Zimbazi 26
26
1Lukumyo lo mulele, lwa bwete,
hambi nha lwihwanile nha seluji mu cibahu,
hamba mvula mwi'pango lye ndudula.
2Nawo wulijitwe wono wusina soko,
si womugwila munhu,
langa hono wuwe wina soko yayo.
Hambi nha wowa wihwanile zindeje,
zono zigulukaga ako na ako, hamba kutula ng'o.
3Fwalasi yikunagwa, nayo ndogowe yiwopwaga no lubano.
Nayo mulele, wumukune no mukotya.
4Wulece kumupitula mulele mu wulele wakwe,
ho wulece kwihwana nayo.
5Wumupitule mulele mu nghango yo wulele wakwe,
ho yalece kwiyihwesa vyono we mahala.
6Na hono wumutume mulele yakutegulile nghani,
kowa nho munhu mono wukwidumula magulu gako no kwipela wambuce du.
7Kosuma kucitumamila cihwanicizo co munhu mulele,
kuli munhu we citewe,
mono kosuma kuyitumamila migulu yakwe.
8Na hono wumupele mulele lilumbo,
wehwana no munhu mono yakuwicila libwe mu manati.
9Ne zinghani zo mulele,
zono yakuzisolela kuli munhu we mahala,
zihwanile u munhu mugalo 'jimbi,
mono yakujela kuhomola limiya,
lyono limuhomile mu muwoko wakwe.
10No munya mulimo,
mono yakwilumbaniza mu mulimo no munhu mulele,
mono yakupuluta,
ale, yuyo welumbanizaga no munhu wo wose mono yakupuluta.
11U munhu mulele,
kawuyilaga kanyhi kwituma zinghani zo wulele,
nhe libwa lyono liwuyilaga madeko galyo.
12No munhu mulele muno, yuyo yali ciba,
si nho munhu mono kehwesaga yena mahala,
kumbe ho yasina.
13Alu mwene, nhawule u munhu mudoba,
si kalawilaga kunze?
Alo kowa yakogopa simba?
14Nayo munhu mudoba, kebiducizaga mu citanda du,
yehwanile nho mulango wono wuninyinaga mu zibawaba zayo.
15Ne wanhu wanji wadoba muno,
wakulemegwa sunga no kutajila ndigwa mu milomo yawo.
16No munhu mudoba, kehwesaga nha vyono yena mahala,
kuciza wanhu mupunghati,
wono wosuma kulavya mahweso maswanu.
17Nawo u witajila mu nghani zono si zako,
wihwanile no wubita mu nzila,
kuwa kugebata makutu ge libwa nhinicizo.
18No munhu mono komwajiliza nghani muyagwe,
hanyuma kanyhi ho yatye yali kumwizavya,
19yuyo yehwanile munhu wo lukwale,
mono yakwidawalila cipe ciwulaji.
20Hono hasina ngwagu, moto si wukolelaga,
na hono hasina wusomenghanya, hawezaga hasina mazozo.
21Makala, go galekaga mavu gawa gali moto.
Nazo zingwagu, zo zilekaga moto wukwaka.
Nayo musomenghanya,
yo kalekaga mazozo gakujendelela.
22Ne zinghani ze maheho, zili muzinzi!
Nase, wulenyi vyono cizendile!
23Ne zinghani zo wulambi,
zihundikaga mahweso ge mbeka,
zihwanile ne nyungu swanu ye lilongo,
yono hiliwe na fweza kunze yayo.
24Nayo munhu mukoci,
kahundicizaga lusulo lwakwe,
mu zinghani zo wiyendezi.
25Ne zinghani zakwe, zijelaga nha swanu,
ninga wulece kumwitumbila.
Hambi nhumbula yakwe, nha yimemile lusulo du.
26Kosuma kujela kuluhundika lusulo lwakwe ko wusugu,
ninga i wanhu wose woziwona i zimbi zono yakwituma.
27Ne wanhu wono wawategaga wayawo mitego,
wagwilaga kanyhi weneco.
Ne wanhu wono wabidusaga libwe,
ho liwagwile wayawo,
libwe liwuyaga no kuwagwila weneco.
28No lulimi lo wulambi,
luwasulaga wono lukuwatamisa.
Ne zinghani zo wulambi, ziletaga wongomele.
Currently Selected:
Zimbazi 26: LLKWW
Highlight
Copy
Compare
Share
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.