Walamuzi 17
17
I vihwani viseswe vya Mika
1Kwali na munhu monga mono yacemwaga Mika, nayo yekalaga mu yisi ye matunda ya Efulayimu. 2Yakamulonjela nyina yakatya, “Fweza zi zilya elufu monga ne ligana limonga zono wahizizwa, nane nghakuhulika nha vyono wakumulijitiza u muhizi mono yahiza, langa ta! Zo azi nina nazo, yo nene mono nazisola.”
Unyina yakamutya, “Gwe mwanangu, u Muwaha Mulungu yalumbwe, kanyhi yakulugute!” 3Mika yakazikombola zifweza zizi kuli nyina, nayo unyina yakatya, “Alu, nane nomusiwanulila fweza zizi u Muwaha Mulungu, ho niwupate wulijitwe wulya kuli mwanangu. Ne zifweza zizo, zitumamilwe mu mulimo wo kunoza cihwani co mubici, cono cowa cihiliwe fweza. Holeka 'lu nokugomolela kanyhi zifweza zizi elufu yikumi ne ligana limonga.” 4Hobaho nayo Mika, yakamukombolela kanyhi nyina fweza zizo. Nayo nyina yakasola fweza magana mejete, yakamupela u munghula wo kunoza vihwani. Nayo munghula yakawa kusesa cihwani ce 'bici, yakawa kucihiliwa fweza. Cikawa kuwikwa mu kaya ya Mika.
5Mika yali yena hanhu hakwe, i hanhu he milungu hono yahembaga. Yakanoza vihwani vinji, yakahona ne Efodi, yakamusiwanula yumonga wa muli wanagwe we cilume, yakawa mukohani wakwe. 6Na mu vilo vivyo kwali kusina mutemi muli Isilayeli, holeka munhu yanozaga nha vyono yendile mweneco.
7Na mu vilo vivyo kwali na muzelelo yunji Mulawi mono yekalaga ha Betelehemu ya Yuda. 8Ninga yakahama ha Betelehemu, ho yabite yakalondole hanhu hanji hono kwikala. Na lono yali yali mu muhinzo, yakafika ha kaya ya Mika, mu yisi ye matunda ya Efulayimu. 9Nayo Mika yakamuwuza yakatya, “Alo 'gwe wukulawa hayi lo?” Nayo yakamupitula yakamutya, “Ane nili Mulawi, nghulawilila ku Betelehemu ya Yuda. Nghulondola hanhu ho kwikala.” 10Mika yakamutya, “Ale wikalaje hono hangu, wuwe munyamhala wangu, kanyhi wuwe mukohani wangu, nane nowa kukupela fweza yikumi kwa mwaka, hamonga ne vivwalo ne zindigwa zako.” 11Muzelelo yuyo Mulawi yakalumba kwikala ha Mika. Nayo Mika yakamunoza yakawa nha mwanagwe wakwe. 12Mika yakamuwika Mulawi yuyo yawe yo mukohani wakwe. Yakajendelela kwikala mu kaya ya Mika. 13Mika yakatya, “Alu vyono nakondya kumutuga mukohani Mulawi, nitumbiye vyono 'lu, u Muwaha Mulungu, konozeza ziswanu nyinji.”
Currently Selected:
Walamuzi 17: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
