Wuwale 4
4
Milimo ye Walawi, we mhuga ye Wakohati
1Muwaha Mulungu yakamulonjela Musa yakatya, 2“Yawawale Walawi wose we mhuga ye Wakohati, mu nghango ye milango ye wasogo zawo ne zimhuga zawo, 3yawandice wanhu we cilume wose wono waficile ku wulawilila myaka makumi madatu sunga makumi mahano, wono wowa wanojeye ku wituma milimo ya mwi 'Hema lyono Lyelile. 4Hambi witumami wawo nha wowa wuli mu vinhu vyono vyelile.”
5Nayo Muwaha Mulungu yakamulajiliza Musa yakatya, “Kolo weza kuwuka mu nghambi yiyo, ale, Haluni ne wanagwe we cilume, wanojeye wenjile mwi 'Hema, wapambule libupa lyo mwenda lyono lili ha mwande ye Lisanduku lye Cilagane. Wawe kulivunjiliza Lisanduku lye Cilagane no mwenda wuwo. 6Hanyuma wawe kuligubika ne nguwo yono yitelemeye, kanyhi wawe kuwugubika no mwenda we liwala lye buluu mucanyha yalyo. Hanyuma ho wawe kugakoza mu zinyamwidole i mabici go kulidinghulila.
7“Hanyuma kanyhi, wasole meza ye mikate milavye kuli Muwaha Mulungu, watandice mucanyha yayo mwenda we liwala lye buluu, ho wawe kujeleka mucanyha yayo viya vyayo, nha cinji visahani vyo kuwicila wuvumba, ne vikombe, hamonga ne vidumu, vyo kujidila vilavywa vye divayi. Kanyhi yinojeye mikate yiwe miwice mucanyha ye meza nhondo zose. 8Hanyuma ho wawe kuvigubiciza vinhu vivyo vyose no mwenda we liwala lidunghu, hanyuma ho wawe kugubika mucanyha yayo ne nguwo swanu yono yitelemeye. Hanyuma wawe kugakoza mu zi nyamwidole i mabici go kuyidinghulila.
9“Hanyuma kanyhi, wasole mwenda we liwala lye buluu, wawuvunjilize wuwiko we tala, ne zitala zayo, ne mibato yayo, ne visahani vyayo, hamonga ne viya vyayo vyose vyo kuwicila mafuta. 10Ne vinhu vivyo vyose, wavivunjilizaje mu nguwo swanu yono yitelemeye, na hanyuma wawe kuvijeleka mu wudinghulilo wavyo.
11“Walaza kuwa wazikondya zizo, ale, wasole kanyhi mwenda we liwala lye buluu, wawugubice mucanyha ye cikumbicilo ce zahabu, wawe kucigubika mucanyha yayo ne nguwo swanu yono yitelemeye, hanyuma wawe kugakoza mu zinyamwidole zayo i mabici go kucindinghulila. 12Hanyuma wawe kusola viya vyose vyono vikwitumamilwa i Hanhu hono helile, wawe kuvipalinjiza vyose hamonga mu mwenda we liwala lye buluu, hanyuma wawe kuvivunjiliza mu nguwo swanu yono yitelemeye, wawe kuvijeleka mu wudinghulilo wavyo. 13Hanyuma wawe kugawusa mavu mu cikumbicilo, wawe kutandika mwenda we liwala lyo lugandu mucanyha yaco. 14Hanyuma wawe kupanga mucanyha yaco i vinhu vyose vyono vitumamilwaga mu wuhembi mu cikumbicilo cico, nha cinji, vyungu so mavu, ne zikoleyo, ne mabeseni, ne vicinyilo, hamonga ne visahani vyo kupalila moto. Hanyuma wawe kuvivunjiliza mu nguwo swanu vyono yitelemeye, wawe kugakoza mu zi nyamwidole i mabici gayo go kucidinghulila. 15Nayo Haluni ne wanagwe, kolo wakondya kuvivunjiliza no kuviwopeleza vinhu vyose, vyono vikwitumamilwa i Hanhu hono helile, lono weza kutuluka wakulawa mu nghambi yiyo, ale, i wana wa Kohati, wo wavidinghule i viya vivyo. Langa walanjilile walece kuvipamiza viya vivyo, na hono wejelele du wavipamize, wofwa.
“No mulimo wuwo wo wudinghuzi we viya vivyo, wowa wo mulimo wawo du i wana we Wakohati, ho hose hono mowa kulihamizya Lihema lyono Lyelile. 16Nayo Eleyezali u mwana wa Haluni mukohani, yo kowa mulanjizi we Lihema lyose, ne mafuta go kwasiza zitala, no wuvumba, ne cilavywa co wusaje, ne mafuta go witile, hamonga ne vinji vyose vyono visiwanuywe ku so Muwaha Mulungu vyono vili mwi 'Hema mugati.”
17Muwaha Mulungu yakawalonjela Musa na Haluni yakawatya, 18“Mulece kuwaleceleza wawa i wana wa Kohati wafwe, 19so wusejelela behi ne vinhu vivi vyono vyelile. Na hono musace muyimile mbali yiyi ho yilece kuwejelela, yinojeye Haluni ne wanagwe, wawe kwinjila weneco mugati ye Lihema, wawa kuwagawila wawo wana we Wakohati, munhu na mutegulo wakwe, wono kodinghula, wawalajile ne cidinghulile cayo. 20Kanyhi mulanjilile, vyono hono wejelele wenjile du mwi Hema, no kuvilanga viya vivyo vyono vyelile, lono Wakohani wakali wakuviwopeleza, mbeka wofwa.”
