1 Samweli 13

Endashana za Shauli n'Abafilisiti

1Shauli akalya engoma aina emyaka 30; kandi yatwara Isiraeli emyaka 42.

2Omuli Isiraeli akarondamu abantu 3,000; omuli abo 2,000 yaikara nabo Mikimashi n'omu mabanga ga Betheli, kandi 1,000 baikara na Yonatani omuli Gibea eya Benjamini. Abasigaire bona yabashubya omuka omu mahema gabo. 3Yonatani atera eboma y'Abafilisiti ababaire bali Gibea; Abafilisiti bakihulira. Shauli atera enzamba omu nsi yona nagamba ati, “Abaheburania bahulire.” 4Isiraeli yona ehulira okwo Shauli ateire eboma y'Abafilisiti, n'okwo Isiraeli ebaire kijunde aha Bafilisiti. Abantu bahuruzibwa kushanga Shauli Giligali.

5Abafilisiti baterana kurashanisa Isiraeli, baina amagali 30,000, ab'efarasi 6,000 n'abaisherukale abandi bangi nk'omushenye gw'omwegego gw'enyanja; bagenda basisira Mikimashi oburugaizoba bwa Betiaveni. 6Abaisiraeli kababoine okwo bazangiranwa baturutuma. Embaga ebona okwo yabundwa, abantu besheleka omu mpako n'omu bina n'omu mabare n'omu nyanga n'omu maziba. 7Abandi bashabuka ebyambu bya Yorudani, bagya Gadi na Gileadi. Shauli akaba akyali Giligali; abantu bona bamuhonderayo nibachundwa.

8Alindaho ebiro mushanju akanya ako Samweli yabaire amuraganisize. Kyonkai Samweli tiyaizire Giligali n'abantu bamusigaho benaganaga. 9Aho Shauli aragira ati, “Ndetera ekihongo ky'okwokibwa n'ekihongo ky'emilembe.” Atamba ekihongo ky'okwokibwa. 10Kayamazire ati kukitamba, Samweli aija. Shauli agenda kumuchwekera, amushura. 11Samweli amubaza ati, “Eki wakoraki?” Shauli amushubamu ati, “Orwo mboine abantu nibansigaho nibenaganaga, naiwe okaburwa kwija omu biro ebyo wagambire, kandi n'Abafilisiti bateraniire Mikimashi, 12ngamba nti, ‘Abafilisiti nibaija kumbundira Giligali ntakashabire bujuni bwa Mukama;’ nyegimba mara ntamba ekihongo ky'okwokibwa.” 13Samweli amugambira ati, “Wakora eky'obufera, tiwakwata muhango gwa Mukama Ruhanga wawe ogwo akuragiire. Kuba wamuhulira, obukama bwa Isiraeli yakubukuhaire na bijukuru bawe ebiro byona. 14Kyonkai mbwenu obukama bwawe tibugendelere. Omukama yahigire omuntu ow'alikwenda, yamuronkire kuba mukama w'abantube, orwo otahikya kyo yakuragiire.”

15Samweli aruga Giligali agya Gibea eya Benjamini. Na Shauli ahikanisa abantu nka rukaga abo yabaire ainabo. 16Aikara Gibea eya Benjamini, n'omutabani Yonatani n'abo yabaire ainabo. Abafilisiti basisira Mikimashi. 17Abaisherukale b'Abafilisiti batabara kunyaga omu mitwe eshatu; ogumoi gwolekera Ofura omu nsi ya Shuali; 18ogundi gwolekera Betihoroni; ogwa kashatu gwolekera omu rubibi orulebire obusoka bw'Oruhanga rwa Zeboimu mukono gw'eirungu.

19Omu nsi yona ya Isiraeli tihakubonekiremu muhesi n'omoi, enshonga Abafilisiti bakabatanga kuhesha embanda n'amachumu. 20Abaisiraeli bagyaga omu Bafilisiti kuba niyo bahyolera epulau zabo, n'enfuka, n'endyamiti, n'empabyo. 21Okuhyora epulau n'enfuka bashashuraga esarafu emoi enke, kandi aha ndyamiti n'emihunda bashashuraga esarafu ibili. 22Kityo aha kiro ky'endashana abantu abo Shauli na Yonatani babaire bainabo thaliho n'omoi yabaire akwete mbanda anga ichumu, shana Shauli na Yonatani omutabani bonkai. 23Ahanyuma eihe ly'Abafilisiti liruga omu boma ligya omu nkiro za Mikimashi.

Currently Selected:

1 Samweli 13: RHAY01

Highlight

Copy

Compare