Mwamulizo 49
49
Zinghani ze ndumilizo za Yakobo kuli wanagwe
1Hodu, Yakobo yakawa kuwacema wanagwe wose, yakawatya, “Nye wanangu, ale mwikongholelaje hamonga, hambi nha nghusaka nimulonjelenyi zono zomwaganenyi mu vilo vyono vikuza.
2“Ale, mwikonghole muhulicize,
anye nyo wana wa Yakobo,
muhulicizaje ane no Isilayeli sogo yenyu.
3“Mwanangu Lubeni,
agwe go mulongozi kulelwa,
yo gwegwe go vilungo vyangu,
no mukalo wo wuzelelo wangu,
wina lilumbo hawaha,
wina vilungo kuciza.
4Nha vyono winha wufwaluce we malenga,
nagwe si kosuma kwimilwa,
ninga hamba nhavivyo si kowa wuli muwaha wucizize wose,
hambi agwe nha wagona no muwanda wangu,
wukacitajila wavu, citanda co sogo.
5“Nawo wa Simiyoni na Lawi,
wali ndugu, vitwalo vyawo wovitumamila ko wuwulaji.
6Gwe go nhumbula yangu,
wulece kwinjila mu ciwungu cawo.
Gwe go nhumbula yangu wulece kuhanga mwi'kuga lyawo,
hambi nha wawawulajila wanhu
mu makuwo gawo na mu wuvumbi wawo,
wakazipela zinghongolo vilema, ko kuzidumula matimba gazo.
7Likuwo lyawo lilijitwe,
vyono likwaka muno,
no wukali wawo wulijitwe,
vyono wusina lusungu.
Nane noweyagaza mu yisi yose ya Yakobo,
heya, nowatemanula mu yisi ya Isilayeli.
8“Nagwe Yuda, wanduguzo wokukumya.
Nagwe kolowebata walugu wako mu singo kwe miwoko yako.
Wanduguzo wokwinamila.
9Yuda yenha nyana ya simba yono,
kolo yebata mapelembo gayo,
yiwuyaga mu mhango yayo,
nayo yitambalalaga no kugona hasi.
Nani 'mbi mono kosuma kumugaza?
10Ne nghome ye citemi,
si yowucila lukulu kuli'gwe Yuda.
Ne zindelo zako zotema cibitilila,
sunga kono kolokuziza mweneco.
Yu yulya mono makungugo gose gomuhulika.
11Kayiwopaga ndogowe ha muzabibu muswanu.
Nayo kayikanzaga myenda yakwe kwe divayi,
ne vivwalo vyakwe,
kwe divayi ndunghu kotya sakami.
12Ne meso gakwe madunghu so divayi,
ne meno gakwe mazelu swee so mele.
13“Nayo Zabuloni,
kokwikala ha mwejelele we lilenga.
No mwejelele wakwe,
howa ho ha wuwiko we zingalawa.
Ne yisi yakwe wotemana na Sidoni.
14“Nayo Isakali, yenha ndogowe ye vilungo,
yono yikugona ha mitegulo yayo.
15Nayo kolo yikuwona hono yicehile haswanu,
ne yisi nayo yikwendeza,
hodu, yinamyaga mugongo wayo kuwudinghula mutegulo.
Yiwa kwituma milimo nha muwanda.
16“Dani nayo, kowa mulamuzi we wanhu wakwe,
kotya mbeyu yinji ya Isilayeli.
17Dani, kowa nha nzoka mu nzila,
inzoka yono yina sumu ha mhelo ye nzila,
yono yikuziluma zifwalasi mu vising'anilo,
na mono yekaye mucanyha yayo,
kawa kugwa hasi cinghata.
18“Ane niwulindiye wukombozi wako,
Gwe go Muwaha Mulungu.
19“Ne cipuga ce wahizi, colomutowanga Gadi,
ninga mwene kolowawinjila kutali.
20“Nayo nhwanga ya Asheli, yowa mbaha,
nayo kolavya ndigwa yono yimukwiliye mutemi.
21“Nayo Nafutali, yenha nzimba,
yono yikumangha yiwopoleywe.
Nayo yilelaga wana waswanu.
22“Yusufu, nha mubici wono wukulela,
mubici wono wukulelela ha nhumbi ye mivwilo ye malenga.
Ne manhambi gayo, gatandalaga mwi'jinji.
23Wagumila zisonga, wakamuhoma ko wukali,
wakamugumilila zisonga, no kumugaza muno.
24Ninga hamba nhavivyo,
wupinde wakwe wukali wukamile.
Ne miwoko yakwe,
yikutuga vilungo vyono vikamile,
kwe vilungo vyo Mudaha Vyose wa Yakobo.
25Ale, U Mulungu wo sogo mono kakutazaga,
U Muwaha Mulungu mono kakulugutizaga,
wutuje wumoti wa ku wulanga,
ko wumoti wa mu visolo vyono vili hasi ye'si,
na ko wumoti we zimitugo ne wana.
26No wumoti wo sogo,
Wina vilungo vyono vicizize wumoti wa mu matunda
gono gekalaga, no wuswanu wa mu matunda ge cibitilila.
Wumoti wuwo, wikalaje mu mutwe wa Yusufu,
na mu cihanda co wusu wa mono yatemanulwa ne wanduguze.
27“Nayo Benyamini,
yenha liminzi lyono lina wulaku,
lilizaga mapelembo galyo hakali mitondo,
ku mihe ligawaga ngaluzi.”
28Ayi yo milango yikumi na myejete ya Isilayeli. Nazo zizo zo nghani zono yazilonga sogo yawo lono yawalugutizaga munhu mu nghango yakwe vyono yimunojeye.
Wufwe wa Yakobo no wuzikwe wakwe
29Nayo Isilayeli, yakawalajiliza wanagwe yakawatya, “Nye wanangu, alu ane neza nili behi no kufwa. Nane kolo nafwiza, nhondo mubite mukanzice hamonga ne wasogo zangu, mu mhango yono yili mu mugunda wa Efuloni, ayulya Muhiti, 30akulya ku Makupela, ku lubavu lwa kucilima ye Mamule mu yisi ya Kanani. Mhango yiyo, hamonga no mugunda wuwo, Abulahamu yavigula kuli Efuloni, Muhiti, hawe hanhu ha wuziko. 31Na kuko ko wamuzika Abulahamu, hamonga na Sala mugolece wakwe, kuko ko wamuzika Isaka na Labeka mugolece wakwe, na ko kuko du ko wamuzika na Leya. 32U mugunda wuwo, hamonga ne mhango yayo, vyagulwa kuli Wahiti.” 33Nayo Yakobo yali yeza kukondya kuwalajiliza wanagwe, yakayigomola migulu yakwe kanyhi mu citanda, yakehela wehele we ndumilizo, hodu yakawa kufwa.
Currently Selected:
Mwamulizo 49: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
