Hoseya 9
9
Hoseya yakulonga zo wulipicizwe we Waisilayeli
1Nye nyo Waisilayeli, mulece kusangalalila zi sikukuu zenyu nhe makungugo ganji, mwapituka mwamuleka Mulungu wenyu, mweza si muli wehuwilwa kanyhi kuli Mwene. Hambi nha mweyiguza nyo weneco mu yisi yose kuli mulungu Baali kotya muli wasenyha, mukenda zo wuhemba wono mwehwesa vyono go malipo genyu! 2Ninga mumanye vyono mu vilo vicefu du mowa musina wuhemba wono wukondizye, hamba mafuta ge zeyituni, kanyhi howa hasina hamba divayi bwete. 3Ne Waisilayeli siwokwikala mu'si yo Muwaha Mulungu, langa wowuya ku Misili, nawo wowa kulya ndigwa yono si swanu kuko ku Ashuli. 4Hamba siwomulavizya Muwaha Mulungu vilavywa vye divayi mumo mu zi'si zo wujenzi. Ne zindigwa zawo zolomwavufya munhu wo wose mono kolozilya, kotya nhe ndigwa ye nghunguza yo wumala lifwa. Nayo yokwitumamilwa so wigusha weneco du. Ninga hamba cinji si cokwila kumulavizya Muwaha Mulungu mu Nyumba yakwe yo wuhembelo. 5Ninga cipango cilawa kufika ce sikukuu yo kumulavizya cogopo Muwaha Mulungu, wolonoza nhawule? 6Wuhodanjice kolo wakondya kuza, ne wanhu wakwiyagala, wabite ku Siliya. Ne Wamisili wolowakonghola hamonga wazikwe ku Memufisi! Ne viwutwa vyawo vye fweza, hamonga ne hanhu hono zikaya zawo zali nzenje ha mwamulizo, holocindika mabalwe ne mamivya.
7Ninga cipango co wulipicizwe cakondya kuza, icipango cono wanhu wolozituga zono ziwanojeye. Kolo zizi zikwijela, Isilayeli wolozimanya, nawo wololonga watye, “Muwizi ayu yapuwile! Munhu ayu mono yakutongwa no Mulungu yena lukwale.” Anye nyo wanhu, musulile 'ne ku soko yo winji wo wubi wenyu. 8Ninga Mulungu yanhuma ane nha muwizi, ho niwakaje wanhu wakwe Waisilayeli. Ninga ho hose hono nghubita, anye mukujela kunhega kotya ndeje. Sunga na mu Nyumba yo Mulungu yo wuhembelo, i wanhu wayo, wo walugu wo muwizi. 9Weyihodanga muno ku soko yo wubi wono wetuma lono wali wali ku Gibeya. Ninga Mulungu kowukumbucila wubi wawo, nayo kowalipiciza ku soko yo wubi wawo.
U wubi we Waisilayeli, hamonga ne cambuzi cayo
10Muwaha Mulungu yakutya, “Ha mwamulizo lono namwaganila Isilayeli, yikawa nha mbwene zabibu zono zikuwilucila mu nyika. Na lono nawawonela walezi wawo ha mwamulizo, nali nha mbwene mikalo yo mukuyu, yono yipiliye mu cipango cayo. Ninga wali weza kuza kwi'tunda lya Peyoli, wakawa kwanza kumuhemba Baali. Ninga kanyhi hadodo bwete, wakawa kuyisemuna yiyo milungu yono wali wayendile. 11Nalo lukumyo lwa Isilayeli lologuluka kotya ndeje, na kolowa kusina wana wanji wono wololelwa kuli wene, kolowa kusina wacekulu wono wolodinghula 'nda, hamba wana wono wolodinghulwa 'nda. 12Hamba waze watuje wana, ane nolowawulaga. Sinolomuleka hamba yunji yekale mumi. Na lono niwe nawaleka wanhu awa, mbeka nghani 'mbi yolowagana.” 13Gwe Muwaha Mulungu, nghusuma kuwawona wana wawo vyono wakusepwa no kuwulagwa. 14Alu nghulombe cinhuci cono wuwatendele wanhu wawa? Wanozaje wacekulu zawo wawe wagumba ne matombo gawo galece kulavya mele!
Wuling'anize wo Mulungu kuli Isilayeli
15Muwaha Mulungu yakutya, “Metumo gawo gose mabi, ganziza ku Giligali. Baho nane ho nanziza kuwasula. Na ku soko yo wubi wono wetuma, nane nowawusa mu'si yangu. Hamba sinowenda kanyhi yaye. Hambi nha sunga ne walongola wawo wose, wakondya kumbedegala. 16Waisilayeli wehwana mubici wono wunyalile milela yayo, wono si wukulela mikalo kanyhi. Holeka wowa wasina wana, na hono wawatuje, ane nowawulaga i wana wono wendigwe muno nawo.”
U muwizi yakulonga ze Waisilayeli
17Mulungu mono ane nghumwitumamila, kowalema wanhu wakwe, vyono siwakumuhulika mwene. Nawo wowa wanhu wono wowa kupilima-pilima mu makungugo.
Currently Selected:
Hoseya 9: LLKWW
Highlight
Share
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
