Walawi 8

Witilwe we mafuta wa Haluni hamonga ne wanagwe

(Wut 29:1-37)

1Muwaha Mulungu yakamulonjela Musa yakatya, 2“Ale musolaje Haluni hamonga ne wanagwe, wuwategule sunga ha mulango we Lihema lyono lyelile. Wuleteleze ne myenda yo wukohani, ne mafuta go witile, ne ng'ombe ye cilavywa co wubi, hamonga na nduwilu nyejete, ne nhoto yono yina mikate yono yisina cisase. 3Hanyuma wuwakongholele hamonga baho mhuga yose.”

4Nayo Musa yakanoza nha vyono Muwaha Mulungu yamulajiliza yanoze. Na lono mhuga yali yekongholela hamonga, 5yakawalonjela yakatya, “Alu ane neza kwituma nha vyono Muwaha Mulungu yandajilize nitume.”

6Hodu Musa yakawa kuwaleta Haluni hamonga ne wanagwe ha mwande, yakawa kuwahovuga mu malenga cihembihembi. 7Hanyuma yakawa kumuvwika Haluni shati ne lisweko lya mucanyha yayo, yakawa kumuwopa no musipi mu ciwino. Yakamuvwika ne efodi, yakayiwopeleza yiyo efodi ko musipi wayo mu ciwino. 8Yakamuvwika ne cifuko ca ha mhambaga, yakawa kutajila Ulimu na Tumimu mu cifuko cico. 9Yakamuvwika no mukumbo mu mutwe wakwe, na ha mwande yo mukumbo yakawicila wihambo wa zahabu, co citanjilo co wusiwanulwe, nha vyono Muwaha Mulungu yamulajiliza.

10Hanyuma Musa, yakawa kusola mafuta go witile, yakalitila Lihema lyono lyelile hamonga ne vinhu vyose vyono vili mugati yalyo. Na mu nzila yiyo, yakawa kulyeza so Muwaha Mulungu. 11Yakasola kanyhi mafuta ganji go witile, yakagamiziza mu cikumbicilo kali mupunghati, hamonga na mu viya vyayo, na mu ciya ce shaba co wizuguzizo, ne litende lyayo, ho yalyeze so Muwaha Mulungu. 12Musa yakamusiwanula Haluni ko kumwitila mafuta go witile mu mutwe wakwe. 13Hanyuma Musa ho yakawa kuwasejeleza ne wana wa Haluni ha mwande, yakawa kuwavwika zi shati, yakawawopa ne misipi mu viwino vyawo, yakawavwika ne zikofiya mu mitwe yawo, nha vyono Muwaha Mulungu yamulajiliza.

14Hanyuma, Musa yakawa kuyileta ng'ombe so cilavywa co wubi. Nayo Haluni hamonga ne wanagwe, wakayijeleka miwoko yawo mu mutwe we ng'ombe yiyo. 15Musa yakawa kuyisola ng'ombe yiyo, yakawa kuyiwulaga. Yakayisola sakami yayo, yakayibaka mu mahembe ge cikumbicilo gose vyono mane kwe cidole cakwe, yakaceza cikumbicilo. Hanyuma i sakami yono yali yikali yisigaye, yakawa kuyita baho hasi ye cikumbicilo. Na mu nzila yiyi, yakawa yacisiwanula no kuceza cikumbicilo. 16Hodu, Musa yakawa kuyisola mhama yose ya mu wutumbu, ne nhandamala ya mwi'toga, ne mhama ya mu zifigo ne zifigo zayo, yakawa kuvikongoga vyose mu cikumbicilo. 17Yakawa kusola kanyhi sunga ne nyama yono yali yisigaye, hamonga ne nyhingo yayo, no wutumbu wayo, yakawa kubita kuvikongojela kunze ye nghambi, nha vyono Muwaha Mulungu yamulajiliza.

18Hanyuma kanyhi Musa yakasola nduwilu ye cilavywa cinyanywe. Nayo Haluni hamonga ne wanagwe, wakajeleka miwoko yawo mu mutwe we nduwilu yiyo. 19Musa yakawa kuyiwulaga, yakayisola sakami yayo, yakayimiziza mu cikumbicilo mu zimbavu zayo zose vyono yine. 20Yakawa kuyisola nyama ye nduwilu, yakawa kuyitemasa. 21Yakawa kuwusola wutumbu wayo, yakawa kuwukwema ne malenga hamonga ne migulu yayo. Hanyuma yakawa kuyisola mhama, hamonga no mutwe, na vinji vyose vyono vyali visigaye vya mu mudunhu we nduwilu, yakawa kuviticimiziza mu cikumbicilo, nha vyono Muwaha Mulungu yamulajiliza. Ne cilavywa cicino cinyanywe cikawa co cilavywa ca ndigwa. Ne mhunjile yayo yikwendeza kuli Muwaha Mulungu.

