Abaramuzi 17
17
Baruhanga ba Mika
1Hakaba bhaliho omushaija w'omu mabanga ga Efuraimu eibaralye Mika. 2Agambira nyina ati, “Ebichweka by'efeza 1,100 ebyo bakwibire bikakugobya aha kuteega mara kandi wateega nimpulira, efeza n'inye nyinayo, n'inye nagitwete.” Nyina agamba ati, “Mwana wange, Omukama akutunge omugisha.” 3Agarulira nyina ebichweka by'efeza 1,100. Nyina agamba ati, “Efeza ningihongera Omukama. Nagitaishura, mwana wange ogiheshemu ekishushani. Mbwenu aha rw'ekyo efeza ningikugarulira.” 4Kityo orwo yagaruliire nyina amahera, nyina akwata ebichweka by'efeza bikumi bibili abiha omuhesi, abiheshamu ekishushani ky'efeza. Bakiteka omwa Mika. 5Omushaija ogwo Mika hakaba aina orwanga, akora efodi n'eterafimu ataho omoiho omu batabani aba mukuhaniwe. 6Omu biro ebyo hakaba hataliho mukama muli Isiraeli; buli muntu yakoraga okwo yayenda.
7Kandi hakaba bhaliho omusigazi wa Betelehemu omuli Yuda mara w'oruganda rwa Yuda, Mulevita mara afurukiireyo. 8Omusigazi ogwo aruga omu kigo kya Betelehemu omuli Yuda, kutura mbali yakuboine. Agoba omu mabanga ga Efuraimu omwa Mika. 9Mika amubaza ati, “Noruga nkahai?” Amuhorora ati, “Ndi Mulevita wa Betelehemu omuli Yuda, ninfurukira mbali ndabona.” 10Mika amugambira ati, “Oikare nanye, obe tata mara mukuhani wange. Ndakuha ebichweka 10 by'efeza omu mwaka, nkuhe n'ebijwaro n'ekyakulya.” 11Omulevita asanirwa kutura n'omushaija ogwo Mika. Omusigazi ogwo ahali Mika amushusira omutabani. 12Mika akwasa Omulevita ogwo omwoga; aba mukuhaniwe, atura omwe. 13Aho Mika agamba ati, “Mbwenu namanya okw'Omukama arangoshora orwo nagira omukuhani Omulevita.”
Currently Selected:
Abaramuzi 17: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
