2 Samweli 4

Okwitwa kwa Ishibosheti

1Orwo Ishibosheti eya Shauli yahulire okwo Abuneri agwire Heburoni, amani gamuhwa, na Isiraeli yona etina. 2Wenene ogu mutabani wa Shauli hakaba aina abantu babili ababaire bali bakuru b'abashuga. Omoi eibaralye ni Baana, ondijo ni Rekabu. Bombili ni batabani ba Rimoni Omubenjamini wa Beroti. (Beroti nakyo kigo ekibalirwa ahali Benjamini. 3Abantu bamwo bakairukira Gitaimu; mara kugoba na mwaha bakikaramu nk'abafuruki.)

4Yonatani eya Shauli hakaba aina omutabani ayabaire alemaire amaguru, nayetwa Mefibosheti. Shauli na Yonatani kwitwa hakaba aina emyaka etanu. Orwo amakuru garugire Yezireeli okwo Shauli na Yonatani batakili, omuleziwe amushutura airuka nawe amukuntura ahansi, alemara.

5Aho Rekabu na Baana batabani ba Rimoni Omubeeroti, baimukya omu mushana eihangwe bagoba omwa Ishibosheti, bamushanga ahumwireho. 6Bataha omu nju omunda nk'abalikuhiga engano bamuchumita orubunda, bashuba bairuka. 7Bakataha omu nju orwo yabaire abyamire aha kitanda omu kitabokye, bamuchumita bamwita, bamutemaho omutwe. Bagutwara, baraba omuhanda gwa Araba ekiro kyona, 8bagutwalira Daudi omuli Heburoni. Bamugambira bati, “Leba omutwe gwa Ishibosheti mutabani wa Shauli, omubisha wawe ayahigaga kukwita. Kir'eki Omukama yayehoroza Shauli na baijukurube aha rw'Omukama Rugaba rwaitu.” 9Kyonkai Daudi ahorora Rekabu n'omurumuna Baana batabani ba Rimoni Omubeeroti ati, “Obuso bw'Omukama ayanchungwire omu naku zona, 10orwo omuntu yangambire ati, ‘Leba Shauli yafa,’ amanyire nandetera amakuru garungi, nkamukwata namwitira Sikilagi, namurongora ntyo aha rw'amakuru goyandeteire. 11Mbwenu lero inywe babi abaitira omuntu omurungi omwe aha kitanda? Nimbaita nimbachwa omu nsi.” 12Aho aragira abaisherukare babaita, babatemaho emikono n'amaguru, babahanika Heburoni bwatana aha rutunga. Kandi omutwe gwa Ishibosheti bagukwata nagwo baguziika Heburoni omu nziiko ya Abuneri.

Currently Selected:

2 Samweli 4: RHAY01

Highlight

Copy

Compare