1 Samweli 9

Shauli nabuganganwa Samweli

1Hakaba haliyo Omubenjamini omoi eibaralye Kishi, mutabani wa Abieli, Abieli eya Zerori, Zerori eya Bekorati, Bekorati eya Afiha, Omubenjamini, omushaija w'amani emanzi. 2Kishi akaba aina omutabani eibaralye Shauli, Shauli ali musigazi murungi. Omu Baisiraeli hakaba athalimu muntu murungi kumushaga. Kwema aha mabegage kugya eiguru akaba ali murai, nashaga abantu bona.

3Endogobe za Kishi, ishe Shauli kazabuzire, Kishi agambira Shauli omutabani ati, “Okwate omwiru omoi ogende ohige endogobe.” 4Baraba omu mabanga ga Efuraimu, n'omu nsi ya Shalisha, kyonkai tibaziboine. Baraba omu nsi ya Shahalimu, nayo zikaba zithaliyo. Aho baraba omu nsi ya Benjamini, namwo tibaziboinemu.

5Kabaizire omu nsi ya Sufu, Shauli agambira omwiru owo yabaire ainawe ati, “Tushube omuka, tata atakurubuukwa ndogobe akahangarwa ichwe.” 6Kyonkai omwiru amugambira ati, “Leba, omu kigo eki bhalimu omushaija wa Ruhanga, mara nakunirwa. Kyona kyona eky'agamba kibakwo. Mbwenu tumugyeho, shana yakutumanyisa mbali twakushanga endogobe ezitwimukize.” 7Shauli amugarukamu ati, “Isi katuragenda omushaija tumutwalireki, aha rw'okuba omu mifuko yaitu ekyakulya kyahoiremu, mara titukina kyakutwalira mushaija ogu wa Ruhanga. Twinaki?” 8Omwiru amushubamu ati, “Leba nyina esarafu nke y'efeza omu ngaro zange, ndagimuha, atushoborore mbali twakushanga endogobe zotulikuhiga.” 9Eirai omuli Isiraeli, omuntu kayagyaga kubaza Ruhanga yagambaga ati, “Ija tugye owa kaboni.” Eirai omurangi owa mbwenu bamwetaga kaboni. 10Aho Shauli agambira omwiruwe ati, “Wagambage, ija tugende.” Bagenda omu kigo mbali omushaija wa Ruhanga yabaire ali.

11Kababaire nibatemba omu kabanga k'ekigo, batanganwa abaisiki nibashohora kugya kutaha amaizi, bababaza bati, “Munu bhalimu kaboni?” 12Babahorora bati, “Alimu, leba ngugwo omu maisho. Yanguha, omu kigo yaijamu mbwenu, aha rw'okuba abantu nibaija kutamba ekitambo aha rushozi. 13Kamurataha muti omu kigo aho n'aho muramubona, atakagiire aha rushozi kulya. Abantu tibakulya atakagobire, aha rw'okuba wenene niwe aha ekitambo omugisha, aho nirwo abaralizibwa balya. Mugende mbwenu aha, nirwo muramubona aho honkai.” 14Aho bagya omu kigo. Kababaire nibatahamu, leba Samweli omu maisho gabo nashohora kutemba aha rushozi.

15Ekiro ekyayebembeire okwija kwa Shauli, Omukama akashurulira Samweli nagamba ati, 16“Nyenkya omu kanya nk'aka ndakutwekera omuntu kuruga omu nsi ya Benjamini, omukore amajuta abe mutwazi w'abantu bange ba Isiraeli. Niwe alirokora abantu bange omu mikono y'Abafilisiti, aha rw'okuba bantakiire, obushasi bwabo mbuboine.” 17Samweli orwo yaboine Shauli, Omukama amugambira ati, “Leba omuntu owo nkugambire. Ogu niwe aratwara abantu bange.” 18Shauli agoba Samweli omu kihigi, amugira ati, “Ngambira enju ya kaboni elihai?” 19Samweli amuhorora ati, “Kaboni n'inye, nyebembera mutembe aha rushozi, kir'eki twije tulye hamoi. Nyenkya bwankya ndakumanyisa ebyo ndikutekeleza mara nkutaishure ogende. 20Kandi endogobe zawe ezamara ebiro bishatu ezo zitakushasa, enshonga zabonekire. Isi n'ohai owo Isiraeli elikugonza kushaga? Tiiwe n'eka ya sho yona?” 21Shauli ahorora ati, “Inye ndi Mubenjamini, ndi w'oruganda ruke muno omu nganda za Isiraeli. N'eihiga lyange like muno omu mahiga gona g'oruganda rwa Benjamini. Mbwenu kubaki wangambira ekigambo nk'ekyo?”

22Ahanyuma Samweli akwata Shauli n'omwiruwe abatahya omu kiyumba, abaha omwanya omugati y'abaralizibwa nka 30. 23Agambira omuchumbi ati, “Leta enyama yonkuhaire ninkugambira nti, ‘Obe ogibikire.’ ” 24Omuchumbi ashutura ekirumbu n'enyama eyabaire ekigerekirweho abita omu maisho ga Shauli. Samweli agambira Shauli ati, “Leba enyama eyo mbaire nkubikiire. Ogikwate ogilye. Mbaire ngikubikiire kugoba mbwenu k'oija okagilya n'abaralizibwa aba.” Aho kir'ekyo Shauli alya na Samweli.

25Kabasongokire orushozi bataha omu kigo, Samweli afumora na Shauli aha nju eiguru; 26banagira. Bwankya omu rukyakya Samweli ayeta Shauli aha nju eiguru, amugira ati, “Imuka nkutaishure ogende.” Shauli aimuka; bombili, wenene na Shauli bashohora aheru.

27Kababaire baija kugoba mbali ekigo kyabaire nikilekelera, agambira Shauli ati, “Ogambire omwiru arabeho atwebembere; k'araba yarabireho, iwe oyemelereho kake nkumanyise ekyo Ruhanga agambire.”

Currently Selected:

1 Samweli 9: RHAY01

Highlight

Copy

Compare