2 Samweli 6

Esanduku y'Endagano nibagitwara Yerusalemu

1Daudi ashuba ahuruza abaisherukare bona ba Isiraeli 30,000. 2Agya Baala eya Yuda n'abantu bona abo yabaire ainabo kwihyayo Esanduku ya Ruhanga eyetwa eibara ly'Omukama w'amahe abandaire aha bakerubi. 3Bagiteka omu gali empya, bagihya omwa Abinadabu aha ibanga. Uza na Ahio batabani ba Abinadabu, nibo babaire nibabuga egali empya egyo eyabaire 4eliho Esanduku ya Ruhanga, kyonkai Ahio nagenda agyebembeire. 5Daudi n'eihanga lyona lya Isiraeli bakaba nibashemelerwa omu maisho g'Omukama n'amani gabo gona, nibazina, nibatera eningili, enanga n'obudiika, nibachunda enyimba n'ez'amayebe.

6Orwo bagobire aha kyano kya Nakoni, ente zitelera, aho Uza aimukya omukono akwata Esanduku ya Ruhanga. 7Omukama amukwatirwa ekiniga kingi, amutera amutura okwimukya omukono akakwata Esanduku; agw'aho. 8Daudi akashasha muno kubona okw'Omukama yanigalira kubi Uza. Nikwo omwanya ogwo kugweta Peresiuza na mwaha. 9Kir'ekyo Daudi atina Omukama mara agamba ati, “Esanduku y'Omukama eraija etai omwange?” 10Akaba atakigitwara mu kigo kya Daudi. Akagikubura yagitwara omwa Obediedomu, Omugiti, 11yamaramu emyezi eshatu, Omukama y'aha Obediedomu n'ekaye yona omugisha.

12Omukama Daudi bamugambira bati, “Omukama ahaire omugisha eka ya Obediedomu n'ebye byona aha rw'Esanduku ya Ruhanga.” Agenda agihyamu agitwara n'ebyera omu Kigo kya Daudi. 13Orwo ababaire bashutwire Esanduku y'Omukama bagenzireho ebita mukaga, Daudi atamba ekitambo ky'ente n'enyana egomokire. 14Azana omu maisho g'Omukama n'amanige gona; mara hakaba ayekomire efodi ya kitani. 15Daudi n'eihanga lyona lya Isiraeli bagitembya nibaashana, nibatera amakondere.

16Orwo Esanduku y'Omukama yatahire omu kigo kya Daudi, Mikali muhara wa Shauli alebera omw'idirisha, abona Omukama Daudi naguraguruka, nazana omu maisho g'Omukama; amugaya aha mutimagwe. 17Bagitahya omw'ihema elyo Daudi yabaire agiteleire. Aho atambira Omukama ebitambo by'okwokibwa n'eby'emilembe. 18Kayamazire kutamba ebitambo ebyo, aha abantu omugisha omw'ibara ly'Omukama w'amahe, 19mara embaga yona ya Isiraeli, omushaija n'omukazi, abaha buli omoi omukate gw'engano n'ogw'ezabibu, abaha n'enyama. Aho buli muntu ashuba owe.

20Ahanyuma Daudi agaruka omuka kushuliza ekaye. Mikali muhara wa Shauli aturuka kumwakilira, agamba ati, “Omukama wa Isiraeli yayekunira atai mbwenu, kuba nk'omufera akajuulira abazanabe n'abairube, akaburwa enshoni!” 21Daudi amuhorora ati, “Byaba bityo omu maisho g'Omukama ayandonzire aha mwanya gwa sho n'ekaye yona, yantaho kwebembera Isiraeli, abantube. Orw'ekyo Omukama ndamuzinira. 22Ndayelengaza kushagaho, mbe muroorwa ahali iwe, kyonkai abazana abo abo wagamba barankunira.” 23Mikali akalemwa yafa atazaire mwana.

Currently Selected:

2 Samweli 6: RHAY01

Highlight

Copy

Compare