Yoshuwa 24

Yoshuwa yakulonga ne wanhu ha Shekemu

1Ale, Yoshuwa yakawakonghola hamonga we milango yose ye Waisilayeli ha Shekemu. Yakawacema wanyamhala, hamonga ne walongola ne wahakimu, hamonga na wono wena wulajilize muli Waisilayeli. Wose wakawa kuza hali Muwaha Mulungu. 2Nayo Yoshuwa yakawalonjela wanhu wose yakawatya, “Azi zo yakulonga Muwaha Mulungu, u Mulungu we Waisilayeli, yakutya, ‘Ikatali walezi wenyu wekalaga ku nhumbi nzagwe ye likolongo lya Efulata. Nawo wahembaga milungu yinji. No yumonga wa muli wawo walezi yo Tela, ne wanagwe we cilume, Abulahamu na Naholi. 3Baho, nghamusola Abulahamu, u mulezi wenyu, ku wulawilila ku yisi ya ku nhumbi ya Efulata, nghamujendya mu yisi yose ya Kanani. Nghamupela wana wenji. Nghamupela Isaka, 4na muli Isaka, nghamupela Yakobo na Esawu. Nghamugawila Esawu yisi ya mu matunda ya Edomu, ho wuwe wuhazi wakwe, ninga u mulezi wenyu Yakobo hamonga ne wanagwe, wakabita ku Misili. 5Hanyuma nghamutuma Musa na Haluni, nghayiletela Misili magazo menji. Ninga 'nye nghamuwusenyi. 6Nghawawusa ne walezi wenyu ku Misili, nawo Wamisili wakawatyatya wena ne matuka go wulugu, ne wapanda zifwalasi. Ninga lono walezi wenyu wali wafika he 'lenga lya Shamu, 7wakalomba wutazi kuli'ne, ho niwataze. Nane nghawika citi hagati yawo ne Wamisili. Nghalinoza lilenga likahuluma mucanyha ye Wamisili, likawagubiza no kuwakapiza. Nanye mumanyile, kanyhi mwaziwona zizi zono netuma ku Misili. Mukekala mu nyika vilo vinji. 8Hanyuma nghamuletenyi sunga mu yisi ye Waamoli, wono wekalaga ku lubavu lwa kucilima ya Yoludani. Wakamuhomenyi, ninga nghamupelenyi wusume, mukawasuma. Na mu nghango vyono mwacilaga kwinjila, vyo mwajendelelaga kuyisola yisi yawo. Nane nghawongomezeza mu miwoko yenyu. 9Nayo Balaki u mwana wa Zipola, u mutemi wa Mowabu, yakehoma nanye, yakategula nghani kuli Balamu u mwana wa Beyoli ho yaze yamulijitenyi 'nye. 10Ninga 'ne sinamuhuliciza Balamu, Balamu yakamulugutizenyi. Na mu nzila yiyo, nghamuponyenyi mu miwoko ya Balaki. 11Mukalowoka Yoludani, mukafika ku Yeliko. Wanhu wa Yeliko, wakehoma nanye, nha vyono wanoza Waamoli, ne Wapelizi, ne Wakanani, ne Wahiti, ne Wagiligashi, ne Wahivi, ne Wayebusi. Ninga ane nghamupelenyi wusume muli wawa wose. 12Na mu nghango vyono mwacilaga kwinjila, nane nghatuma manyugwi, ho gakawawinga i watemi awalya wejete we Waamoli. Ivitwalo vyenyu vye mimaje, no wupinde wenyu, hamba si mwavitumamila mulimo wo wose.

13“ ‘Nghamupenyi 'nye yisi yono si mwali muyilimile, ne makaya gono simwazenga nyenye. Nalu, mo mwikaye mumo, mukulya zabibu zono si mwazihadika, hamonga ne Mizeyituni yono si mwayihadika.’ 14Ale, Yoshuwa yakajendelela kuwalonjela yakutya, ‘Mumogopaje Muwaha Mulungu, kanyhi mumwitumamilaje kwe cogopo na ko wihuwilwa. Muwusize lukulu milungu yose, yono wayihembaga i walezi wenyu ku Mesopotamiya na ku Misili. Langa mumwitumamilaje Muwaha Mulungu du yali wene. 15Na hono muwe si mukusaka kumwitumamila Muwaha Mulungu, ale muhagule zuwalili, mono momwitumamila. Hamba moyitumamila i milungu yono walezi wenyu wayihembaga ku Mesopotamiya, hamba milungu ye Waamoli wono na mu yisi yawo mo mwikaye. Langa ane na wa mu nyumba yangu, comwitumamila Muwaha Mulungu.’ ”

