Wuwale 7
7
I vilavywa vye walongola we wanhu
1Na mwizuwa lyono Musa yakondezya mulimo wo kukoma Lihema lyono Lyelile, hobaho yakawa kulitila Lihema i mafuta go witile, yakalisiwanula, hamonga ne vitumamilwa vyayo vyose, yakacisiwanula ne cikumbicilo, hamonga ne vitumamilwa vyayo vyose. 2Hanyuma i wawaha we milango, wono wali wo walongola mu milango ye Waisilayeli, wawalya wono wali walanjilizi mu mulimo wo wu wala liwalo lye wanhu, 3wakaleta vilavywa vyawo kuli Muwaha Mulungu. Waleta mikokoteni mutandatu. Wakawa wakulavya walongola wejete, mukokoteni monga, walongola wejete, mukokoteni monga. Kanyhi wawo walongola, wakalavya na nghongolo yikumi na nyejete, walavya munhu nghongolo monga, munhu nghongolo monga. Nawo wali weza kukondya kulavya vinhu vivyo, 4Muwaha Mulungu yakamulonjela Musa yakatya, 5“Ale, wuvibocelaje vipegwa vivyo vitumamilwe mu mulimo we Lihema lyono Lyelile. Nagwe wuwapele Walawi vinhu vivyo ho vitumamilwe mu mulimo wono wukusakwa witumwe.” 6Musa yakawa kuwapela Walawi i mikokoteni yiyo hamonga ne zinghongolo. 7Yakawapela we mhuga ye Wagelishoni mikokoteni myejete, hamonga na nghongolo yine. 8Nawo we mhuga ye Wamelali, yakawapela mikokoteni mine, hamonga na nghongolo munana. Ne milimo yawo yose, yikawa yikwitumwa hasi yo wulanjilizi wa Itamali u mwana wa Haluni u mukohani. 9Ninga Musa si yawapela mikokoteni hamba nghongolo we mhuga ye Wakohati, vyono wene wali walanjilizi we vinhu vyono vyelile, kanyhi wali wo wadinghuzi we vinhu vivyo, wavipikaga mu mawega gawo.
10I walongola wa wano, wakaleta kanyhi vilavywa vinji so mulimo wo wuhembi wo kucisiwanula cikumbicilo. Na lono wali wewikaniza ku wulete vilavywa vyawo ku cikumbicilo, 11Hanyuma Muwaha Mulungu yakamulonjela Musa yakatya, “U mulongola yumunga yumonga yalavye cilavyocakwe, munhu ne zuwa lyakwe, so wusiwanule we cikumbicilo.” 12Nayo mono yalavya cilavya cakwe mwi zuwa lilongozi, yali Nasoni u mwana wa Binadabu wo mulango wa Yuda. 13Ne cilavya cakwe cali sahani monga ya fweza, wuzito wayo kilo monga, na nusu, bakuli monga ya fweza, wuzito wa yogulamu magana munana mu nghango ye cipimo cono cikwitumamilwa mwi hema lyono lyelile, sahani ne bakuli yiyo vyali vimemile wusaje wono wunamuce wono wuhanzahanza ne mafuta, so cilavywa co wuseje. 14Cisahani cimonga ca fweza wuzito wa yo gulamu yigana limonga ne kumi, cimemile wuvumba. 15Nzeku monga, nduwilu monga, nyana ya ngholo nume monga ya mwaka monga; so cilavywa linyanywe. 16Mvulati monga so cilalvywa co wubi! 17Nzeku nyejete, nduwilu yi hano, mvulati yihano, hamonga na nyana za nghalo nume yihano za mwaka monga, so likambiko lye cilavya co mulamu. Acico cilavywa ca Nasoni mwana wa Aminadabu. 18Mwi'zuwa lye kejete, yali Nataneli u mwana wa Suwali, u mulongola womulango wa Isakali, cilavywa cakwe, 19sahani monga ya fweza wuzito wa yo kilo monga na nusu, bakuli monga ya fweza yo wuzito wa gulamu magana munana munghango ye cipimo cono cikwitumamilwa mwi'hema lyono iyelile. Sahani ne bakuli vyali vimemile wusaje wono wunamuce wono wuhanzahanze ne mafuta. So vilavywa co wusaje. 20Cisahani cimonga co wuzito wa gulamu yigana limonga ne kumi, cono cimemile wuvumba. 