Walawi 17

Wele we sakami

1Muwaha Mulungu yakamulonjela Musa, 2nayo Musa yamulonjele Haluni hamonga ne wanagwe, ne Waisilayeli wose wulajilize awu, 3Mwiisilayeli wowose mono kowulaga ng'ombe, hamba ngholo, so kumulavizya Muwaha Mulungu, 4hono yalece kuyiwulajila ha mulango we Lihema lyono lyelile, munhu yuyo kowa yabena wulajilize. Kamwaga sakami caka, holeka nayo, si kowalilizwa ne wanhu wo Mulungu. 5Ne nhunizo ye lilajilizo lili, yoyi, i wanhu wa Isilayeli ku wulawa zuwali, weze kuzileta mitugo zawo kuli Muwaha Mulungu, mitugo zono waziwulajilaga ako na ako mu'si. Alu yiwanojeye wazilete zose kuli mukohani, ha mulango we Lihema lyono lyelile. Nawo waziwulajile baho, so cilavywa co mulamu. 6Nayo mukohani yasole sakami, yayimize mu zimbavu zose ze cikumbicilo ca baho ha mulango we Lihema. Hanyuma yayikongoje mhama, ho yilete mhunjile swanu yono yikwendeza kuli Muwaha Mulungu. 7Holeka aluno wanhu Waisilayeli, walecele lukulu kuwa si wehuwilwa kanyhi kuli Muwaha Mulungu, walece kuziwulaga kanyhi mitugo zawo caka caka ako na ako mu mawimbi, nha vyono walavyaga kuli milungu ye mvulati yono wayihembaga. Holeka i wanhu wa Isilayeli, yiwanojeye walikamise lilajilizo lili sunga mu vilo vyono vikuza.

8Holeka Mwiisilayeli wo wose, hamba mujenzi mono kekalanaga nawo, mono yakulavya cilavywa cinyanywe, hamba cilavywa ce liwala lyo lyose, 9kuli Muwaha Mulungu, mono kolavizya cilavywa cico caka caka ako na ako, yalece kuleta no kulavizya ha mulango we Lihema, munhu yuyo si kowalilizwa kanyhi hamonga ne wanhu wo Mulungu.

10Na hono Mwiisilayeli wo wose, hamba mujenzi mono wekalane, hono yalye nyama hamonga ne sakami yayo, hodu Muwaha Mulungu komuleka, si kowalilizwa kanyhi hamonga ne wanhu wo Mulungu. 11Vyono, wumi wa muli vyose vyumi vya mono'nze, nha wuli mu sakami, na yiyi yo soko yono yikuleka Muwaha Mulungu yakulajiliza vyono sakami yose, yinojeye yitilwe mucanyha ye cikumbicilo, ho yinoze wilamule. Sakami yono wo wumi, yo yikunoza wilamule. 12Na yiyi yo soko yono yikuleka Muwaha Mulungu yakuwalonjela wanhu wa Isilayeli vyono, weneco hamba mujenzi mono yekalane nawo, walecele lukulu kulya nyama hamonga ne sakami yayo.

13Na hono Mwiisilayeli hamba mujenzi mono yekalane nawo, yapelembe nimu, hamba ndeje, yono si iwifyo, ale yimunojeye yayite sakami yayo hasi, yayifucize no muhangha. 14Vyono wumi we vyumi vyose vya mono'nze, nha wuli mu sakami. Na yiyi yo soko yono yikuleka Muwaha Mulungu yakuwalonjela wanhu Waisilayeli, vyono walecele lukulu kulya nyama hamonga ne sakami yayo. Na hono yunji yejelele, hodu munhu yuyo si kowalilizwa kanyhi ne wanhu wo Mulungu.

15No munhu wo wose, hono yawe Mwiisilayeli hamba yawe mujenzi, mono kolya nyama ya nimu yo yose yono yifwiliye yeneco, hamba yono yiwulagwe ne zinimu za mu mbago, yimunojeye munhu yuyo yakanze myenda yakwe, yehovuje no muwili wakwe, ninga kojendelela kwikala nhavivyo sunga lizuwa kono lyoswela, nayo ho kowalwa vyono yakondya kwezwa. 16Na hono yalece kuwutyatya wulajilize wuwu, munhu yuyo kolipicizwa.

Currently Selected:

Walawi 17: LLKWW

Highlight

Compare

Copy