Wuwale 19
19
Mavu ge ndama ye liwala lidunghu.
1Muwaha Mulungu yakamulajiliza Musa na Haluni yakawatya, 2wawapele Waisilayeli wulajilize wuwu, wawatye. Ale muwaletele Musa na Haluni ndama ye liwala lidunghu, ndama nhelevu yono yisina cilema co cose, yono yikali sinawicilwa lubano, no kwituma mulimo wunji yaye, 3wamupele Eleyezali u mukohani. Nayo ndama yiyo yitegulwe kunze ye nghambi, yikawulajilwe ha mwande ya Eleyezali mukohani. 4Nayo Eleyezali mukohani, yayisole sakami yayo ndodo ne cidole cakwe, yayimize kali mupunghati ku deha ye Lihema. 5Nayo nyama yose ye ndama yiyo, hamonga no mukunza wayo, ne sakami yayo, hamonga no wutumbu wayo, vyose vikongogwe mu moto ha mwande yo mukohani. 6Nayo mukohani yasole cinhambi co mubici wo muhagata, no mulejehe musisili mudunghu, ne cinhambi ca ezobu, yavigumile vyose mu moto wuwo. 7Na kolo zakondya zizo, yimunojeye mukohani yehovuje muwili wakwe, yakanze sunga ne myenda yakwe, ho yenjile mu nghambi. Ninga hamba nhavivyo, mwene kokwikala mwavufywe du sunga kono lyoswela lizuwa. 8No munhu mono kowituma mulimo wuwo wo kuyikongoga ndama yiyo, u munhu yuyo yimunojeye nayo yehovuje muwili wose, kanyhi yakanze ne myenda yakwe. Ninga nayo nhavivilya kokwikala mwavufywe du sunga kono lyoswela lizuwa. 9Hanyuma u munhu mono si mwavufywe, yagazole gago mavu ge ndama, yagalunde i hanhu hono helile kuko kunze ye nghambi. I hanhu hono hanojeye galundwe, hono mhuga ye Waisilayeli wosuma kugasola wagetumamile so wuwikaniza malenga go weze. No wuhembi wuwu wonozwa so cilavywa co wubi. 10No munhu yuyo mono kozola i mavu gago ge ndama, yimunojeye yakanze myenda yakwe, ninga kanyhi kokwikala mwavufywe du sunga kono lyoswela lizuwa. No wulajilize wuwu, wojendelela du sunga mu vilo vyono vikuza, nawo wowa kuli Waisilayeli sunga na kuli wajenzi wono wekalane nawo.
Kuli zo wupamiza muvimba
11Munhu wowose mono kowupamiza muvimba, hodu kowa yeyavufya mweneco, sunga vilo mupunghati vipulute. 12Nayo yowa yimunojeye yeyezeze mweneco mu malenga gago go kwiyezeza, mwi'zuwa lye kadatu, na mwi'zuwa lyo mupunghati, nayo kowa yakondya kwezwa. Ninga hono yalece kwiyezeza mweneco mu malenga gago, mwi'zuwa lye kadatu na mwi'zuwa lyo mupunghati, hodu kokwikala vyo mwavufywe du. 13Munhu wowose mono kowupamiza muvimba, kanyhi yalece kwiyeza mweneco, hodu kokwikala vyo mwavufywe du. Vyono i malenga go weze si getiywe muli mwene. Nayo yakulyavufya Lihema lyo Muwaha Mulungu, hamba si kowalilizwa ne wanhu wo Mulungu.
14Na hono munhu yafwile mwi'hema mugati, u munhu mono kowa yali mumo mugati ye lihema, mwi'pango lono yuyo yakufwa, hamba sunga na mono kohelela du mwi'hema lilyo, hodu kowa yeyavufya, sunga vilo mupunghati vipulute. 15Sunga ne zinjilo zose, hamonga ne viya vyose vyono vili mwazi si vigubucize, vyowa vyavufywa. 16Na hono munhu yamupamize munhu mono yawulagwe, hamba mono yefwiliye mweneco du, kunze ye milango ye mahema, hamba hono munhu yunji yapamize mafupa go mufu, hamba citenjelo, u munhu yuyo kowa yakondya kwiyavufya sunga vilo mupunghati vipulute.
17No wezwe wo wavufywe, wowa wuli nhavi: Gasolwe i mavu gagalya ge ndama ye liwala lidunghu, yono yakongogwa so cilavywa co wubi, gatajilwe mu cungu. Ganegwe ne malenga gono gakuhuluma, gahanzwe mumo mu cungu. 18Hanyuma nghani nongozi, u munhu mono si mwavufywe, yasole cinhambi ca ezobu, yacizabice mumo mu malenga gago, yagamize mwi 'Hema, sunga na muli vinhu vyose vyono vili mumo mugati yalyo, hamonga ne wanhu wose wono wowa wali baho. Ninga ku lubavu lunji, u munhu mono si mwavufywe, yamumizize malenga u munhu mono yagapamize mafupa go mufu, hamba mufu, hamba citenjelo. 19Na mwi'zuwa lye kadatu, na mwizuwa lyo mupunghati, u munhu yuyo mono si mwavufywe, yamumizize malenga u munhu mono yeyavufye. Na mwi'zuwa lyo mupunghati, ale, ho yamweze munhu yuyo, kolo yayikanza myenda yakwe, no kwihovuga muwili wose, nayo kowa yezwa.
20No munhu wo wose mono kowa yakondya kwiyavufya, na kuno ho si yakwiyeza ng'o, ale munhu yuyo, kojendelela kuwa mwavufywe, vyono i malenga go wezwe si gamizizwe muli mwene, hambi munhu yuyo nha yakulyavufya Lihema lyo Muwaha Mulungu. Na ku soko yiyo, hamba si kowalilizwa ne wanhu wo Mulungu. 21Holeka yikunojeye wuwukamise muno muno wulajilize wu wuno, sunga mu vilo vyose vyono vikuza. No munhu yuyo nayo, mono kowituma mulimo wuwo wo kumiza malenga go wezwe, yimunojeye nayo yakanze myenda yakwe. No munhu wo wose mono kogapamiza malenga gago, nayo kowa yakondya kwiyavufya sunga kono lyoswela lizuwa. 22Na muli cinhu co cose cono kocipamiza u munhu mwavufywe, hodu ne cinhu cico naco cowa cakondya kwavufywa. Nayo munhu mono kocipamiza cinhu cico, nayo kowa yakondya kwiyavufya. Holeka kokwikala mwavufywe, sunga kono lyoswela lizuwa.
Currently Selected:
Wuwale 19: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