21Nzeku monga, nduwili monga nyana ye ngholo nume monga ya mwaka monga, so cilavywa cinyanywe. 22Mvulati monga so cilavywa co wubi. 23Nzeku nyejete nduwilu yihano, mvulati yihano, na nyana za ngholo nune yihano za mwaka monga so likumbiko lye cilavywa co mulamu. Acico cilavywa ca Nataneli u mwana wa Suwali. 24Mwi'zuwa lye kadatu Eliyabi u mwana wa Heloni u mulongola wo mulango wa Zabuloni. 25Cilavywa cakwe sahani monga ya fweza wuzito wayo kilo monga na nusu, bakuli monga ya fweza wuzito wayo gulamu magana munana mu nghango ye cipimo cono cikwitumamilwa mwi'hema lyono lyelile. Sahani ne bakuli vyali vimemile wusaje wono wunamuce, wono wuhanzahanze ne mafuta, so cilavywa co wusaje. 26Cisahani cimonga co wuzito wa gulamu yigana limonga ne kumi cono cimemile wuvumba. 27Nzeku monga, nduwilu mongo nyana ya ngholo nume monga ya mwaka monga, so cilavywa cinyanywe. 28Mvulati monga so cilavywa co wubi. 29Nzeku nyejete, nduwilu yihano, mvulati yihano, na nyana za ngholo nume yihano za mwaka monga; so likumbiko lye cilavywa co mulamu. Aci co cilavywa ca Eliyabi mwana wa Heloni. 30Mwi'zuwa lye 'kane, Elizuli u mwana wa Shedewuli, u mulongola wo mulango wa Lubeni. 31Cilavywa cakwe, sahani monga ya fuweza, wuzito wayo kilo monga na nusu, bakuli monga ya fweza, wuzito wayo gulamu magana munana, mu, nghango ye cipimo cono cikwitimamilwa mwi'hema lyono lyelile. Sahani ne bakuli vyali vimemile wusaye wono wunamuce wono wuhanzahanze ne mafuta so cilavywo co wusaje. 32Cisahani cimonga co wuzito wa gulamu yigana limonga ne 'kumi; cono cimemile wuvumba. 33Nzeku monga, nduwilu monga, na nyana ya ngholo nume monga ya mwaka monga, so cilavywa cinyanywe. 34Mvulati monga so cilavywa co wubi. 35Nzeku nyejete, nduwilu yihano, mvulati yihano, nyana za ngholo, nume yihano za mwaka monga, so likumbiko lye cilavywa co mulamu. Aci co cilavywa ca Elizuli u mwana wa Shedewuli. 36Mwi'zuwa lye 'hano Shelumiyeli u mwana wa Zulishadayi, u mulongola wo mulango wa Simiyoni. 37Cilavywa cakwe, sahani monga ya fweza, wuzito wayo, kilo monga na nusu, bakuli monga ya fweza, wuzito wayo, gulamu magana munana, munghango ye cipimo cono cikwitumamilwa mwi'hema lyono lyelile. Sahani ne bakuli yiyo, vyali vimemile wusaje wono wunamuce, wono wuhanzahanze ne mafuta, so cilavya co wusaja. 38Cisahani cimonga cafweza, wuzito wayo gulamu yigana limonga ne 'kumi, cono cimemile wuvumba. 39Nzeku monga, nduwilu monga, nyana ya ngholo nume monga ya mwaka monga, so cilavywa cinyanye. 40Mvulati monga so cilavywa co wubi. 41Nzeku nyejete, nduwilu yihano, mvulati yihano nyanaza ngholo nume yihano, za mwaka monga so likumbiko lye cilavywa co mulamu. Aci co cilavywa ca shelumiyeli, u mwana wa Zulishadayi. 42Mwi'zuwa lyo mutandatu, Eliyasafu u mwana wa Dewuyeli wo mulango wa Gadi. 43Cilavywa cakwe, sahani monga ya fweza, wuzito wayo, kilo monga na nusu, bakuli monga ya fweza, wuzito wayo gulamu magana munana mu nghango ye cipimo cono cikwitumamilwa mwi-hema lyono lyelile, sahani ne bakuli yiyo, vyali vimemile wusaje wono wunamuce, wono wuhanzahanze ne mafuta, so cilavywa co wuseje. 44Cisahani cimonga ca fweza, wuzito wayo, gulamu yigana limonga ne'kumi; cono cimemile wuvumba. 