilebaoti na Sharuheni. Bigo ikumi na bishatu n'ebyaro byabyo. 7Hakaba haliho Aini, Rimoni, Eteri na Ashani. Bigo binai n'ebyaro byabyo. 8Omu hakaba halimu ebyaro byona ebyabaire byataine ebigo ebyo kugoba Baalatibeori, Rama eya Negebu. Obu nibwo bwabaire buli busika bw'oruganda rwa Simeoni nk'okwo amahiga gabo gali. 9Obusika bwabo bukaruga aha kichweka ky'ensi ya Yuda, aha rw'okuba omushondo gw'oruganda rwa Yuda gukaba guli guhango muno ahali bonene. Nikyo bashalirweho ekichweka kikatwarwa oruganda rwa Simeoni.

Ensi ezo Zebuluni yagabirwe

10Omushondo gwa kashatu gukashohora guli gwa baijukuru ba Zebuluni, nk'okwo amahiga gabo gali. Obusika bwabo nibugoba Saridi. 11Kandi orubibi rwabo nirugendera kimoi obugwaizoba kulemwa kugoba Marala, kukwata Dabesheti, rukagoba aha kaiga k'oburugaizoba bwa Yoneamu. 12Ruruga Saridi rugya rubaju orundi orw'oburugaizoba rugoba orubibi rwa Kisilotitabori; rushuba rugoba Daberati, aho rugendera kimoi Yafia. 13Rwema okwo rwolekera oburugaizoba rugoba Gatiheferi, rugya Etikazini, rushoholera Rimoni, ruhenda rugiire Nea. 14Aho ruzingora rubaju orwa bikara rugoba Hanatoni, rulekelera aha Ruhanga rwa Ifutaeli. 15Ensi y'oruganda rwa Zabuloni einamu Katati, Nahalali, Shimuroni, Idala na Betelehemu n'ebigo ebindi: Byona hamoi 12 n'ebyaro byabyo. 16Obu nibwo busika bwa baijukuru ba Zebuluni nk'okwo amahiga gabo gali: Ebigo ebi n'ebyaro byabyo.

Ensi eyo Isakari yagabiirwe

17Omushondo gwa kanai gukashohora guli gw'oruganda rwa Isakari, nk'okwo amahiga gabo gali. 18Ensi yabo ekaba einamu Yezireeli, Kesuloti, Shunemu, 19Hafaraimu, Shioni, Anaharati, 20Rabiti, Kishioni, Ebezi, 21Remeti, Enganimu, Enihada na Betipazezi. 22Orubibi nirugoba Tabori, Shahazuma na Betishemeshi. Nirulekelera Yorudani. Ebigo byayo byona hamoi 16 n'ebyaro byabyo. 23Obu nibwo busika bwa baijukuru ba Isakari nk'okwo amahiga gabo gali, ebigo n'ebyaro byabyo.

Ensi eyo Asheri yagabiirwe

24Omushondo gwa katanu gukashohora guli gw'oruganda rwa Asheri nk'okwo amahiga gabo gali. 25Ensi yabo ekaba einamu ebigo ebi: Helikati, Hali, Beteni, Akishafu, 26Alameleki, Amadi na Mishali. Obugwaizoba orubibi nirugoba Karimeli na Shihorilibunati. 27Aho ruzingora rwolekeire oburugaizoba rugiire Betidagoni, rugoba Zebuluni n'omu Ruhanga rwa Ifutaeli bwolekera bikara rugoba Betiemeki na Neyeli. Rushuba rugendera kimoi rugoba Kabuli rubaju orwa bikara, na 28Eburoni, Rehobu, Hamoni na Kana, rugoba Sidoni enkuru. 29Ruzingora rugiire Rama, rugoba ekigo kya Tiro eky'eboma, rumara ruhenda rwolekeire Hosa. Rulekelera aha Nyanja ya Mediterania. Ensi ya Asheri einamu ebigo 22, ebimoiho ni Mehebeli, Akizibu; 30Uma, Afeka na Rehobu n'ebyaro byabyo. 31Obu nibwo busika bwa baijukuru ba Asheri nk'okwo amahiga gabo gali, ebigo ebyo n'ebyaro byabyo.

Ensi eyo Nafutali yagabiirwe

32Omushondo gwa mukaga gukashohora guli gwa baijukuru ba Nafutali, nk'okwo amahiga gabo gali. 33Orubibi rwabo rwayemaga Helefu aha muti gw'omwaloni omuli Zananimu, Adaminekebu na Yabineeli rugoba Yakumu, rulekelera aha Mwiga gwa Yorudani. 34Aho orubibi ruhindukira obugwaizoba rugoba Azinotitabori rushuba rugendera kimoi rugoba Hukoki, na Zabuloni rubaju orwa kasi, na Asheri rubaju orw'obugwaizoba, na Yuda oburugaizoba bwa Yorudani. 35Ebigo ebiina eboma ni Zidimu, Zeri, Hamati, Rakati na Kinereti; 36Adama, Rama, Hazori; 37Kedeshi, Edirei, Enihazori; 38Yironi, Migidalieli, Horemu, Betanati na Betishemeshi. Ebigo 19 n'ebyaro byabyo. 39Obu nibwo busika bw'oruganda rwa Nafutali nk'okwo amahiga gabo gali, ebigo n'ebyaro byabyo.

Ensi eyo Dani yagabiirwe

40Omushondo gwa mushanju gukashohora guli gw'oruganda rwa baijukuru ba Dani nk'okwo amahiga gabo gali. 41Obusika bwabo bulimu Zora, Eshitaoli, Irishemeshi; 42Shaalabini, Aiyaloni na Itila; 43Eloni, Timuna, Ekironi; 44Eliteke, Gibetoni, Baalati; 45Yehudi, Beneberaki, Gatirimoni; 46Meyarikoni na Rakoni hamoi n'ensi elebangaine na Yopa. 47Orwo Abadani banyagirwe ensi yabo bagenda batera Leshemu. Kabamazire kukwata ekigo ekyo, abamwo babaisa embanda, aho bakituramu. Bakakyeta Dani, nibakyetelera Dani omugurusi wabo. 48Obu nibwo busika bwa baijukuru ba Dani nk'okwo amahiga gabo gali, ebigo ebi n'ebyaro byabyo.

Omugabo gw'enzindo

49Kabamazire kubegana ensi obusika, Abaisiraeli baha Yoshua eya Nuni ensi eye. 50Nk'okwo Omukama yabaire ahangire, bamuha Timunatisera ekigo ekyo yayenzire omu mabanga ga Efuraimu. Akyombeka bundi buhya akituramu.

51Eleazari omukuhani, Yoshua eya Nuni, n'abakuru b'amahiga g'enganda za Isiraeli bakagaba ensi egyo nibarasha enshoga kubaza Omukama omuli Shilo, aha kishasi ky'Eihema ly'Omuterano. Nikwo bamazire batyo okwata ensi.

Currently Selected:

Yoshua 19: RHAY01

Highlight

Copy

Compare