Esita(Hebrew) 2
2
Esita naba muk'Omukama
1Ebyo kabyabaire byahoire, Omukama Ahasuero akatukuruguka, aijuka Vashiti n'ebyo yakozire n'eiramu elyo bamutaireho. 2Aho abaramata b'Omukama abamukoleraga bagamba bati, “Mukama bakuhigire abaisiki bato abarungi. 3Oteho abakuru omu mikoa y'engoma yawe bashombokye abaisiki bato bona abarungi, babalete omu nju y'abakazi omu kigo kya Susa. Babakwase Hegai omukobe w'Omukama alinda abakazi. Babahe amajuta gabo g'okwesiiga. 4Omwisiki arakushemelera, abe muk'Omukama aha mwanya gwa Vashiti.” Ekigambo eki kishemelera Omukama Ahasuero, akora atyo.
5Omu kigo kya Susa hakaba halimu Omuyahudi eibaralye Moridekai, mutabani wa Yairi, Yairi eya Shimei, Shimei eya Kishi, Omubenjamini. 6Ogwo akaba arugire Yerusalemu atwalirainwe omu ndore ezatwalirainwe n'Omukama Yekonia owa Yuda; owo Nebukadineza Omukama wa Babiloni yabaire atwete endore. 7Moridekai niwe yabaire alezire Hadasa, Hadasa ayayetwaga Esita. Akaba ali munyanya nazarwa ishento. Esita akaba ataina ishe anga nyina. Omwisiki akaba ali murungi mara ayemirege. Kyonkai orwo ishe na nyina bafire, Moridekai yamulera nk'omuhara. 8Orwo barangire ekiragiro ky'Omukama n'omukugwe, bahikanisiza abaisiki bangi omu kigo kikuru kya Susa, babakwasa Hegai omukobe. Na Esita kwakwo bamuleta omu kikaare ky'Omukama bamara bamukwasa Hegai omukobe ayalindaga abakazi. 9Omwisiki ogwo ashemelera Hegai, amuganja; arahuka amuha amajuta g'okwesiiga, amuha n'omugabogwe gw'ebyakulya. Amuha n'abazana mushanju, abaronda omu kikaare ky'Omukama. Wenene n'abazanabe abaha n'omwanya gurungi omu nju y'abakazi. 10Esita akaba atagambire ihangalye anga rugandarwe, kuba Moridekai akaba amutangire. 11Buli kiro Moridekai yarabaga nyakabuga y'enju y'abakazi kumanya emiralire ya Esita n'okwo ali.
12Abaisiki bamaraga omwaka gwona nibelengya: Nibesiiga amajuta ga mira omu myezi mukaga, kandi emyezi mukaga endijo nibesiiga amajuta g'omugaju. Aho nirwo buli mwisiki yagoberwaga ezamuye, bakamutwalira Omukama Ahasuero. 13Orwo omwisiki yagyaga kutaha omw'Omukama, yahabwaga buli kantu omu nju y'abakazi ako yayendaga kugenda nako omu kikaare. 14Yagendaga bwaigoro narugayo bwankya nataha omu nju endijo ey'abakazi eyalindwaga Shashigazi, omukobe w'Omukama ayalindaga ensholeke. Tiyatahaga rundi mwa mukama shana Omukama kayakumushemeleirwe, akagira ati, “Munyetere nanka.”
15Orwo Esita yagobeirwe kugya ow'Omukama, Esita ogwo muhara wa Abihaili, Abihaili ishento Moridekai, Esita owo Moridekai yabaire alezire nk'omuhara, tiyayenzire kantu shana ebyo yategekeirwe Hegai omukobe w'Omukama ayalindaga abakazi. Esita yasiimwaga buli omoi ayamubonaga. 16Orwo bamutwaliire Omukama Ahasuero omu kikaare, omu mwezi gwa ikumi, omwezi ogwetwa Tebeti, omu mwaka gwa mushanju Ahasuero atwete, 17Omukama agonza Esita kukira abakazi bona, amushemelera, amuganja kushaga abaisiki bona; nangu amujweka n'orukinga aha mutwe, amuhindura muk'Omukama aha mwanya gwa Vashiti. 18Aho Omukama akolera abatwazi n'abaramatabe bona obugenyi buhango, bukaba buli bugenyi bwa Esita. Kandi ashuba aihyaho omushoro#2:18 Omushoro Ebihandiko ebindi biti ekiro ky'okuhumura. omu mikoa, atunga abantube nk'okw'Omukama agira.
Moridekai narokora oburora bw'Omukama
19Orwo bahikanisize abaisiki elya kabili, Moridekai akaba ashuntamire aha kihigi ky'Omukama. 20Esita akaba atakagambaga rugandarwe anga ihangalye, kuba nikwo Moridekai yabaire amukomeleize; nobona Esita yahuliraga Moridekai kuba niwe yabaire amulezire. 21Omu biro ebyo, Moridekai kayabaire ashuntamire aha kihigi ky'Omukama, Bigita na Tereshi, abakobe b'Omukama ababili ababaire bali bakumilizi b'ekihigi, banigara, bagonza kwita Omukama Ahasuero. 22Moridekai aija akimanya, akigambira Esita muk'Omukama, na Esita akigambira Omukama omw'ibara lya Moridekai. 23Kababaliliize ekigambo ekyo bakashanga kilikwo, abashaija abo bombili babahanika aha muti. Ekigambo ekyo kihandikwa omu Kitabo ky'Amakiro, omu mabona g'Omukama.
Ruhaya DC Bible © Bible Society of Tanzania, 2001.