45Nzeke monga, nduwilu monga, nyana ya ngholo nume monga ya mwaka monga so cilavywa cinyanywe. 46Mvulati monga so cilavywa co wubi; 47Nzeku nyejete, nduwilu yihano, mvulati yihano, nyana za ngholo nume yihano za mwaka monga so likumbiko lye cilavywa co mulamu. Aci co cilavywa ca Eliyasafu u mwana wa Dewuyeli. 48Mwi'zuwa lyo mupunghati Elishama u mwana wa Amihudi u mulongola wo mulango wa Efulayimu. 49Cilavywa cakwe, sahani monga ya fweza, wuzito wayo kilo monga na nusu, bakuli monga ya fweza, wuzito wayo, gulamu magana munana, munghango ye cipimo cono cikwitumamilwa, mwi'hema lyono lyelile, sahani ne bakuli yiyo vyalivimemile wusaje wono wunamuce, wono wuhanza hanze ne mafuta, so cilavywa co wusaje. 50Cisahani cimonga ca fweza wuzito wayo gulamu yigana limonga ne 'kumi cono cimemile wuvumba. 51Nzeka monga, nduwilu monga, nyana ya ngholo nume monga ya mwaka monga, so cilavywa cinyanywe. 52Mvulati monga so cilavywa co wubi. 53Nzeku, nyejete nduwilu yihano, mvulati yihano, nyana za ngholo nume yihano za mwaka monga, so likumbiko lye cilavywa co mulamu. Aci co cilavywa ca Elishama u mwana wa Amihudi. 54Mwi'zuwa lyo munana, Gamaliyeli u mwana wa Pedazuli u mulongola wo mulango wa Manase. 55Cilavywa cakwe, sahani monga ya fweza, wuzito wayo kilo munana na nusu, bakuli monga ya fweza, wuzito wayo, gulamu magana munana, mu nghango ye cipimo cono cikwitumamilwo mwi'hema lyono lyelile. Sahani ne akuli yiyo vyali vimemile wusaje wono wunamuce, wono wuhanzahanze ne mafuta so cilavywa co wusaje. 56Cisahani cimonga ca fweza wuzito wayo gulamu yigano limonga ne 'kumi cono cimemile wuvumba. 57Nzeka monga nduwilu monga, nyana ya ngholo nume, monga ya mwaka monga, so cilavywa cinyanywe. 58Mvulati monga so alavywa co wubi; 59Nzeku nyejete, nduwilu yihano, mvulati yihano, nyana za ngholo nume yihano za mwaka monga, so likumbiko lye cilavywa co mulamu. Aci co cilavywa ca Gamaliyeli u mwana wa Pedazuli. 60Mwi'zuwa lye licenda, Abidani u mwana wa Gideyoni u mulongola wo mulango wa Benyamini. 61Cilavywa cakwe, sahani monga ya fweza, wuzito wayo kilo monga na nusu, bakuli monga ya fweza, wuzito wayo gulamu magana munana, mu nghango ye cipimo cono cikwitumamilwa mwi'hema lyono lyelile, sahani ne bakuli yiyo, vyali vimemile wusaje wono wunamuce, wono wuhanzahanze ne mafuta, so cilavywa co wusaje. 62Cisahani cimonga ca fweza, wuzito wayo, gulamu yigana limonga ne kumi cono cimemile wuvumba. 63Nzeku monga, nduwilu monga, nyana ya ngholo nume mongo ya mwaka monga so silavywa cinyanywe. 64Mvulati monga so cilavywa co wubi. 65Nzeku nyejete, nduwilu yihano, mvulati yihano, nyana za ngholo nume, yihano za mwaka monga so likumbiko lye cilavywa co mulamu. Acico cilavywa ca Abidani u mwana wa Gideyoni. 66Mwi'zuwa lye likumi, Ehiyezeli u mwana wa Amishadayi u mulongola wo mulango wa Dani. 67Cilavywa cakwe, sahani monga ya fweza, wuzito wayo, kilo monga na nusu, bakuli monga ya fweza, wuzito wayo gulamu magana munana, mu nghango, ye cipimo cono cikwitumamilwa mwi'hema lyono lyelile, sahani ne bakuli yiyo vyalivimemile wusaje wono wunamuce, wono wuhanzahanze ne mafuta so cilavywa co wusaje. 