22Hanyuma Musa yakawa kuyileta nduwilu ye kejete, yono yali cilavywa so wusiwanule. Nayo Haluni hamonga ne wanagwe wakajeleka miwoko yawo mu mutwe we nduwilu yiyo. 23Musa yakawa kuyiwulaga, yakayisola sakami yayo, yakamubaka Haluni ku sonje ye likutu lyakwe lyo kulume, na mwi'dole kululu lyo muwoko wo kulume, na mwi'dole kululu lyo mugulu wakwe wo kulume. 24Hanyuma yakawa kuwasola i wana wa Haluni, nawo yakawabaka sakami mu visonje vye makutu gawo go kulume, na mu madole kululu ge miwoko yawo yo kulume, na mu madole kululu ga mu migulu yawo yo kulume. Musa yakawa kuyisola sakami yono yali yisigaye, yakayimiziza mu cikumbicilo mu zimbavu zayo zose vyono yine. 25Hanyuma yakawa kuyisola mhama, no mucila wayo, ne mhama yono yifunicize wutumbu, ne nhandamala yono yili mwi'toga, ne zifigo, ne mhama yayo hamonga ne cima co mugulu wo kulume. 26Yakasola no mukate monga mu nhoto yono yina mikate yono yisina cisase, yono milavywe kuli Muwaha Mulungu, no mukate monga, munoze hamonga ne mafuta, na bisikuti monga, yakavijeleka mucanyha ye mhama ne cima co mugulu wo kulume. 27Yakawa kumupela Haluni vinhu vivi vyose, hamonga ne wanagwe. Nayo yakawa kuvinula, ho viwe cilavywa cinulwe hali Muwaha Mulungu. 28Hanyuma kanyhi Musa ho yakawa kuvisola ku wulawa mu miwoko yawo, yakawa kuvikongoga mu cikumbicilo, mucanyha ye cilavywa cinyanywe, ciwe co cilavywa co wusiwanule. Navyo vyali co cilavywa ce ndigwa, ne mhunjile yayo yikwendeza kuli Muwaha Mulungu. 29Hanyuma Musa yakawa kuyisola nyama ye ng'hwa, yakawa kumulavizya Muwaha Mulungu, ho yiwe cilavywa cinulwe. Nayo nduwilu yiyo, yikawa lye 'gawo lya Musa ku wulawa mu mulimo wo wusiwanule. Nayo Musa yakanoza zose, nha vyono Muwaha Mulungu yamulajiliza.

30Musa yakawa kusola mafuta go witile ne sakami ndodo, yono yali yili mu cikumbicilo, yakawa kuwamiziza Haluni, ne wanagwe, hamonga na mu myenda yawo. Na mu nzila yiyino, yakawa yawasiwanula so Muwaha Mulungu Haluni hamonga ne wanagwe, sunga ne myenda yawo yose yo wukohani.

31Hanyuma Musa yakawa kuwalonjela Haluni hamonga ne wanagwe, yakawatya, “Ale, musole nyama yiyi, muyiwice ha mulango we Lihema lyono lyelile. Muyitelece, hanyuma muyilile baho du, hamonga no mukate wono wuli mu nhoto ye vilavywa vyo wusiwanule, nha vyono Muwaha Mulungu yalajiliza. 32Ninga nyama yoyose, hamba mukate, vyono movisigaza, nhondo muvikongogaje vyose mu moto. 33Kanyhi mulece kuwuka baho ha mulango we Lihema lyono lyelile, sunga kolo vyakondya kupuluta vilo mupunghati sunga vifisilizwe vilo vyo wusiwanulwe wenyu.”

34“Hambi Muwaha Mulungu nha yacilajiliza, cizitume zizino zono cizitumile zuwali, nha cinji cimunozezenyi wilamule. 35Holeka munojeye muwe baho du, ha mulango we Lihema vilo mupunghati cilo na misi, mukufisiliza zono Muwaha Mulungu yalajilize. Na hono mulece kuzifisiliza, mofwa. Nazo zizi zo Muwaha Mulungu yandajilize.” 36Nayo Haluni hamonga ne wanagwe, waketuma zose nha vyono Muwaha Mulungu yazilajiliziza muli Musa.

Currently Selected:

Walawi 8: LLKWW

Highlight

Compare

Copy