Walawi 25

Mwaka wo mupunghati

(Kum 15:1-11)

1Muwaha Mulungu yakalongana na Musa mwi'tunda lya Sinayi, yakamulajiliza, 2yawalonjele wanhu wa Isilayeli yatye, “Kolo mwenjila mu yisi yono Muwaha Mulungu yakumupelenyi, munojeye mumupele Muwaha Mulungu cogopo, mu nzila yo kuleka kuyilima yisi, mu mwaka wo wose wo mupunghati. 3Muhadice migunda yenyu, muyidumulile ne mizabibu yenyu, mukonghole ne vilimwa vyenyu, mu myaka mutandatu du. 4Ninga mu mwaka wo mupunghati, wowa wo mwaka wo kuwuceheza muhangha we migunda yenyu, wo mwaka wono musiwanulwe kuli Muwaha Mulungu. Holeka mu mwaka wuwo, mulecele lukulu kupanha no kuhadika mu migunda yenyu, hamba mulece kuyidumulila ne mizabibu yenyu. 5Kanyhi mulecele lukulu kuhalaliza wuhemba wono wukwicindicila wuli wene yunji si yawuhadice, hamba kuhepa zabibu mu mizabibu yono si midumulile, hambi nha mwaka wono wunojeye muhangha wa mu migunda yenyu wuceheze. 6Hamba yiwe migunda si yilimigwe mu mwaka wuwo, ninga yosuma kulavya ndigwa yono yomukwilenyi nyenye ne wawanda wenyu, ne wetumami wenyu, ne wajenzi wono mwikalane nawo, 7ne mitugo zenyu, hamonga ne zinimu za mu mbago zono zili mwi'hala. Na co cose cono colelwa mumo mu muhangha, yowa yo ndigwa yenyu.”

Mwaka wo wuhogolwe

8“Nanye muwale myaka mupunghati yiwe kali mupunghati, no wutowelele wayo, yowa myaka makumi mane ne 'cenda. 9Ale, mwi'zuwa lye likumi lyo mwezi wo mupunghati, mwi'zuwa lyo wilamule, wutume munhu yatowe ndulele mu yisi yose. 10Na mu nzila yiyo, kowa wakondya kuwusiwanula u mwaka we makumi mahano, no kwanza zo wulecelwe wa kuli wose wekazi wa mu yisi yose. Na mu mwaka wuwu we makumi mahano, sawo yo yose yono yowa yali yaguzwa, yinojeye yagomolelwe munya sawo, hamba kuli wana wawo. Sunga na muli wose mono yali yaguzwa no kuwa muwanda, yuyo nayo yanojeye yalecelwe yawuye kuli wanduguze. 11Kanyhi mulecele lukulu kupanha no kuhadika mu migunda yenyu, hamba mulece kududula wuhemba wono wicindiciye wuli wene, hamba kuhepa zabibu mu mizabibu yono si midumulile. 12Mwaka mututu wuwo wose, weze musiwanulwe kuli'nye. Nanye molya cono migunda yolela yili wene.

13“Na mu mwaka wuwu, sawo yo yose yono yowa yali yaguzwa, yinojeye yagomolelwe munya sawo. 14Na lono wuwe wukuguza mugunda kuli Mwiisilayeli muyago, hamba lono wuwe wukugula kuli mwene, wulece kunoza ko wukoci. 15Langa wuguzi wayo, weze wiling'aniye no wuwale we nghango ye myaka yono mugunda wosuma kulavya ndudula yono yileceye mwaka wuwo wo wuhogolwe. 16Na hono yiwe yikali yisigaye, myaka minji ku wuficila mwaka wuwo, ale no wuguzi wudahile kuwa wuwaha. Ninga hono yiwe yikali myaka micefu du yono yisigaye, no wuguzi nawo wowa wudodo, vyono u wuwale we ndudula wono mugunda wosuma kulavya, no wuguzi wayo nawo wowa vyo winha. 17Holeka mulece kwikopa nyenye wose. Langa mweze muli cihuliko kuli Muwaha u Mulungu wenyu.”

