Wuwale 14

Wanhu wakung'ung'ulika

1Ne wanhu wakajendelela kulila ko wusungu wuwaha muno, cilo cose. 2Wakawa wakumung'ung'ulicila Musa na Haluni wakutya, “Yali yiwe yili ciba le, hono cali cifwile ku Misili, hamba bahano mono nyika! 3Alu so cici lo Muwaha Mulungu yakusaka yacitegule kuko ku yisi yiyo? Hambi nha cofwila mu wulugu, ne wagolece wetu nawo, hamonga ne wana wetu, wosolwa mateka. Alu si yali yiwe yili ciba le, hono cali ciwuye ne nyuma ku Misili?” 4Wakawa kulongana weneco wose wakutya, “Nye, alenyi cihagule mulongola mono kocigomola ne nyuma ku Misili.”

5Hobaho Musa na Haluni wakenama ho hasi, ha mwande ye wanhu wose. 6Nayo Yoshuwa u mwana wa Nuni, hamonga na Kalebi u mwana wa Yefune i watandizi wejete, wakayidemulanga myenda yawo ko wukalale, 7wakawa kuwalonjela wanhu wakutya, “Yisi yono cayitandila, yo yisi yo swanu muno muno. 8Na hono Muwaha Mulungu yendezwe nase, kocitegula sunga ko ku yisi yiyo, yacipele yisi yiyo yono yina moso hamonga no wugoli winji. 9Holeka mulece kuwa wafyuzi hali Muwaha Mulungu, hamba mulece kuwogopa i wanhu wono wekaye mu yisi yiyo. Cowasumiza musunho du, hambi Muwaha Mulungu nha yali hamonga nase. Nayo nha yakondya kuyisumiza milungu yawo yono wayitumbiye, holeka mulece kuwa na woga.” 10Ne mhuga yose wali wewikaniza ho wawatowanje ne mabwe Yoshuwa na Kalebi sunga wafwe. Ninga wanhu wakaluwona nhinicizo u lukumyo lo Muwaha Mulungu lukwijela hacanyha ye Lihema lyono Lyelile.

Musa yakuwalombela wanhu

11Muwaha Mulungu yakamulonjela Musa yakatya, “Alu mwene, i wanhu wawa wojendelela kumbedegala sunga nili? Hamba wojendelela kulema kunyitumbila 'ne sunga nili, hamba niwe netuma mapoto menji hali wene? 12Hodu, nane nowaletela lihuhuji liwongomeze. Ninga agwe Musa, nokunoza wuwe we nghungugo mbaha muno, yono yowa yili vilungo muno muno si nha wene!”

13Ninga Musa yakamulonjela Muwaha Mulungu yakatya, “Gwe go Muwaha Mulungu, yo gwegwe mono wawawusa wanhu wawa ku Misili kwe vilungo viwaha muno. Holeka hono Wamisili wahulice zono wawatendela wanhu wako, 14na mbeka wosuma kuwalonjela i wanhu wono wekaye mu yisi yiyi. Hambi i wanhu wawo, nha wakondizye kumanya vyono, agwe go Muwaha Mulungu wuli hamonga nase, nagwe mbeka wukwijela ciwonelela, lono livunde lyako limile hacanyha yetu, na vyono kanyhi agwe, wukucilongolela ku mwande yetu ne lisumbili lye livunde ku misi, na ku cilo nako wukucilongolela ne lisumbili lyo moto. 15Alu hono wuwawulaje wanhu wako wose, i makungugo wono wazihulika zo lukumyo lwako koleka watye, 16kuwawulajila wanhu wako mu nyika, vyono kulemegwa kuwafisa sunga ko ku yisi yono wawehuwiza vyono kowapela. 17Holeka alu go Muwaha Mulungu, nghukulomba, wucilajile vilungo vyako, witume nha vyono wehuwiza lono watya nhavi, 18‘Ane no Muwaha Mulungu, si nili mupelu kukolwa ne likuwo mbela, kanyhi ndajilaga zo lusungu lwangu luwaha, hamonga no wihuwilwa wangu, kanyhi nili munenezi wo wubi, hamonga no wufyule. Ninga hamba nhavivyo, nowalipiciza wana hamonga ne wezukulu, sunga ko ku lulelo lwe kadatu na lwe kane so wubi we walezi.’ 19Holeka alu 'gwe go Muwaha Mulungu, ku so wuwaha wako, no lusungu lwako, lono silupitukaga, nghukulomba wuwanenelaje wanhu wawa wubi wuwu, nha vyono kuwanenelaga du, ku wulawa lono wawuka ku yisi ya Misili.”

