2 Samweli 15

Abusalomu nashenga Daudi

1Ahanyuma Abusalomu ataho egali n'efarasi n'abashaija 50 kugenda bamwebembeire. 2Kandi yaimukaga karai ayemelera aha rubaju rw'ekihigi. K'omuntu yakubaire aina omushango nagya ow'Omukama kuramurwa, Abusalomu amweta amubaza ati, “Iwe noruga kigoki?” Ogu amuhorora ati, “Ndi w'oruganda nanka omuli Isiraeli.” 3Aho Abusalomu amugambira ati, “Omushango gwawe gurungi mara guli aha mazima; kyonkai Omukama taliho w'agusigire kuguhuliliza.” 4Ashuba ayeyongera kugamba ati, “Kubasi ndi muramuzi omu nsi egi! Aho buli muntu aina omushango anga ekigambo yakwizire ahali inye, omushangogwe nguramurage.” 5Buli muntu ayamugobaga kumuramya, Abusalomu aimukya omukono amukwata, amunywegera. 6Nikwo yagiraga Abaisiraeli bona ababaga nibagya ow'Omukama kuramurwa; nikwo yanyurwire atyo Abaisiraeli rubaju orwe.

7K'emyaka yabaire yakya enai#15:7 Enai Negamba emyaka ganai., Abusalomu agambira Omukama Daudi ati, “Ninshaba ngende Heburoni ngobesheleze ekiragano kyange ekyo naraganisize Omukama. 8Orwo nabaire nintura Geshuri omuli Aramu nkaragana nti, ‘K'Omukama alingarurakwo Yerusalemu, ndimufukamira.’ ” 9Omukama Daudi amugambira ati, “Genda n'emilembe.” Aho aimukya agenda Heburoni. 10Kyonkai atuma abanyomozi omu nganda zona za Isiraeli ati, “Orwo murahulira muti enzamba, mugambe muti, ‘Abusalomu yaba Mukama omuli Heburoni!’ ” 11Ashuba wenene aruga Yerusalemu n'abashaija 200 abo yayesire, kyonkai bafa gagenda, batainayo kyo balikumanya. 12Ahanyuma Abusalomu kayabaire akyatamba ekitambo, atuma kweta Ahitofeli, Omugiloni, omuhanuzi wa Daudi omu kigo ky'owabo Gilo. Aho obushengi bugira amani, n'abantu beyongera kukanya orubaju rwa Abusalomu.

Daudi nairuka Abusalomu

13Entumwa egoba Daudi emugambira eti, “Abaisiraeli bagweleire rubaju orwa Abusalomu.” 14Nikwo Daudi kugambira abaramatabe abo yabaire ainabo Yerusalemu ati, “Imuka twiruke, kuba titukire ahali Abusalomu. Mwanguhe tugende atakwija akatubunda tutetegeire, akatuteza enaku n'abantu omu kigo hakabaisa embanda.” 15Abaramatabe bamugambira bati, “Ichwe twayetekatekire kukora kyona kyona eky'oraramura.” 16Aho Omukama ashohora n'ekaye yona emuhondeire, shana akasigamu ensholeke 10 kumulindira enju. 17N'abantube bamuhondera bona, bagya bemelera aha nju y'enzindo. 18Abaramatabe bamuhinguraho Abakereti bona, Abapeleti bona n'Abagiti bona; bona hamoi bantu 600 abarugire Gati bamuhondeire, nabo bamuraba omu maisho.

19Aho Omukama abaza Itai Omugiti ati, “Kubaki naiwe nogenda naichwe? Shubayo oikare n'Omukama muhya, kuba oli munyamahanga mara bakakubinga owanyu. 20Oizire juba, nshube nkujenjeze ntalikumanya na mbali ndikugya? Oshubeyo, n'abawe oshubeyo nabo; Omukama akugilire obuganyizi n'obwesigwa.” 21Kyonkai Itai amuhorora ati, “Mwoyo gwawe, Rugaba Mukama wange, hona hona mbali oragya niyo ndagya, kandaba ninfa nfe.” 22Daudi amugambira ati, “Aho iroko hingura.” Itai ahingura hamoi n'abashaijabe bona n'abana bona abo yabaire ainabo. 23Abantu bakalira muno kubona Daudi n'abamuhondeire nibasingwa. Omukama ashabuka Akaiga ka Kidironi, n'abantu bona bashabuka bakwete muhanda ogw'eirungu.

24Abiatari aija, Zadoki nawe aija n'Abalevita bona bashutwire Esanduku y'Endagano ya Ruhanga. Esanduku bagihumuza ahansi, kuhika abantu bona orwo barugire omu kigo. 25Aho Omukama Daudi agambira Zadoki ati, “Esanduku ya Ruhanga ogigarure omu kigo. K'Omukama Ruhanga alinsingira alingarura ngibone, mbone na mbali eliba etwire. 26Kyonkai k'araba atansingiire, ninyikiliza ankore nk'okwo alikwenda.” 27Ashuba agambira Zadoki omukuhani ati, “Leba iwe na Abiatari mugaruke omu kigo n'emilembe hamoi na batabani banyu bombili, Ahimaazi mutabani wawe na Yonatani mutabani wa Abiatari. 28Inye ndalindira aha bushabukiro bw'okugya omw'irungu kuhika orwo murantumaho kummanyisa.” 29Aho Zadoki na Abiatari bagarura Esanduku y'Endagano Yerusalemu; mara baikarayo.

30Daudi atemba eibanga ly'emizeituni amaguru gali bushai, ayebunzire omutwe nalira. Abo yabaire ainabo bona bayebunda emitwe batemba eibanga nibalira. 31Bamugambira bati, “Ahitofeli nawe ashengire na Abusalomu.” Daudi agamba ati, “Waitu Mukama, ninkushaba ebyo Ahitofeli arahanuura bitagasha kantu.”

32Orwo Daudi yagobire aha ibanga eiguru mbali bafukamira Ruhanga, Hushai Omwariki aija kumutanganwa, ekijwarokye kitemwirwe n'eitaka limuli omu mutwe. 33Daudi amugambira ati, “Katuragenda hamoi noija kundema iwe. 34Kandi k'oragaruka omu kigo okagambira Abusalomu oti, ‘Waitu Mukama, ndaba mwiru wawe nk'okwo mbaire ndi mwiru wa sho kwema karai,’ aho oranyitira enama za Ahitofeli. 35Leba oinayo Zadoki na Abiatari abakuhani. Aho kyona kyona eky'orahulira omu kikaare ky'Omukama, okigambire bonene abakuhani. 36Baina batabani babo bombili: Ahimaazi eya Zadoki na Yonatani eya Abiatari; abo nibo murantumaho kungambira ebyo muraba muhuliire byona.” 37Hushai munywanyi wa Daudi agya atyo omu kigo, ashanga Abusalomu nataha Yerusalemu.

Currently Selected:

2 Samweli 15: RHAY01

Highlight

Copy

Compare