Walamuzi 5
5
U lwimbo lwa Debola na Balaka
1Mwi'zuwa lilyo Debola na Balaka u mwana wa Abinowamu, wakalwimba lwimbo aluno wakutya,
2“Muwaha Mulungu yalumbwe!
Vyono Waisilayeli walongolela kwihoma.
Ne wanhu wose wakelavya weneco ko wuhile wawo.
3Muhulicize anye nyo watemi!
Hulicizenyi nanye mo wawaha!
Nokwimba, notowa ne masumbi
kuli Mulungu we Waisilayeli,
u Muwaha Mulungu.
4“Go Muwaha Mulungu lono wagaleka
i matunda ga Seyili.
Wukajendelela sunga wukalawila mu nyika ya Edomu.
Yisi yikacicima, wulanga wukalagaza malenga,
ne mavunde gakatonya malenga.
5Ne matunda gakasinjisika ha mwande yo
Muwaha Mulungu wa Sinayi
yo Muwaha Mulungu wa Isilayeli.
6“Mu vilo vya Shamugali umwana we
cilume wa Anati.
Vilo vya Yayeli.
I mapuga ga wanye mihinzo wakapela kujenda mu zibalabala
Wanya mihinzo, wasembaga mu zi nzila za mu mhelo
7Matumbi ga Isilayeli,
gakekala gasina walongola sunga lono wali weza
kuza agwe Debola, wukawa nha wuli nyina
yawo Waisilayeli
8Lono Waisilayeli wehagulila milungu
yinji mipya.
Ale kukawa no wulugu mu yisi.
Wule muli wanhu we cilume
elufu makumi mane, ho yuli mono yebata
ngula hamba mugoha?
9Mutima wangu wukawa homanga ne
walongola wo wulugu wa muli Waisilayeli.
Hamonga na wono welavya weneco kwe
mitima yawo so wanhu.
Muwaha Mulungu yalumbwe!
10“Lonjenyi zizi anye wose mono
muli mucanyha ye zindogowe zinzelu.
Na anye mono mwikaye mu matandiko maswanu
na nyenye mono mujendaga
mu zi nzila kwa migulu!
11Hulicizenyi! Mazi ge mapuga ge wanhu wono
wapilime masima,
wakulonga zo wusume wo Muwaha Mulungu
wusume we Waisilayeli.
Lulo wanhu wo Mulungu
Wakatima mu milango ye makaya gawo.
12“Winuce! Winuce! 'gwe Debola
Winuce wimbe lwimbo.
Nagwe Balaka mwana wa
Abinowamu, winuce wuwatece awalya
wono wali wakuteka.
13Na awalya wono wali wehuwilwa
wakalawila no kuwatyatya walongola wawo.
Wanhu wo Mulungu wakamuziza
wena ne vilungo so wihome.
14Ku wulawila ku Efulayimu sunga ko
kwi'lolo, wakaza wali mu nyuma yako
i wanhu wo mulango wa Benyamini,
hamonga ne wanhu wayo.
Walongola wo wulugu nawo, wakawa kuza
ku wulawilila Macili,
ne wawaha wakaza ku wulawa ku Zabuloni.
15I walongola wa Isaka
wakaza hamonga na Debola.
Heya yakaza Isaka hamonga na Balaka.
Wakamutyatya sunga mwi'lolo
Langa wo mulango wa Lubeni
wakegawa hamba kumanya hono waze hamba ng'o.
16Alo nhawule wakalekwa ku nyuma
hamonga ne zingholo?
Ho wahulicize wadimi vyono
wacemelezaga matewa?
Heya, wo mulango wa Lubeni
wakegawa, hamba kumanya hono wokuza hamba ng'o.
17Wo mulango wa Gileyadi
wakekala lubavu lwe cilima ya Yoludani,
nawo wo mulango wa Dani, wakekala mu zingalawa.
Wo mulango wa Asheli wakekala mu mwalambalo we lilenga.
18I wanhu wa Zabuloni na Nafutali,
wakesuza wumi wawo ko ku wufwe,
wakekala mu mawimbi go wulugu.
19“Watemi wakaza no kwihoma
ha Tanaki mu mwejelele
we cikolongo ca ha Megido
Watemi wa Kanani wakehoma.
Ninga siwasola fweza yaye.
20Ne zinyelezi nazo zikehoma ku wulanga,
zikehoma na Sisela.
21Mawingo go wulapuce we likolongo
lya Kishoni, gakawakwenghweleza
wulapuce we likolongo lye Kishoni.
Ane nojenda, nojenda mucanyha
nina ne vilungo!
22“Hobaho zifwalasi zikaza,
zikucina, zikacina kwe vilungo
ne mabango gazo.
23Malayika wo Muwaha Mulungu yakatya,
‘Yilijite Melozi.
Walijitwe na wose wono wekaye mumo.
Vyono siwaza ho wamutaze Muwaha Mulungu,
siwaza ha wasilikale wo wulugu
ho wehome so Muwaha Mulungu.’
24“Mono yena wulugutizwe wuwaha
kuciza wacekulu wose yo Yayeli,
u mugolece wa Hebeli u Mukeni.
Yo mucekulu mulugutwe
kuciza wacekulu wose wono
wekaye mu mahema.
25Sisela yalomba malenga
ninga Yayeli yakamupela mele;
yakamuletela mhopota swanu
mu bakuli swanu.
26Yakebata lumambo lwe lihema
mu muwoko wo kucekulu
nawo muwoko wakwe wo kulume
wukebata nyondo,
yakamukomanhila Sisela mu mutwe wakwe
ha wununilo, yakapuguza ho hasi.
27Sisela yakefunamila ha magulu gakwe
yakagwa hasi yakalambalala
ha magulu ga Yayeli.
Yakafunama, yakagwa ha magulu ga Yayeli
yakagwa hasi, hobaho yakawa kufwa.
28“Nyina ya Sisela yakasunjila
mwi'dilisha
yakasunjililila mu lwavu lwa mwi'dilisha
yakalila yakatya,
‘Nhawule lituka lyakwe lyo wulugu
lyacela kuza?
Nhawule ne zindogowe zakwe
nazo nha zacela ku wuwuye?’
29I wagolece zakwe we mahala
wakamupitula wakatya, Heya keyipitula mweneco yali wene.
30‘Kumbe wasilikale wakulondola vinhu
wavitece ho wagawane,
muhinza monga hamba wejete
wamupele musilikale monga.
Myenda ye mawala maswanu wamupele Sisela,
i myenda yo wihambo, ye wahinza
wono watekwa.’
31“Ale wafwe nhavivyo i walugu wako
'gwe Muwaha Mulungu langa wono
wuwendile wang'alale nhe lizuwa lyono
lidulaga hakali mitondo.
Lulo yisi yikawa no mulamu
myaka makumi mane.”
Currently Selected:
Walamuzi 5: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.