68Cisahani cimonga ca fweza wuzito wayo gulamu yigana limonga ne'kumi, cono cimemile wuvumba. 69Nzeku mongo nduwilu monga, nyana ya ngholo nume monga, ya mwaka monga so cilavywa cinyanywe. 70Mvulati monga so cilavywa co wubi. 71Nzeku nyejete, nduwilu yihano, mvulati yihano, nyana za ngholo nume yihano za mwaka monga so liku mbiko lye cilavywa co mulamu. Aci co cilavywa ca Ehiyezeli u mwana wa Amishadayi. 72Mwi'zuwa lye likumi na monga Pajiyeli, u mwana wa Ikilani u mulongola wo mulango wa Asheli. 73Cilavywa cakwe, sahani monga ya fweza, wuzito wayo kilo monga na nusu, bakuli monga ya fweza wuzito wayo gulamu magana munana mu nghango ye cipimo cono cikwitumamilwa mwi'hema lyono lyelile. Sahani ne bakuli yiyo vyali vimemile wusaje wono wanamuce wono wuhanzahanze ne mafuta so cilavywa co wusaje. 74Cisahani cimonga ca fweza wuzito wayo gulamu yigana limonga, ne'kumi cono cimemile wuvumba. 75Nzeku monga, nduwilu monga, nyana ya ngholo nume monga ya mwaka monga so cilavywa cinyanywe. 76Mvulati monga so cilavywa co wubi. 77Nzeku nyejete, nduwilu yihano, mvulati yihano nyana za ngholo nume yihano za mwaka monga so likumbiko lye cilavywa co mulamu. Aci co cilavywa ca Pajiyeli u mwana wa Okilani. 78Mwi'zuwa lye likumi na nyejete, Ahila u mwana wa Enani, u mulongola wo mulango wa Nafutali. 79Cilavywa cakwe, sahani monga ya fweza, wuzito wayo kilo monga na nusu, bakuli monga ya fweza, wuzito wayo, gulamu magana munana, munghango ye cipimo cono cikwitumamilwa mwi'hema lyono lyelile. Sahani ne bakuli yiyo vyali vimemile wusaje wono wunamuce, wono wuhanzahanze ne mafuta so cilavywa co wusaje. 80Cisahani cimonga ca fweza, wuzito wayo gulamu yigana limonga ne'kumi cono cimemile wuvumba. 81Nzeku monga, nduwilu monga, nyana ya ngholo nume monga ya mwaka monga so cilavywa cinyanywe. 82Mvulati monga so cilavywa co wubi. 83Nzeku nyejete, nduwilu yihano, mvulati yihano, nyana za ngholo nume yihano za mwaka monga, so likumbiko lye cilavywa co mulamu. Acico cilavywa ca Ahila, u mwana wa Enani.
84No winji we vilavywa, vyono wawo i walongola we likumi na wejete walavya, ku so wusiwanuzi we cikumbicilo, wali wuli nhavi: 85Makalayi ga fweza yikumi na mejete na bakuli za fweza yikumi na nyejete, zose hamonga, zali zina wuzito wa kilo makumi mejete na mupunghati, na gulamu magana mutandatu. 86Zibakuli za zahabu yikumi na nyejete, zose hamonga zali zina wuzito wa kilo monga, na gulamu magana madatu na makumi mejete, nazo zikawa zimemile no wuvumba.
87Nzeku yikumi na nyejete, na nduwilu yikumi na nyejete. Hamonga na nyana za ngholo yikumi na nyejete za mwaka monga. Hamonga ne cilavywa co wusaje, so cilavywa cinyanywe.
88Kanyhi na mvulati yikumi na nyejete so cilavywa co wubi. Hamonga na nzeku yine na nduwilu makumi mutandatu, na mvulati makumi mutandatu, hamonga na nyana za ngholo makumi mutandatu za mwaka monga monga, so cilavywa co mulamu.
89Nayo Musa yali yeza kwinjila mugati ye Lihema lyono Lyelile, ho yakalongane no Muwaha Mulungu, yakamuhulika Muwaha Mulungu yakulongana nayo, mu wulawa hacanyha ye cigubiko ce Lisanduku lye Cilagane, haciligati ye makelubi mejete.
Currently Selected:
Wuwale 7: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