Zi nghamu zono zili mu mwaka wo mupunghati

18“Holeka munojeye mweze ne cihuliko kuli malajilizo go Muwaha Mulungu, hamonga no wulajilize wakwe. Nanye ho mwikale mupolile mu yisi. 19Nayo yisi yolela mana gayo, nanye mosuma kuwa na vinhu vyose vyono mohila kulya. Kanyhi mokwikala mupolile. 20Lunji yunji yakuwuza yawe kutya, alu ho cowa kulya cici mwidaha lilyo lyo mwaka wuwo wo mupunghati, lono hasina mugunda wo wose wono wohadikwa, hamba kuwa na wuhemba wono codudula. 21Ninga Mulungu koyilugutiza yisi mu mwaka wo mutandatu, yisi ho yisume kulela ndigwa yono yokwila mu myaka myejete. 22Na lono mowa mweza kupanha no kuhadika, mu mwaka wo munana, mowa mukali kulya ndigwa yono mwayidudula mu mwaka wo mutandatu. Na mu mwaka wuwo mojendelela kulya ndigwa yiyo sunga kolo mwadudula ndudula yo mwaka wuwo wo munana.”

Wukomboze we zi sawo

23“Wulanjilile, wulece kuwuguziza lukulu mugunda wako, vyono yisi si yenyu nyenye, langa yangu nene no Mulungu. Anye nha muli wajenzi du mono mukomboleywe yisi ho muyitumamile.

24“Holeka lono mugunda waguzwa, yinojeye ling'ani ya munya mugunda yiwe yikali yimanyice, vyono yo mwene mono kowukomboza kanyhi. 25Na hono Mwiisilayeli yawe yaciwapa, sunga yadindimizwe no wuciwa wakwe, yawe kuwuguza mugunda wakwe, ale u nduguye we behi, yo yawukomboze mugunda wuwo. 26No munhu hono yawe yasina nduguye we behi, mono kosuma kuwukomboza wuwo mugunda, ninga hanyuma, ho kasuma kutuga wulugutwe no kuwa ne vinhu vyono vikwiliye, vyo kuwukombozeza mweneco mugunda wuwo. 27Na mu nghani yono yinha yiyi, munhu yuyo, yimunojeye yamugomolele mono yamuguziza, mu nghango ye myaka yono yisigaye, ku wuficila mwaka wo wuhogolwe, nayo ho yasume kuwusola mugunda wakwe kanyhi. 28Ninga hono yawe yasina mapesa gono gokwila, go kuwukombozeza mugunda wakwe, hodu, mugunda wuwo, wikalaje du na mono yawugula, sunga mu mwaka wo wuhogolwe. Na mu mwaka wuwo wo wuhogolwe, mugunda wuwo wo wuhogolwe wugomolwe kuli munghalaco.

29“Hono munhu yaguze kaya yakwe, yono yili mwi'kaya lyono lipilimwe ne lijinji, munhu yuyo, kosuma kuyikomboza yiyo kaya yakwe, mu mwaka monga, mu wulawa lizuwa lyono yayiguziza kaya yiyo. 30Na hono yalece kuyikomboza mu cidaha cico, hodu kowa yakondya kuyajiliza, mono yayigulile kaya yiyo, hodu koyisawila lukulu, yowa sawo yakwe hamonga ne wanagwe. Si yosumika kanyhi kukombozwa hamba mu mwaka wo wuhogolwe. 31Ninga zikaya zono zizenjigwe mwihala, azo zinozezwe nha vyono migunda yikunozezwa. U munya mugunda kowa yena ling'ani yo kuwukomboza mugunda wakwe. Kanyhi yowa ling'ani zigomolwe kuli wanghalaco mu mwaka we makumi mahano wo mwaka wo wuhogolwe. 32Hamba nhavivyo, i Walawi wena ling'ani yo kuzikomboza mu mapango gogose zisawo zawo, zono zili mu makaya, zono wali wakondya kuziguza. 33Na hono hawe hoyili kaya mu makaya gaga, yono yali yaguzwa no Mulawi, nayo kaya yiyo yiwe yikali nakombozwa, ale, kaya yiyo yinojeye yigomolwe kuli munghalaco mu mwaka wo wuhogolwe. Ku soko vyono zikaya zono zili mu makaya gawo, zono Walawi wezenjeye weneco, zizo nha sawo yawo du vilo vyose, mu wanhu wa Isilayeli. 34Ninga mugunda wo wudimilo wawo, wono wupilime makaya ge Walawi, awo wulecele lukulu kuguzwa, hambi wuwo nha sawo yawo cibitilila.”