16Nawo wanhu wakamupitula wakatya, “Ase si colecela lukulu kumwitumamila Muwaha Mulungu, ho ciyitumamile milungu yinji! 17U Muwaha Mulungu, u Mulungu wetu, nha yo yawawusa i walezi wetu na sese mu wuwanda ku Misili, kanyhi cikagawona ne mezino gono yalajila ku Misili. Kanyhi yakacikamisa ko kose kono cakolelaga mu makungugo. 18Na mu nghango vyono cenjilaga mu yisi ayi, u Muwaha Mulungu, nayo vyo yawawingaga Waamoli wono wekalaga mumu. Holeka nase nhavivyo, comwitumamila Muwaha Mulungu, hambi nha yo Mulungu wetu.”

19Yoshuwa yakawalonjela wanhu yakawatya, “Ninga simosuma kumwitumamila Muwaha Mulungu. Hambi mwene nha yo Mulungu mono yelile, kanyhi yo Mulungu wo wivu, holeka sikosuma kumunenelenyi masutya genyu, hamonga no wubi wenyu. 20Hono mumulece no kuhemba milungu mijenzi, nayo kopituka yamulipicizenyi, kanyhi komongomezenyi, hamba yiwe ha mwamulizo yamunozezenyi ziswanu.”

21I wanhu wakamulonjela Yoshuwa wakamutya. “Ng'o ye, ase comwitumamila Muwaha Mulungu du.”

22Yoshuwa yakawatya, “Nyenye nyo weneco, mweza wahomelezi, mukwihomelela nyo weneco, vyono mwahagula kumwitumamila Muwaha Mulungu.”

Nawo wakatya, “Heya cikwihomelela.” 23Nayo Yoshuwa yakawatya, “Ale, lu, wusenyi milungu mijenzi yono yili muli'nye, mumupele cogopo Muwaha Mulungu, u Mulungu we Waisilayeli.”

24Baho i wanhu nawo wakamutya Yoshuwa, “Ase comwitumamila no kumuhulika u Muwaha Mulungu wetu.”

25Hobaho Yoshuwa yakanoza cilagane ne wanhu mwi'zuwa lilyo baho ha Shekemu. Yakawapela malajilizo no wulajilize wavityatye. 26Yoshuwa yakagandika i malajilizo mu citabu co wulajilize co Mulungu. Yakasola ne libwe yiwaha, yakalisimya behi no mubici wo munghola, wono wali wuli behi na hono helile ho Muwaha Mulungu. 27Yakawalonjela wanhu wose yakawatya, “Libwe alino, lyolowa wo wuhomelezi wetu. Lizihulika zose zono Muwaha Mulungu yali kuzilonga kuli'se. Holeka lu, lyolowa wo wuhomelezi hali'nye, ho muze mulece kumukana Mulungu wenyu.” 28Hobaho Yoshuwa yakawakombola wanhu wose, wakatuluka, wakawa kubita munhu na kwakwe mu zi'si zawo.

Lifwa lya Yoshuwa na Eleyezali

29Hobaho zizi zaza kuwa zakondya kwitumwa, Yoshuwa mwana wa Nuni, mwitumami wo Muwaha Mulungu, yakafwa, yali yaficile myaka yigana limonga ne 'kumi. 30Wakamuzika mu yisi yo wuhazi wakwe, ku Timunati Sela mu yisi ye matunda ya Efulayimu, ku lubavu lwa kusumuka ye litunda lya Gayashi.

31Waisilayeli, wali wajendeleye kumwitumamila Muwaha Mulungu vilo vyose vyo wikale wa Yoshuwa, sunga na lono Yoshuwa yali yakondya kufwa, wene wali wajendeleye kwituma nhavivyo sunga na mu vilo, lono wali wakali womi, i wanyamhala, wono waziwona weneco, zose zono Muwaha Mulungu yetuma kuli Waisilayeli.

32Ne mafupa go muwili wa Yusufu, gono Waisilayeli wagaleta ku wulawa ku Misili, wakagazika baho ha Shekemu, i hanhu hono Yakobo yali yahagulile, ku wana wa Hamoli, u sogwe wa Shekemu. Yahagula fweza yigana limonga, baho hakawa wo wuhazi we wana wa Yusufu.

33Nayo Eleyezali u mwana wa Haluni yakafwa, yakazikwa ku Gibeya, mwi'tumbi lya mu yisi ye matunda ya Efulayimu, yono yali yagawilwa u mwanagwe Finehasi.

Currently Selected:

Yoshuwa 24: LLKWW

Highlight

Compare

Copy