20Nayo Muwaha Mulungu yakamupitula Musa yakatya, “Ale, hodu, nowanenela nha vyono wulombile. 21Ninga nghwihuwiza vyono, nha vyono ane nikalaga mumi, na kanyhi nha vyono lukumyo lwangu lumemile mono yinze yose, 22hasina munhu hamba monga wa muli wawa, mono kokwikala mumi sunga yaze yenjile mu yisi yiyo. Hambi nha waluwona lukumyo lwangu lono lukundajila vyono nili baho, kanyhi wakagawona ne mapoto gono naganoza mu yisi ya Misili, sunga na mono nyika, kanyhi wakanjela no wukangalizi wangu kali kenji, ninga hamba nhavivyo, si wahulika 'ne yaye. 23Holeka si wokwinjilila lukulu mu yisi yono nawehuwiza walezi wawo. Kanyhi hasina hamba monga wa muli wawo wono wakumbeza, mono kosuma kwinjila mu yisi yiyo. 24Ninga lu, ku soko yo mwitumami wangu Kalebi, mono yena muhe wunji, kanyhi vyono yajendeleye kuwa ne cihuliko kuli'ne, yuyo langa yo nosuma kumufisa hamonga ne zindelo zakwe sunga ko ku yisi yono yabita kuyitandila, nawo woyihala yisi yiyo, 25ya mu malolo mono Waamaleki, hamonga ne Wakanani wekaye. Holeka i mitondo lu, mupituce mubite mu nyika, mutyatye nzila yono yibitile kwi'lenga lya Shamu.”

U Muwaha Mulungu, yakuwalipiciza wanhu, so mang'ung'uliko gawo

26Muwaha Mulungu, yakawalonjela Musa na Haluni yakawatya, 27“Alu mwene, i wanhu wawa wabi, wojendelela kung'ung'ulicila sunga nili lo? Hambi nha nacilwa muno ne mang'ung'uliko gawo gaga! 28Holeka aluno, wuwapitulaje wutye nhavi: Nghwilahiza nha vyono mbeka, ane nikalaga mumi, nokwituma nha vyono wulombile. Ane no Muwaha Mulungu, vyo natya. 29Anye mofwa, ne mivimba yenyu yokwiyagalila mu muno mono nyika du. Hambi nha mukung'ung'ulicila muno. Holeka hasina hamba monga wa muli nyenye, mono yaficile myaka yono yicizize myaka makumi mejete, mono kosuma kwinjila mu yisi yiyo. 30Nali nihuwize vyono, anye wose mokwikala mu yisi yiyo, ninga luno, hasina hamba monga wa muli nyenye mono kosuma kwinjila mu yisi yiyo, langa Kalebi du na Yoshuwa, wo wosuma kwinjila. 31Kanyhi anye mukutya vyono, i wana wenyu, wosolwa mateka, ninga ane nowafisa sunga ko ku yisi yiyo yono anye mwakondya kuyilema, nayo yisi yiyo, yowa yo yisi yawo. 32Ninga anye mofwila mumuno du mono nyika yi yino. 33Ne wana wenyu nawo, woyegayega mumuno mono nyika yiyi myaka makumi mane, hamonga ne magayo, ku soko yo wula wihuwilwa wenyu, sunga kolo yafwiza u muyenyu we ndumilizo. 34Nanye motuga magayo ku soko yo wubi wenyu, mu myaka makumi mane. Nayo yowa, mwaka monga wukwinjila mwi'zuwa limonga, lya mu vilo vivilya makumi mane vyono mwetumamila, lono mwayitandilila yisi. Nanye ho mosuma kumanya i cambuzi co kunema 'ne! 35Nane nghwilahiza vyono nomutendelenyi zizi, anye mo wanhu wabi, mono mwekongholela hamonga ho muneme 'ne. Nanye mbeka wose mofwila mono nyika du. Ane no Muwaha Mulungu nalonga.”

36Nawo wanhu wono Musa yawatuma wabite wakayitandile yisi, wawo wo waleta zinghani zimbi, zono zambuza sunga ne wanhu wamung'ung'ulicile Muwaha Mulungu. 37Holeka nayo Muwaha Mulungu yakawatowa ne lihuhuji, wakafwa. 38Na muli wawalya wanhu we likumi na wejete, wono watumwa wabite wakayitandile yisi, nawo wose wakafwa, wakasigala Yoshuwa na Kalebi du.

Wujele wulongozi wo kuyihoma yisi

(Kum 1:41-46)

39Nayo Musa, yali yeza kuwalonjela i Waisilayeli zono Muwaha Mulungu yalonjile, Oo, wakalila muno ko wukalale. 40Ne mitondo yaco, wakelawa hakali mitondo muno muno, wakawa kwanza kuyihoma yisi ye matunda akuno wakutya, “Alu cakondya kwiwikaniza ku winjila i hanhu hono u Muwaha Mulungu yacihuwiza. Ninga cikuvumila vyono cili wasutyi.”

41Ninga Musa yakawatya, “Alu nye, nhawulenyi musina cihuliko kuli Muwaha Mulungu? Hambi nha si mosuma cinji yaye! 42Holeka mulecele lukulu kubita, hambi Muwaha Mulungu nha si yali hamonga nanye. Ne walugu wenyu womusumenyi du. 43Na kolo mweza kwihoma ne Waamaleki hamonga ne Wakanani, anye wose mowulagwa mumalicile mu wulugu. Hambi Muwaha Mulungu nha si kowa yali hamonga nanye, hambi 'nye nha mwalema kumutyatya mwene.”

44Ninga hamba nhavivyo, wene vyo wakazezepa du, wakawa kubita ku yisi ye matunda. Ninga Lisanduku lye Cilagane hamonga na Musa, wasigala ku nghambi du. 45Hobaho, Waamaleki hamonga ne Wakanani, wono wekalaga mu yisi yiyo ye matunda, wakawaziza, wakawahoma, wakawasumiza, wakawawulaga, akuno wakuwawinjiliza sunga ko ku Holema.

Currently Selected:

Wuwale 14: LLKWW

Highlight

Compare

Copy