Obwijukiro 9

Obutahulira bwa Isiraeli

1“Hulira iwe Isiraeli, kir'eki nimwija kushabuka Yorudani kunyaga amahanga agahango mara ag'amani kubashaga, ebigo ebihango ebizitirwe eboma ziraizirai. 2Abantu aba bahango baraibarai; nibetwa Baanaki. Nimubamanya. Murabahuliire eiranga bati, ‘N'ohai ayakwemera Abaanaki?’ 3Aha rw'ekyo kir'eki mumanye okwo alikukwebembera nk'omuliro gulikurabagira niwe Mukama Ruhanga wanyu. Alisilikya ababisha banyu abakonkomye orwo mulikutaha omu nsi egyo. Aho mulibabinga mubasilikye bwangu bwangu, nk'okwo Omukama yabaraganisize.”

4“Orwo Omukama Ruhanga wanyu aliba yababingire nimutaha omu nsi y'endagano mutalitekeleza muti, ‘Omukama atulesire kulya ensi egi aha rw'enshonga y'oburungi bwaitu.’ Omukama alibabinga nimutaha omu nsi egyo aha rw'enshonga y'amahanga ago gonene kuba gabi. 5Timulikugya kulya nsi yabo aha rw'enshonga muli bantu barungi abahikilire. Omukama Ruhanga nabinga amahanga ago omu nsi egyo orwo mulikugitahamu aha rw'okuba mahanga gabi. Kandi nagonza kuguma aha kigambo ekyo yanahiliire baisheinywe Aburahamu, Isaka na Yakobo.”

6“Aha rw'ekyo mumanye okwo Omukama Ruhanga wanyu talikubaha nsi nungi egi kamugilya aha rw'enshonga y'oburungi bwanyu; muli ihanga elyeleme. 7Mwijuke mara mutebwa okwo mwanigaize Omukama Ruhanga wanyu omw'irungu. Kwema kiro ekyo mwarugire Misiri kulemwa kugoba aha mwanya ogu, mukamushenga. 8Nangu n'ahali Horebu mukamunigaza yagoba aha kwenda kubasilikya. 9Orwo natembire aha ibanga kutora embengo z'amabare ez'endagano ez'Omukama yakozire nainywe, nkaikarayo ebiro makumi ganai nyemishana n'ekiro. Tinaliire kyakulya anga kunywa maizi. 10Omukama akampa embengo ibili z'amabare ezihandikisiibweho orukumurwe. Zikaba zinaho ebigambo byona eby'Omukama yafumoire nainywe aha ibanga ayemeleire omu muliro kiro ekyo mwahurura. 11Aha nzindo y'emishana 40 n'ebiro 40 akampa embengo ibili z'amabare ez'endagano. 12Aho angambira ati, ‘Imuka, ruga hanu, osongoke bwangu aha rw'okuba abantu bawe ab'oihire Misiri bahemuka. Ebyo nabaragiire kukora babirugireho; bahesha ekishushani.’ ”

13“Kandi Omukama akashuba yangambira ati, ‘Naboine okwo abantu aba baina elyeleme. 14Ondeke mbasilikye, mbachwe omu nsi. Kandi iwe ndakuhindura ntabuko y'eihanga elina amani mara elihango kubashaga.’ 15Aho nkakwata omuhanda nasongoka eibanga elilikwaka omuliro, n'embengo z'amabare zombili zikaba zindi omu mikono yombili. 16Ndeeba, mbona okwo mwafakalira Omukama Ruhanga wanyu, mukahesha enyana, mwarugire aha byo yabaire abaragiire kukora. 17Aha rw'ekyo nkuntura embengo zombili, zinduga omu mikono, nzibatira omu maisho. 18Aho ngwa ahansi njumaire omu maisho g'Omukama nk'orwa mbere, ebiro 40 ekiro n'omushana; tinaliire kyakulya anga kunywa maizi aha rw'emafu ganyu ago mwakozire, orwo mwahenire omu maisho g'Omukama kumunigaza. 19Okugira ntyo nkatina. Kuba Omukama akagira ekiniga yabatamwa muno nangu yagoba n'aha kwenda kubasilikya. Kyonkai n'eli akampulira. 20Akanigalira Aroni yagoba aha kwenda kumwita, kyonkai omu kanya konene ako, Aroni nawe nkamushabira. 21Aho nkwata ekinyamugenge kyanyu, enyana eyo mwabaire muhesire, ngyokya n'omuliro ngishekenyura, ngisa ngisasanura eba chuchu. Echuchu yayo nkaginaga omu kaiga akabaire nikaruga omw'ibanga.”

22“Kwakwo n'ahali Tabera na Masa na Kiburotihataava mukanigaza Omukama. 23Kandi orwo yabaragiire kuruga Kadeshibarinea nagamba ati, ‘Mugende mulye ensi eyo mbahaire,’ n'aho aho mukamushenga mwayanga kuhulira ebyo yabaragiire. 24Kwema kiro ekyo nabamanyiireho mutura nimushenga Omukama.”

25“Kityo nkajumara ahansi omu maisho g'Omukama ebiro ebi makumi ganai, nyemishana n'ekiro, aha rw'okuba akaba agambire kubasilikya. 26Mushaba nti, ‘Waitu Mukama Ruhanga, otaita bantu bawe endonkwa zawe ab'ochungwize obukuru bwawe, ab'oihire Misiri n'obushobora bungi. 27Ijuka abairu bawe Aburahamu, Isaka na Yakobo. Otaleba bugumangani bwa bantu aba, anga obubi bwabo, anga obufu bwabo.’ 28Kitali kityo Abamisiri baragira bati, ‘Omukama tashoboire kubatahya mu nsi eyo yabaraganisize. Abatwete kubaitira omw'irungu aha rw'okuba abaire nabanoba. 29Abantu aba baba ndonkwa zawe, okabaihya Misiri n'obushobora bungi n'amani.’ ”

Currently Selected:

Obwijukiro 9: RHAY01

Highlight

Copy

Compare