Walawi 5

Nghani zono zosakwa so cilavywa co wubi

1“Vilavywa so wubi, vyosakwa vilavywe so nghani azi zono zityatizye.

“Hono munhu yawe yacemigwe ne mahakama, yakalavye wuhomelezi, kuli zono yamanyile, nayo ho yaleme kulavya wuhomelezi kuli zono yawene, hamba kuli zono yahulice, munhu yuyo, kowa yanojeye yatuje wulipicizwe so nghani yiyo. 2Hono munhu yapamize cinhu co cose cavu wula kumanya, lunji mudunhu we nimu yono yifwiliye, hodu munhu yuyo kowa yakondya kwiyavufya mweneco no kwinjila mwi'sutya. Nayo kolo yakondya kumanya vyono kumbe kasutya, ale ho kowa musutyi. 3Hono munhu yapamize cinhu co cose cavu cono cilawile muli munhu wula kumanya vyono cavu, munhu yuyo kowa yakondya kwiyavufya mweneco no kwinjila mwi'sutya. Nayo kolo yakondya kwizuka vyono kumbe kasutya, ale, ho kowa musutyi. 4Hono munhu yelahize musunho muli cinhu co cose wula kwihwesa, kowa yenjila mwi'sutya kolo yakwizuka du cono yetumile. 5Na kolo munhu yavumila vyono musutyi, yimunojeye yanene wubi wakwe, 6kanyhi yimunojeye yalavye ngholo nyhekulu hamba mhene, yiwe co cilavywa cakwe co wubi wakwe kuli Muwaha Mulungu. Nayo mukohani komunozeza munhu yuyo wilamule, so wubi wakwe.

7“Na hono munhu yawe siyakusuma kulavya ngholo hamba mhene, kosuma kuleta nghunda nyejete, hamba nziwa nyejete kuli Muwaha Mulungu, monga yiwe cilavywa co wubi wakwe, ne nzagwe nayo yiwe so cilavywa cinyanywe. 8Nayo yavilete kuli mukohani. Nayo mukohani yamule yayilavye ndeje ye cilavywa co wubi. Ninga yayibenaje singo yayo, yalece kuwunyomhola mutwe wayo, 9yayimize sakami yayo yinji mu lubavu lwe cikumbicilo. Ne sakami yono yowa yikali yisigaye, yayisuluze baho hasi ye cikumbicilo. Ne sakami yiyo, cowa co cilavywa co wubi. 10Hanyuma lu, ho yasole yi yilya ndeje ye kejete, nayo yayilavye so cilavywa cinyanywe, nha vyono winha wulajilize. Na mu nzila yiyo du, mukohani vyo komunozeza wilamule so wubi wakwe. Nayo munhu yuyo konenelwa wubi wakwe.

11“Na hono munhu yawe si kosuma kulavya nghunda nyejete, hamba nziwa nyejete, kosuma kuleta kilo monga yo wusaje, wuwe so cilavywa co wubi. Ninga yalece kutajila mafuta hamba wuvumba wo wose mu wusaje wuwo, hambi nha cilavywa co wubi, hamba si cilavywa ca wusaje du yaye. 12Nayo yawulete kuli mukohani, no mukohani nayo yawuneje yiganza limonga, ciwe co citanjilo vyono wusaje wuwo wulavywe kuli Muwaha Mulungu. Hanyuma yawukongoje mu moto mu cikumbicilo, nawo wowa co cilavywa ce ndigwa. Kanyhi co cilavywa co wubi. 13Nayo mukohani komunozeza wilamule so wubi munhu yuyo wono yawitumile. Nayo munhu yuyo konenelwa wubi wakwe. No wusaje wono wowa wukali wusigaye, wowa sawo yo mukohani, nha vyono yinha du mu cilavywa co wusaje.”

Cilavywa co wusutye

14“Muwaha Mulungu yakamulajiliza Musa yakatya, 15Hono munhu yasutye wula kumanya, so wulemwa kuleta cilavywa co wusutye, cono cisiwanuliywe Muwaha Mulungu, ale, munhu yuyo yanojeye yalete nduwilu nhelevu, yono yisina cilema co cose, hamba mhene yono yisina cilema. Ne cifo cayo, ciweze ce nghango ye mapesa gono gakwitumamilwa mwi 'Hema lyono lyelile. 16Yahalize ku so wubi wono yawitumile, kanyhi yimunojeye yahalize hamonga no wonjeleze we ligawo lye nghango ye makumi mejete kwe 'gana. Nayo yayilete kuli mukohani, nayo mukohani komunozeza wilamule so wubi, munhu yuyo. Nayo munhu yuyo konenelwa wubi wakwe.

17“Hono munhu yasutye wula kumanya, yabene lilajilizo limonga lya muli malajilizo go Muwaha Mulungu, ale munhu yuyo kowalwa musutyi, yimunojeye yalavye cilavywa co wusutye. 18Nayo yimunojeye yalete nduwilu hamba mhene nhelevu yono yisina cilema co cose kuli mukohani, ciwe co cilavywa cakwe co wusutye. Ne cifo cayo ciweze ce nghango ye mapesa gono gakwitumamilwa mwi 'Hema lyono lyelile. Nayo mukohani komunozeza wilamule ku so wubi wo munhu yuyo wono yawitumile wula kumanya. Nayo munhu yuyo konenelwa wubi wakwe. 19Naco cowa co cilavywa co wusutye so wubi wakwe wono yetumile hali Muwaha Mulungu.”

Currently Selected:

Walawi 5: LLKWW

Highlight

Compare

Copy