Walamuzi 3
3
Makungugo gono gasigala mu yisi
1Hobaho Muwaha Mulungu yakazisigaza nghungugo zinji, ho yawajele Waisilayeli wono si wali wawumanyile wulugu wa ku Kanani. 2Yakanoza nhavivi ho yazilanjize zindelo zose ze Waisilayeli kuli zo wulugu. Ko muno awalya wono wali wakali nehoma hamba kamonga mu wulugu. 3Wono wasigazwa mu'si wali wo awalya wa mu makaya mahano ga Wafilisiti, ne Wakanani wose, Wazidoni ne Wahiti wono wekalaga mu matunda ga Lebanoni ku wulawilila mwi'tunda lya Baali-helemoni sunga mu mwejelele wa Hamati. 4U Muwaha Mulungu yasaka yawetumamile wawo wawajele Waisilayeli ho yamanye, hono mbeka Waisilayeli wakutyatya wulajilize wakwe, nha vyono yawapela walezi wawo mu nzila ya Musa hamba ng'o. 5Baho i Waisilayeli wakekala hamonga ne wa Kanani ne Wahiti, Waamoli ne Wapelizi ne Wahivi ne Wayebusi. 6Waketolanila nawo no kwilunza nawo mu wuhemba milungu yawo.
Otiniyeli
7Wanhu wa Isilayeli wakamusemwa Muwaha Mulungu wawo, waketuma wubi hali Muwaha Mulungu, wakajendelela kuhemba vihwani vya Baali na vyo mulungu we cicekulu Ashela. 8Baho kanyhi Muwaha Mulungu yakawakolelwa likuwo Waisilayeli. Yakawatajila mu miwoko yo mutemi Kushani-lishatayimu wa ku Mesopotamiya nayo yakawasuma na kuwatema myaka munana. 9Hobaho Waisilayeli wakamulilila Muwaha Mulungu, nayo Muwaha Mulungu yakawapela munhu mono kowaponya, litagwa lyakwe Otiniyeli u mwana wa Kenazi u mwanakwawe wa Kalebi. 10Muhe wo Muwaha Mulungu wukamuziza Otiniyeli, nayo yakawa mulongola muli Waisilayeli. Otiniyeli yakabita ku wihomi, u Muwaha Mulungu yakamupela wusume, yakamusuma Kushani-lishatayimu u mutemi wa Mesopotamiya. 11Ne yisi yikekala no mulamu myaka makumi mane, Otiniyeli nayo yakawa kufwa.
Ehudi
12Wanhu wa Isilayeli waketuma wubi kanyhi hali Muwaha Mulungu. Na ku soko yiyo Muwaha Mulungu yakamupela mutemi Egeloni wa ku Mowabu vilungo kuciza Waisilayeli. 13Baho Egeloni yakelunza ne Waamoli ne Waamaleki. Wakawahoma Waisilayeli no kuyisola Yeliko likaya lye mitende minji. 14Waisilayeli wakamwitumamila Egeloni myaka yikumi na munana.
15Baho kanyhi Waisilayeli wakamulilila Muwaha Mulungu nayo yakawapela munhu mono kowaponya, litagwa lyakwe Ehudi u mwana wa Gela mono yetumamilaga muwoko wo kucekulu, mono yalawa mu mulango wa Benyamini. Wanhu wa Isilayeli wakamupela vipegwa vinji Ehudi yamutegulile Egeloni u mutemi wa ku Mowabu. 16Nayo Ehudi yaketyanila mumaje wono wali mukali kose kose wina wutali wa sentimeta kotya makumi mahano. Yakewopa mumaje wuwo mu ciwino, wukaninyinila mu cima cakwe co mugulu wo kulume kusi ye myenda yakwe. 17Hobaho yakasola vipegwa yakawa kumutegulila mutemi Egeloni. Nayo Egeloni yali yo munhu mono yajinile muno muno. 18Lono Ehudi yali yakondya kumupela Egeloni vipegwa, hobaho yakawalonjela i wanhu wono vyabitana wadinghuye vipegwa wawuye ku kaya. 19Ninga mwene Ehudi yali wene du yakawuya ne nyuma behi na Giligali ha mabwe maseswe. Hanyuma yakawa kumubitila mutemi Egeloni yakamutya, “Gwe mutemi, ane nina nghani ya cinyele yono nghusaka nghulonjele.”
Hobaho u mutemi Egeloni, yakawalonjela wetumami wakwe yakawatya “Muwuce wose, mucilece cili wejete.” Hobaho wose wakawa kuwuka. 20Lono mutemi yali yekaye yali wene mu cinyumba cakwe ca kucanyha ku golofa co kwambila lubeho. Ehudi yakamusejelela yakamutya, “Nina nghani yono Mulungu yanhumile nize nghulonjele.” U Mutemi yakenuka. 21Hobaho Ehudi yakenjiza muwoko wakwe wo kucekulu yakawukwega mumaje ku wulawa ku cima cakwe co mugulu wo kulume, yakamuhoma mutemi mu'nda. 22Mumaje wose wukenjila mu'nda hamonga ne cifimbo cayo, wukatoboza sunga ko ku mugongo ne mhama yo mutemi yikafunhuka yikawudindiza mumaje kusi ye 'nda. Ehudi hamba siyawukula mumaje mu'nda yo mutemi. Hambi nha wali wulawiye ko ku mugongo wukomile ho hasi. 23Hobaho Ehudi yakayidinda ne milango yose ne makufuli, yakalawila kunze yakawa kuwuka.
24Wetumami wo mutemi wakaza, lono Ehudi yali yakondya kuwuka wakawona milango yose midindwe wakehwesa vyono, lunji mutemi yali mumo, yali ku coloni. 25Wakamulindiliza du sunga nhondo wakawona ne cevu. Na lono waza wona siyakuza kudigula, wakasola funguwo wakadigula cinyumba cicilya co kwambila lubeho. Baho wakamuwona muwaha wawo yagonile hasi yafwiye.
26Ninga Ehudi yakatoloka lono wene wali wakali walindilize yadigule. Yakakolela kwi 'bwe lililya lye lipango yakatolocela ku Seyila. 27Na lono yali yakondya kufika ku yisi ye matunda ya Efulayimu, yakayitowa ndulele, yakuwacema wanhu wa Isilayeli ho wabite ku wulugu. Yakawa kuwalonjela lono wutenenhuka ga mu matunda. 28Yakatya, “Wose munhyatyaje! Muwaha Mulungu yakondya kumupelenyi wusume kuli walugu wenyu, Wamowabi.” Hobaho wakamutyatya Ehudi no kuyibata yisi mu malowoko gose ga Yoludani, gono wamowabu wasakaga kulowocela. Hakawa hasina hamba monga muli Wamowabi mono yasuma kulowoka. 29Na mwi'zuwa lilyo mu wihomi wuwo, wakawawulaga wasilikale we citung'ati elufu yikumi we Wamowabi. Hasina hamba monga mono yatiga. 30Mwi'zuwa lilyo lyo Waisilayeli wawasumila i Wamowabi. Na ku wulawilila baho, nhondo wakaceha wapolile, hamonga no mulamu, myaka makumi munana.
Shamugali
31Shamugali mwana wa Anati, nayo yali yo mulamuzi mono yatyatya, nayo yakawaponya Waisilayeli, yakawawulaga Wafilisiti magana mutandatu, yawawulaga ne nghome yono yina cisonje, yo kutonjela zing'ombe lono zikulima.
Currently Selected:
Walamuzi 3: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
