Yoshua 17

Obugwaizoba bwa Manase

1Ab'oruganda rwa Manase nabo bakahabwa ensi. Manase ogwo hakaba ali muzigaijo gwa Yozefu, kandi wenene nazigaija Makiri ishe Gileadi. Makiri bakamuha Gileadi na Bashani, kuba yabaga manzi y'endashana. 2Baijukuru ba Manase abandi, Manase eya Yozefu ni Abiezeri, Heleki, Asirieli, Shekemu, Heferi na Shemida. Nabo bakashonderwa ensi kuhonderana n'amahiga gabo.

3Kyonkai Zelofehadi eya Heferi, Heferi eya Gileadi, Gileadi eya Makiri, Makiri eya Manase, hakaba ataina bana bojo shana abaisiki bonkai. Aga nigo mabara g'abahara: Mala, Noa, Hogila, Milika na Tiriza. 4Baija ahali Eleazari omukuhani na Yoshua eya Nuni n'abebembezi, babagambira bati, “Omukama akahangira Yoshua kutuha ensi omu banyaruganda baitu.” Kityo abaha obusika omu banyaruganda babo nk'okwo Omukama yahangire. 5Nikwo Manase kuhabwa emishondo akagyongera ahali Gileadi na Bashani buseli bwa Yorudani; 6aha rw'okuba abaijukuru bona, na mukazi na mushaija bakahabwa obusika. Ensi ya Gileadi bakagishondera baijukuru ba Manase abasigaire.

7Ensi ya Manase neyema Asheri negoba Mikimeta oburugaizoba bwa Shekemu. Aho orubibi nirugendelera rubaju orwa kasi kulemwa kugoba omu banyansi ba Enitapua. 8Ensi eyabaire eyataine ekigo kya Tapua ekaba eli ya Manase. Kyonkai ekigo kyonene ekyabaire kili omu rubibi rwa Manase kikaba kili kya baijukuru ba Efuraimu. 9Orubibi rusoka rugiire aha Kaiga ka Kana. Ebigo eby'amagyaruguru rw'akaiga omugati y'ebigo bya Manase ebyo bya Efuraimu. Orubibi rwa Manase rugendelera amagyaruguru g'akaiga rulekelera aha nyanja. 10Ensi elikugoba kasi niyo ya Efuraimu n'eya bikara niyo ya Manase, enyanja nirwo rubibi. Bikara negoba Asheri; oburugaizoba negoba Isakari. 11Kandi omuli Isakari na Asheri, Manase hakaba aina Betisheani n'ebyaro byayo, na Ibuleamu n'ebyaro byayo, n'abanyansi ba Dori n'ebyaro byayo, n'abanyansi ba Taanaki n'ebyaro byayo, n'abanyansi ba Megido n'ebyaro byayo, ekigo kya kashatu ni Nafati. 12Kyonkai baijukuru ba Manase tibashoboire kutwara bigo ebyo, kuba Abakanaani bakaguma baikaire omu nsi egyo. 13Abaisiraeli bakagira amani kukoza Abakanaani emilimo y'obwiru, nawe tibababingiremu kimoi.

Efuraimu n'obugwaizoba bwa Manase

14Baijukuru ba Yozefu babaza Yoshua bati, “Kubaki obusika otuhaire omushondo gumoi okwo tuli ruganda ruhango enshonga Omukama akatuha omugisha?” 15Yoshua abahorora ati, “Inywe kamuraba muli ruganda ruhango mutembe mugye omu kibira, mutemelere ensi omu Baperezi n'Abarefai, orwo ensi y'amabanga ya Efuraimu elikufunda ahali inywe.” 16Baijukuru ba Yozefu bahorora bati, “Ensi y'amabanga telikutumara, kandi n'Abakanaani bona abatura omu nsi y'omuteleka, baina amagali g'ekyoma, abalikutura Betisheani n'ebyaro byayo n'abalikutura omu Ruhanga rwa Yezireeli.” 17Aho Yoshua agambira eka ya Yozefu: Aba Efuraimu n'aba Manase ati, “Muli ruganda ruhango kandi mwina obushobora bungi. Timuhabwe mushondo gumoi gwonkai; 18kyonkai ensi y'amabanga eraba yanyu, kuba n'orwo kili kibira mukitemelere, ensi egyo mugilye yona mubabingemu enshonga baina amagali g'ekyoma mara baina amani.”

Currently Selected:

Yoshua 17: RHAY01

Highlight

Copy

Compare