Wuwale 23
23
1Nayo Balamu yakamulonjela Balaki yakatya, “Nghukulomba, wunzenjele bahano vikumbicilo mupunghati, hanyuma wundetele nghongolo mupunghati na nduwilu mupunghati.”
2Nayo Balaki yaketuma nha vyono yalonjelwa na Balamu. Nawo wose vyono wejete, Balamu na Balaki, wakalavya nghongolo monga monga, ne zinduwilu monga monga mu vikumbicilo vyose. 3Hanyuma, Balamu yakamulonjela Balaki yakatya, “Balaki 'gwe, ale wime baho ha cilavywa cako cinyanywe, lono nane nghali kubita nghamanye, hono Muwaha Mulungu konyiziza hamba ng'o.” Ninga nane nokulonjela du zose zono mwene kononjela. Hobaho yakawa kubita kucanyha ye litunda yali wene. 4Nayo Mulungu vikawa kwitang'anila nayo kuko. Balamu yakamulonjela Mulungu yakatya, “Ane nazenga nakondya vikumbicilo vili mupunghati, kanyhi nakondya no kulavya nghongolo monga monga, hamonga na nduwilu monga monga mu vikumbicilo vyose.”
5Muwaha Mulungu yakamulonjela Balamu zose zono yanojeye yakazilonje. Yakawa kumukombola yabite kuli Balaki yakamulonjele zono yamulonjeye yalonje. 6Nayo Balamu yakawa kuwuya kuli Balaki, yakamwagana Balaki yakali vyo yemile bahalya du ha cilavywa cakwe cinyanywe, yali hamonga ne walongola we Wamowabi.
7Hobaho Balamu yakawa kwanza kuzilonga zo wuwile wakwe yakutya,
“Balaki u mutemi we Wamowabi kanyhema,
ku wulawilila ku Siliya,
mu matunda ga kucilima,
Kanyitya, ‘Wuze wundijitile Waisilayeli.’
8Alu nosuma kuwalijita wule, wono Mulungu yakondya
kuwaluguta. Hamba kulonga zo wongomezwe lono Mulungu
si yateye nhavivyo?
9Nane nghusuma kuwawona ku wulawilila
mu vizuli vye mabwe.
Nghuwalanga ku wulawa mu matunda mucanyha
Lyo likungugo lyono likalaga ciwene.
Ninga wamanyile vyono wene walugutwe kuciza
we makungugo ganji gose.
10Ne zindelo za Isilayeli, wenji kotya manghundi.
Wenji muno muno, hamba si wakusumika na ku wuwale.
Wundece nivimalile vilo vyangu
nha yumonga wa muli wanhu wo Mulungu.
Wundece nifwe ko mulamu nhe
wanhu we ling'ani.”
11Nayo Balaki yakamulonjela Balamu yakatya, “Alu Balamu, ho kunhendela nhawule kanyhi? Ane nha nghuleta agwe bahano ho wundijitile i walugu wangu. Ninga agwe kuwalugutiza.” 12Nayo Balamu yakamupitula yakatya, “Ane nghulonga du zono Muwaha Mulungu yakunonjela nonje.”
Wuwile we kejete wa Balamu
13Hanyuma kanyhi, Balaki yakamulonjela Balamu yakatya, “Ale Balamu, wuze le, cibitane hamonga hanhu hanji kanyhi, i hanhu hono kosuma kuwawona Waisilayeli wanji. Nagwe ho wundijitile wene ku wulawilila hanhu baho.” 14Hobaho yakawa kumusola, wakawa kubitana sunga kwi'hala lya Zofimu kucanyha ye litunda lya Pisiga. Na kuko nako yakazenga kanyhi vikumbicilo mupunghati, yakalavya kanyhi vilavywa vya nghongolo monga monga, na nduwilu monga monga, mu vikumbicilo vyose.
15Balamu yakamulonjela kanyhi Balaki yakatya, “Ale wime baho ha cilavywa cako cinyanywe, lono nane nghali kubita nghewone no Mulungu.”
16Muwaha Mulungu nayo vikawa kwiwona na Balamu. Muwaha Mulungu yakawa kumulonjela Balamu, zono Balamu kolonga. Hanyuma yakawa kumukombola yawuye kuli Balaki yakamulonjele zono yamutumile yalonje. 17Nayo Balamu yakawa kuwuya kuli Balaki, yakamwagana Balaki yakali vyo yemile bahalya du ha cilavywa cakwe cinyanywe, yali hamonga ne walongola we Wamowabi. Nayo Balaki yakawa kuwuza vyono Muwaha Mulungu yateye. 18Balamu yakawa kwanza kuzilonga zo wuwile wakwe yakutya,
“Gwe Balaki, wuze go mwana wa Zipola,
Wuhulicize kuli zono nozilonga.
19Mulungu si yehwanile wanhu wono walambaga.
Hamba si yehwanile wuwe wo wuhile wo
munhu wono wupitukaga,
Ninga mwene ketumaga zose zono yehuwize,
Mwene kalongaga ko mulomo,
nazo ziwa kwijela.
20Ane nonjelwa vyono, nize niwalugutize.
Na lono Mulungu yakondya kulugutiza,
ane si nosuma kugomoleza.
21Nizimanyile zinghani ze
Waisilayeli za ku mwande.
Vyono si wokwinjila mu wukalale hamba mu magayo,
Hambi u Muwaha Mulungu nha yali hamonga nawo.
Nawo wakumwanza vyono mwene yo Mutemi wawo.
22Mulungu yo yawawusa ku yisi ya Misili.
Nayo yakuwalewanila, kotya
likambaku lya mu mbago.
23Hasina mhiji zo wuhawi, hamba waganga,
Wono wosuma kwitumamilwa ne nghungugo ya Isilayeli
Sunga ne wanhu wowa kuziganula zinghani ze
Waisilayeli, wakutya,
‘Lanjenyi ta, zono Mulungu yetumile!’
24Ne likungugo lya Isilayeli lihwanile simba
yono yili vilungo muno muno.
Yono si yicehaga, langa sunga
yidemulanje no kulya,
sunga ying'we ne sakami ya vyono liwulaje.”
25Nayo Balaki yakamulonjela Balamu yakatya, “Alu agwe walema kundijitila i wanhu wa Isilayeli, holeka, wulece hamba kuwalugutiza yaye!”
26Balamu nayo yakapitula yakamutya, “Ninga ane si nghulonjela nitya, vyono nosuma kwituma zono Muwaha Mulungu yakunonjela du?”
Wuwile we kadatu wa Balamu
27Nayo Balaki yakatya, “Alu nhondo wunhyatyaje kanyhi, nane nokutegula kanyhi hanhu hanji. I hanhu hono lunji Mulungu kokwenda kukukombola ho wundijitile wanhu wawo ku wulawilila hanhu baho.” 28Hobaho yakawa kumusola Balamu, wakawa kubitana sunga ko kucanyha ye litunda lya Peyoli, akuno wakawa kulilanga li nyika hasi yawo. 29Nayo Balamu yakamulonjela Balaki yakatya, “Ale wunzenjelaje kanyhi bahano vikumbicilo mupunghati, wundetele na nghongolo mupunghati, hamonga na nduwilu mupunghati.” 30Nayo Balaki yakazituma zose nha vyono yali yalajilizwe, yakawa kulavya nghongolo mupunghati, hamonga na nduwilu mupunghati, nghongolo monga monga, na nduwilu monga monga, mu vikumbicilo vyose.
Currently Selected:
Wuwale 23: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
