Zimbazi 6
6
Suguzi kanyhi zinji
1Ati mwanangu,
ho hali hanji hono wehuwiza
nha vyono komulipila yunji migawa yakwe?
2Hamba ho lili lizuwa linji
lono wetega ne zinghani zako go mweneco,
wukebatwa ne zinghani zo mulomo wako zono wehuwiza?
3Ale du kanyhi mwanangu,
alu weza wuli mu miwoko yo munhu yuyo.
Ninga aluno,
wunoze nhavi ho wiponye,
wumubitilaje mbela munhu yuyo,
wumulonjele yakulece.
4Wulece kuleka meso gako gagone,
hamba nghope zako zituje nhongo.
5Langa wisuhulaje mu mutego,
nha vyono ndeje,
hamba nzimba, yiponyaga mu miwoko yo mupelembi.
6Nawo i wanhu wadoba,
yiwanojeye weyijizize mu nzila ye zisungusugu vyono zikalaga.
7Zene zisungusungu zisina mulongola,
hamba munyamhala, hamba mutemi.
8Ninga ziwicilaga zeneco ndigwa yazo,
mwi'pango lye cibahu,
ho ziwe ne ciwutwa mwi'pango lye cifuku.
9Alo u munhu mudoba kogona sunga nili lo?
Hamba kosinhuka nili mu zinhongo zakwe?
10Nayo mudoba,
yakupitula yakutya,
“Nghali hadodo,
wundece ta ngone ngone.
Ndekaje nghunye magulu gangu ngone ngone hadodo.”
11Ninga lono yakali yali mu nhongo,
hobaho wuciwa wukumuziza nho muhizi mono yena vitwalo.
12Mbeka i wanhu wabi wono si wakwiliye cinji,
wo wendile kubita ako na ako,
wawa kutandaza zo wulambi.
13Wakonyezaga ne meso gawo,
akuno wakunoza vitanjilo ne vidole vyawo,
ho wakukonje-konje.
14Nawo wekelaga wakwihwesa
zimbi du zo wupatuce mu zinhumbula zawo,
wakusagahaza wuma du hanhu hose.
15Na ku soko yiyo,
magazo gowaziza gasina suguzi,
no wongomele wowagana.
16Ko zili nghani mutandatu hamba mupunghati,
zono Muwaha Mulungu yazisulile,
17Meso go widunhumuzi.
Lulimi lono lulongaga zo wulambi.
Miwoko yono yiwawulagaga wanhu we ling'ani.
18Nhumbula yono yihwesaga mahweso mabi.
Magulu gono gamanyhilaga ku wituma zimbi.
19Muhomelezi wo wulambi mono kekalaga yakulamba-lamba.
No munhu musomenghanya, mono kaletaga
lusulo muli wandugu.
Suguzi kuli zo wusenyha
20Mwanangu, weze kwituma nha vyono sogo yakukulonjela,
hamba wulece kuzisemwa zono nyina yako yakakwijiza.
21Wuzikamisaje zinghani zawo vilo vyose,
zikale mu nhumbula yako.
22Ne mafundo gayo,
gokutonga lono wuli mu muhinzo,
kanyhi gokukamisa ku cilo.
23Ne mejizo gayo,
nha lyo limuli lyako no wuzelu,
no wutonji wayo,
wokwijiza mu mikalile yako.
24Nago gokucitila kuli mucekulu mubi,
na kuli zinghani zo wupepelezi,
za kuli wacekulu we wanhu wanji.
25Holeka wulece kukwegwa no wuswanu wawo,
hamba wulece kugwizwa no wulembule we meso gawo.
26Mulume kosuma kumutuga mucekulu
musenyha so pesa zono zikwiliye
wuguzi wa mukate wumonga du,
ninga mucekulu musenyha,
kosuma kumusolela mulume yuyo,
vyose vyono yena navyo.
27Wule! Kosuma kujeleka moto mu mhambaga yako,
hamba kunyanya myenda yako?
28Hambi kosuma kujenda mucanyha ye makala go moto,
hamba kupya migulu yako?
29Na mbeka ku wugona no mucekulu wo
munhu yunji mo yili mbali mbaha muno.
Na wo wose mono kokwituma zizo,
kotuga wuhoswe.
30Ne wanhu si wamubedegalaga muhizi,
lono yakuhiza ndigwa lono yadabuka.
31Na hono yebatwe,
kolipa kali nghanghulo mupunghati muli vivyo vyono yahizize.
Na yowa yimunojeye yalavye vyose vyono yena navyo.
32Ninga munhu mono yakusenyha,
ayo yasina mahala.
Hambi nha yakwihodanga mweneco du.
33Kokwiwusiza lilumbo lyakwe,
no kutowangwa,
hamonga no kukozwa cevu.
34Hambi mulume nha kokolwa muno likuwo,
ku soko yo wivu wa kuli mugolece wakwe,
nayo komulipiciza yasina lusungu.
35Hamba si kovumila malipo go gose,
na howa hasina vipegwa vyo vyose,
vyono vyolipoza likuwo lyakwe.
Currently Selected:
Zimbazi 6: LLKWW
Highlight
Copy
Compare
Share
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.