U mulimo we Walawi, i wana we Wagelishoni
21Muwaha Mulungu yakamulonjela Musa, 22“Yawawale Walawi i wana we Wagelishoni, mu nghango ye milango yawo vyono yinha ku wasogo zawo, mu mhuga zawo. 23Yawandice wanhu wose we cilume wono waficila ku wulawilila myaka makumi madatu sunga myaka makumi mahano. Wono wowa wakwiliye ku wituma milimo ya mwi Hema lyono Lyelile. 24Nawo wowa wo wadinghuzi we viya avi vyono vityatizye. 25Lihema lyono Lyelile, ne ligubiko lyayo lya mugati yayo, ne ligubiko lyayo lya kunze yayo, ne nguwo swanu yono yitelemeye, yono yikugubikwa mucanyha yayo, hamonga no wucitizo wa ha mulango we Lihema lyono Lyelile, 26ne myenda misimye ye lijinji, lye luwa ye Lihema lyono Lyelile, ne cikumbicilo, ne myenda ya ha mulango we luwa, hamonga ne milejehe yose yono yikwitumamilwa mu wukoma Lihema lyono Lyelile. Nawo wo wetume zose zono zikusakwa mu mulimo wa muli viya vivyo. 27Nayo Musa na Haluni, wowa wo walanjilizi wono wolanjilila no kuwona vyono, i wana we Wagelishoni, wetuma zose, wadinghula ne vinhu vyose vyono Haluni ne wanagwe wawalonjeye wadinghule. 28Na wuwu wo mulimo we wana we wa Gelishoni wa mumo mwi 'Hema lyono Lyelile. Nawo wokwituma zizo zose mu wutonji wa Itamali u mwana wa Haluni mukohani.”
U mulimo we Walawi, i wana we mhuga ya Melali
29Muwaha Mulungu yakamulonjela Musa, “Yawawale Walawi i wana we Wamelali, mu nghango ye milango yawo vyono yinha ku wasogo zawo, mu mhuga zawo. 30Yawandice wanhu wose we cilume wono waficila ku wulawilila myaka makumi madatu sunga myaka makumi mahano. Wono wowa wakwiliye ku wituma milimo ya mwi 'Hema lyono Lyelile. 31Nawo wawo wo wowa wo wadinghuzi we zifulemu, ne mahapa gayo, ne masumbili gayo, ne mawicilo ge Lihema. 32Hamonga ne masumbili gono gapilime Lihema, ne zimambo zayo ne milejehe yo kuwopela no kulipilimya Lihema lyose. Hamonga ne milejehe yose yono yikwitumamilwa so wukoma Lihema. Kanyhi yinojeye munhu wowose, yeze kudinghula cinhu cico cimonga du nhondo zose, yalece kukawaniza kawaniza. 33No mulimo wuwuno wo wuwanojeye wawo du i wana wa Melali, mu wuhembi wawo mwi 'Hema lyono Lyelile. Nawo wokwituma zizi zose mu wutonji wa Itamali u mwana wa Haluni mukohani.”
U wuwalwe we Walawi
34Nawo Musa na Haluni, hamonga ne walongola we zimhuga ze wanhu, wakawa kwanza kuwawala wanhu, nha vyono Muwaha Mulungu yali yalajilize. Wakawawala i wanhu we zimhuga yidatu za Walawi, nha cinji mhuga ye Wakohati. 35Wakawawala mu nghango ye milango yawo vyono yinha ku wasogo zawo, mu mhuga zawo. Hanyuma wakawa kuwandika mu citabu, i wanhu wose wono waficila ku wulawilila myaka makumi madatu, sunga myaka makumi mahano. Wono wowa wakwiliye ku wituma milimo ya mwi 'Hema lyono Lyelile. 36Ne liwalo lyawo munghango ye zimhuga zawo wali waficile wanhu elufu nyejete na magana mupunghati na makumi mahano.
37Ali lyali lyo liwalo lya we mhuga ye Wakohati wono watumaga mwi 'Hema lyono Lyelile,
38Wo mulango we Wagelishoni, ne zimhuga zawo,
39wono wali waficile myaka makumi madatu na we makumi mahano, wono wali wakwiliye kwituma mwi 'Hema lyono Lyelile.
40Elufu nyejete na magana mutandatu
na makumi madatu.
41Ali lyali lyo liwalo lya we mhuga ye Wagelishoni wose wono wetumaga mwi Hema lyono Lyelile.
42Wo mulango we Wamelali, ne zimhuga wazo,
43wono wali waficile myaka makumi madatu sunga makumi mahano, wono wefumaga mwi 'Hema lyono Lyelile
44wali waficile
Elufu yidatu na magana mejete cititila.
45Ali lyali lyo liwalo lya we mhuga ye Wamelali wono Musa nu Haluni wawawala. 46Ne liwalo lyawo wose hamonga, wakawa waficile wanhu elufu munana na magana mahano na makumi munana, wono wali waficile myaka makumi madatu, sunga makumi mahano, wono wali wakwiliye kwituma no kudinghula vinhu vya mwi Hema lyono Lyelile.
47Ne wanhu wose wakandikwa mu citabu, nha vyono Muwaha Mulungu yamulajiliza Musa. 48Kanyhi ne wanhu wose, wakagawilwa munhu na mulimo wakwe, 49u mulimo wono kowa kwituma, hamba cinhuci cono kowa kudinghula.
Currently Selected:
Wuwale 4: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