Nzila yo kuwakopesha i waciwa

35“Na hono hawe hoyuli nduguyo Mwiisilayeli, mono mwikalane behi nayo, ho yawe yaciwape, mono si yakusuma hamba kwitaza mweneco, ale yikunojeye agwe wumutaze mu wanjile wakwe, wumunozeze nha vyono wali wumunozeze mwitumami wako, nayo holeka kosuma kujendelela kwikalana behi nagwe. 36Kanyhi wulecele lukulu kumusolela cambuzi, langa wumogope Mulungu wako. Kanyhi wumulekaje yuyo nduguyo yekalane behi nagwe. 37Wulece kumusolela cambuzi mu mapesa gono wumukopeshe, hamba kutuga cambuzi mu ndigwa yono wumuguzize. 38Ane yo nene Muwaha, u Mulungu wenyu mono namuwusenyi ku yisi ya Misili, ho nimupelenyi yisi ya Kanani, kanyhi ho niwe Mulungu wenyu.”

Wulecelwe we wawanda

39“Na hono nduguyo Mwiisilayeli mono mwikalane behi nayo, yawe yaciwapa hawaha, sunga yawe kwiguza kuli'gwe nha muwanda, ninga agwe wulece kumwitumya nha muwanda. 40Langa kosuma kwikalana nagwe nha mwitumami du, nayo kokwitumamila sunga mu mwaka wo wuhogolwe wono wukutyatya. 41Na mwidaha lilyo yikunojeye wumulecele mwene, hamonga ne wanagwe, yawuye kuli walezi wakwe na kuli wanduguze. 42Weze kumanya vyono i wanhu wa Isilayeli, wo wetumami wo Muwaha Mulungu, vyono yo yawawusa mu yisi ya Misili. Holeka si wanojeye waguzwe ku wuwanda. 43Holeka, wulece kumwiwonela, langa wumuhulice Mulungu wako. 44Ninga langa hono muwe mwendile kuwa ne wawanda, ale, mosuma kuwagula mu wulawa mu makungugo gono gamupilimenyi. 45Na hono mwende, mosuma kuwagula i wana we wajenzi, wono mwikalane nawo. Ko muno i wana walelelwa mu yisi yenyu, awo wadahile kuwa sawo yenyu. 46Nanye mosuma kuwanoza wawe wuhazi kuli wana wenyu, wono wosuma kuwetumamila mu vilo vyose vyo wikale wawo. Ninga mulanjilile, mulece kuwewonela Waisilayeli wandugu zenyu.

47“Nalunji u mujenzi mono mwikalane nagwe yagolipa, lono nduguyo Mwiisilayeli kawa muciwa, no kwiguza mweneco yawe muwanda kuli yuyo mujenzi, hamba lunji kuli yumonga wo lulelo lwe mhuga ya yuyo mujenzi. 48Ninga hamba yawe yakondya kwiguza kuko, kowa yakali yena ling'ani yo kukombozwa na yumonga wa muli wanduguze wono vihanjile walezi, 49hamba kukuye, hamba mwana wo kukuye, hamba yumonga wa muli wanduguze we behi, wosuma du kumukomboza. Hamba lunji mweneco hono yawe yakondya kutuga sawo, ale, kosuma kwikomboza mweneco. 50Nayo yowa yimunojeye yalongane no munhu yuyo mono yali yamugulile, ho wawalane myaka, ku wulawilila mwi'pango lyono yeguziza mweneco kuli munhu yuyo, sunga mwi'pango lyo mwaka wo wuhogolwe wono wukutyatya. Ne nghombola yakwe, vyeze viling'aniye ne nghango yono viling'aniye no musahala wono wukuwa kulipwa ko mwitumami. 51Hono yiwe yikali yisigaye myaka minji, sunga lono yoficila myaka makumi mahano yo wuhogolwe, hodu, kohaliza mu nghango ye cifo co wukombozwe wakwe mu sawo yo wuguzi wakwe. 52Na hono yiwe yikali yisigaye myaka micefu sunga mu mwaka we sikukuu ye Jubilii, komuwalila munghango ye myaka yono yowa yikali yisigaye, 53yiwe kotya, nha mono yali mwitumami wa mwaka monga monga. Ninga nayo muwaha wakwe, yalece kumwiwonela. 54Na hono yalece kusuma kwikomboza mweneco, muli zinzila zizi zose, hodu, u mwene hamonga ne wanagwe, wanojeye walecelwe mu mwaka wo wuhogolwe. 55Mumanye vyono, si yisumice kuli Mwiisilayeli yawe muwanda cibitilila. Hambi Waisilayeli nha wetumami wo Muwaha Mulungu. Mwene yawawusa mu yisi ya Misili, nayo yo Muwaha u Mulungu wawo.”

Currently Selected:

Walawi 25: LLKWW

Highlight

Compare

Copy