Nahumu 1

1Ayi yo nghani kuli Ninawi,

nha vyono yagubulilwa Nahumu

mono yali munya Elikoshi.

Likuwo lyo Muwaha Mulungu kuli Ninawi

2U Muwaha Mulungu sikowakangalila

wono wakwisumaniza nayo,

langa kawalipicizaga wose

wono wakumupinga-pinga,

na mwi'kuwo lyakwe,

mwene mo kawalipicizizaga.

3Langa mwene Muwaha Mulungu,

sikakolwaga ne likuwo mbela,

ninga yali vilungo,

hamba sikalekaga kuwulipiciza wubi.

Ho hose hono Muwaha Mulungu yakukola,

cijelaga civulavumbi.

Ne mavunde,

go manghundi gono galawaga mu magulu gakwe.

4Nayo kalilajilizaga lilenga,

nalyo liwa kunyala,

kanyhi kanyazaga ne makolongo.

Sunga ne migunda

yono yili ku Bashani yiwa kunyala,

ne litunda lya Kalimeli nalyo,

liwa ne liwala nha lye mahanze gono ganyalile,

ne maluwa ga ku Lebanoni gawa kuwomba.

5Ne matunda gawa kucicima

ha mwande yo Muwaha Mulungu,

ne vigongo vyayo viwa kwenjeduka

ha mwande yakwe.

Nayo Muwaha Mulungu,

kolo yakwilajila,

yisi yiwa kusinjisika,

yinze hamonga ne wanhu wose wawa kucicima.

6Nani mwene mono kosuma kupona,

kolo mwene yakukolwa likuwo?

Hamba nani mono kolosuma kusigala

mu wogofye we likuwo lyakwe?

Yakwita lilambi lye likuwo lyakwe,

ne matalawe gakubiduka

mu manghundi ha mwande yakwe.

7U Muwaha Mulungu muswanu,

kawadimaga wanhu wakwe

mu cipango co wugaye;

kawakamisaga wose wono wakumuwuyila mwene.

8Langa mwene kawongomezezaga lukulu walugu wakwe,

nhe 'hwazi lyono likuhuluma.

Nawo wono wakwisumaniza nayo,

kawafisaga sunga ko ku wufwe wawo.

9Alu mukwihwesa cici muli Muwaha Mulungu?

Mwene komuhodanjenyi.

Hamba hasina yunji kanyhi mono kokwidoma nayo.

10Nanye mo wagalo 'jimbi,

molotakamizwa nhe mamivya

gono gedawilize ne mahanze makavu.

11Ku wulawa kuli'gwe Ninawi, yakaza munhu mono yali yamemile wuhile wo wubi, mono yakwihwesa vibi kuli Muwaha Mulungu. 12Azi zo yakulonga u Muwaha Mulungu kuli wanhu wakwe Waisilayeli yakutya, “Hamba yiwe Waashuli wali vilungo kanyhi wenji, ninga wene wohodangwa no kuwusizwa lukulu. Heya nyo wanhu wangu, nghamunozenyi mugaye, ninga sinomutendelenyi kanyhi nhavivi. 13Nane aluno novidumya i vilungo vye Waashuli kuli'nye, kanyhi noyidumula ne minyolo yono muwopeywe.” 14Azi zo Muwaha Mulungu yalamuye kuli Waashuli, “Si wolowa na lulelo kanyhi lono lolocemwa mwi'tagwa lyawo. Novihodanga vihwani vyono vili mu wuhembelo we milungu yawo. Kanyhi nghuwikaniza citenjelo ku soko ye Waashuli, hambi nha si yiwanojeye wekale womi.”

15Lanje, u muganuzi yakuza yakulawa mucanyha ye matunda, hamonga no luganuzi Luswanu, mono yakwanza zo mulamu. Mwene yali mu nzila yakwe ho yanze zo wusume. Nanye nyo wanhu wa Yuda, mwibate zi sikukuu, kanyhi mumufisilizize Mulungu vyono mwamwihuwiziza. Hambi i wabi, nha si wolokwinjila kanyhi no kuyihoma yisi yenyu. Hambi nha wakondya kuwusizwa lukulu!

Currently Selected:

Nahumu 1: LLKWW

Highlight

Copy