2 Samweli 24
24
Daudi nabara abantu
(1Ma 21:1-27)
1Omukama Ruhanga akashuba yagilira Isiraeli ekiniga. Akarahura Daudi kubaletera enaku, yamugira ati, “Ogende obare Abaisiraeli n'aba Yuda.” 2Aho Omukama Daudi agambira Yoabu n'abakuru b'eihe abo yabaire ainabo ati, “Ogende orabe omu nganda zona za Isiraeli, oyeme Dani ogobe Beerisheba obare abantu, manye orubara rwabo.” 3Yoabu amugambira ati, “Omukama Ruhanga wawe ayongere aha bantu okukira okwo bali emirundi 100, mara naiwe ekyo okyebonere. Nabo kubaki nogonza kubara abantu aba?” 4Kyonkai ekigambo ky'Omukama Daudi kikiza ebya Yoabu n'abakuru b'eihe amani. Aho Yoabu n'abakuru b'eihe baruga omu maisho g'Omukama bagya kubara Abaisiraeli. 5Bashabuka Yorudani, bema Aroeri obulyo bw'ekigo omugati y'oruhanga rwa Gadi bolekera Yazeri. 6Bagoba Gileadi na Kadeshi omu nsi y'Abafilisiti, bagoba na Dani; kuruga Dani bazingora kugoba Sidoni; 7bataha omu boma ya Tiro n'omu bigo byona by'Abahivi n'Abakanaani. Bashohora bagya Negebu eya Yuda omuli Beerisheba. 8Aho kababaire barabire omu nsi yona bagaruka Yerusalemu bamazire emyezi mwenda n'ebiro makumi gabili. 9Yoabu aha Omukama orubara rw'abantu. Omuli Isiraeli hakaba halimu abashaija barashana 800,000, kandi omuli Yuda bakaba bali 500,000.
10Daudi kayamazire kubara embaga enkorantima emutera. Agambira Omukama Ruhanga ati, “Nfakaire muno aha rw'ekyo nkozire. Kyonkai mbwenu waitu Mukama, ninkushaba onganyire obufu bwange, aha rw'enshonga mbaire mufera muno.” 11Orwo yaimukire bwankya, Omukama agambira omurangi Gadi, (niwe yabaire ali kaboniwe) ati, 12“Ogende ogambire Daudi oti, ‘Omukama nagamba ati: Inye ninkuteraho ebintu bishatu; omuli ebyo orondeho kimoi nkikukolere.’ ” 13Aho Gadi aija ahali Daudi amugambira ati, “Oizirwe emyaka eshatu y'eifa omu nsi yawe, anga oiruke omubisha wawe emyezi eshatu, anga habeho ebiro bishatu by'ekibundo omu nsi yawe? Mbwenu tekeleza olebe ekyo ndahorora antumire.” 14Aho Daudi agambira Gadi ati, “Nashoberwa muno; hakili Omukama atweitire, okuba obuganyizibwe bungi; ntaitwa muntu.”
15Aho Omukama Ruhanga ateza Abaisiraeli ekibundo kwema bwankya kugoba aha kanya ako yabaire ayenzire. Kwema Dani kuturuka Beerisheba bakafa abantu 70,000. 16Omumalaika kayaimukize omukono agwolekeize Yerusalemu kugisilikya, Omukama ayeiza kutakora atyo; agambira omumalaika ayabaire naita abantu ati, “Ekyo nikimara; mbwenu gwisa omukono.” Omumalaika ogwo w'Omukama hakaba ali aha kyano kya Arauna, Omuyebusi. 17Aho Daudi orwo yaboine omumalaika ayabaire naita abantu, agambira Omukama ati, “N'inye nfakaire nkakora entambara; kyonkai entaama ezi zikozireki? Ninkushaba obonabonyie inye n'eka yange.”
Ekibundo nikiizibwa ekitambo
18Kir'ekyo Gadi aija ahali Daudi amugambira ati, “Ogende oyombekere Omukama ealutare aha kyano kya Arauna Omuyebusi.” 19Daudi agenda nk'okwo Omukama yamuragiire omu kanwa ka Gadi. 20Arauna kugya kunaga amaisho abona Omukama Daudi n'abaramatabe nibaija mbali ali. Aturuka, abandama omu maisho g'Omukama Daudi agoba aha itaka. 21Abaza Omukama Daudi ati, “Ekyakuleta mbali oli, Rugaba Mukama wange, kiki?” Daudi agamba ati, “Kukuguraho ekyano nkombekeraho Omukama ealutare, kwiza ekibundo kikaruga omu bantu.” 22Arauna amushubamu ati, “Rugaba Mukama wange, twara eky'olikwenda kyona okihonge; ente z'ekitambo ky'okwokibwa niz'ezi; ebikwato by'ekyano n'enkomo z'ente mubihyemu enkwi. 23Waitu ebi nabikuha byona. Omukama Ruhanga wawe asinge akwikilize.” 24Kyonkai Omukama Daudi amugambira ati, “Chei, ebyo mbikugureho nk'okwo eiguzi lyabyo lisaine; tindikwija kutambira Mukama Ruhanga wange kitambo kya kwokibwa ekyo ntagiliire kantu.” Aho Daudi agura ahali Arauna ekyano n'ente eshekeli z'efeza 50. 25Ayombekeraho Omukama Ruhanga ealutare, atamba ebitambo by'okwokibwa n'eby'emilembe. Omukama Ruhanga ahulira okutaka kw'abantu, Isiraeli agihyaho ekibundo, akiiza.
Currently Selected:
2 Samweli 24: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
