Mwamulizo 43

Wawahaze wa Yusufu wakubita na Benyamini ku Misili

1Ne nzala nayo yikacila muno kuwa mbaha mu yisi ya Kanani. 2Nazo zindigwa zono wahemela ku Misili, zali zeza kumalika. Yakobo yakawalonjela wanagwe yakawatya, “Nye wanangu, ale mubite kanyhi ku Misili mukacihemelele zindigwa ndodo.” 3Ninga Yuda yakamupitula sogwe yakatya, “Gwe baba, ninga munhu yu yulya yacikong'onheza muno muno yakatya, ‘Hono mulece kumuleta na Benyamini mwanakwawenyu mudodo, ale, si mombonela lukulu.’ 4Holeka ase cosuma kubita cikakuhemelele zindigwa, hono wumukombole mwanakwawetu Benyamini cibite nayo. 5Ninga hono wumulemeze, ale nase hamba si cosuma kubita, hambi munhu yu yulya nha yacilonjela calinze yakatya, ‘Hono mulece kuzana na Benyamini u mwanakwawenyu mudodo, ale si mombonela lukulu.’ ”

6Nayo Isilayeli yakatya, “Ka! Wanangu, alu nhawulenyi nye mukamulonjela munhu yuyo vyono mwina mwanakwawenyu yunji mudodo, alu'ne nha mwanhajila mu magayo no muyenyu?” 7Nawo wakamupitula sogo yawo wakatya, “Gwe baba, u munhu yuyo, yaciwuza wuza muno muli zetu hamonga na ze mhuga yetu. Yaciwuza yakatya, ‘Wulenyi, sogo yenyu yakali cawumi? Wulenyi hoyuli manakwawenyu yunji?’ Hodu nase cikawa kumupitula nha vyono yaciwuzaga mweneco. Alu baba, ase cali cimanye wule vyono kocilonjela yatye, ‘Mumuletaje na Benyamini u mwanakwawenyu mudodo?’ ” 8Hodu Yuda yakawa kumulonjela sogwe Isilayeli yakatya, “Baba, nghombolaje nene mbite nayo, cilekaje cituluce kamonga cibite cikahemele zindigwa, ho cilece kufwa ne nzala, gwegwe hamonga ne wana wetu. 9Nene no mweneco nomulanjilila. Agwe wunangaje nene du. Hono ndece kumugomola wumuwone ne meso gako gwegwe mweneco, ale lisutya lyeze lyangu nene cibitilila. 10Sunga na lulu hono cali cilece kucela, mhali baha cakondya kubita no kuwuya kali kejete.”

11Nayo Isilayeli sogo yawo yakawalonjela yakatya, “Alu hono yiwe nhavivyo vyo yawa yinha, ale munoze nhavi: Musole mikalo miswanu mutajile mu viya vyenyu, mumutegulile cipegwa muwaha yuyo. Mumutegulilaje hamonga ne mafuta madodo ge mhunjile swanu, hamonga no wuci wudodo, no wuvumba, ne manemane, hamonga na jozi na lozi. 12Musoleleze hamonga ne zipesa ziwe kali kejete kuciza zono zosakwa, vyono munojeye muzigomole zipesa azilya zono zali zili mu milomo ye zimhinda zenyu, na lunji kowa si zali zinojeye muwuye nazo. 13Ale, mumusolaje na Benyamini u mwanakwawenyu mubitane nayo sunga ko kuli munhu yuyo. 14Muwaha Mulungu komuwonelenyi lusungu hali munhu yuyo, ho yamuwopolelenyi no kumulecelenyi muyenyu Simiyoni hamonga na Benyamini. Ane lu ku lubavu lwangu, hono yinojeye wanangu wajilile, ale hodu du lece wajilile!”

15Ale, wakawa kuvisola vipegwa wakasola zipesa nyinji kali kejete si nha zinongozi, wakawa kubita ku Misili hamonga na Benyamini u mwanakwawawo. Nawo wali weza kufika ku Misili, wakabita sunga kuli Yusufu, wakawa kwima ha mwande yakwe. 16Nayo Yusufu yali yeza kumuwona Benyamini yali hamonga nawo, hodu yakawa kumulonjela mulindilizi we nyumba yakwe, yakatya, “Ale, wategulaje wanhu awano ku kaya, wusole mutugo wuwuwulaje no kuwikaniza ndigwa, hambi izuwali nha colizana nawo zindigwa ze misi.” 17Nayo mulindilizi yuyo, yakanoza nha vyono yalajilizwa, yakawa kuwategula wajenzi wawo ku kaya kwa Yusufu. 18Nawo wali weza kuwona vyono wakutegulwa ku kaya kwa Yusufu, hodu woga wukawebata muno muno, wakawa kwanza kulongana weneco wose wakutya, “Alu mwene nye, wacileta kukuno ku soko ye zipesa zizilya zono cikagomolelwa lululya lono caziza muhinzo mulongozi lo, ho yatuje cikojelwa co kucihungucila no kuciboka zindogowe zetu, yacinoze ciwe wetumami wakwe.” 19Holeka wakawa kumubitila yu yulya mulindilizi we nyumba ya Yusufu, wakamulonjela lono yali yemile ha mulango, 20wakatya, “Cikulomba wucinenelaje muwaha, ase yo sese mono ha lulongozi cikaza kuhemela ndigwa bahano. 21Na lono cawuyaga kwetu, cali ceza kufika hanhu ho kugona wajenzi mu nzila, cikawa kuziwopola zimhinda zetu, nase cikezina muno, cali ceza kuwona zipesa zetu, mu milomo ye zimhinda zetu wose, hamba kupamizwa bwete. Alu cazigomola zipesa zizo. 22Hamba si cimanyile nani mono yaciwicila kanyhi zipesa zizo mu zimhinda zetu. Ninga aluno cileteleza ne zipesa zinji kanyhi zo kuhemela zindigwa.”

23Nayo mulindilizi yu yulya yakawapitula yakatya, “Nye wayangu, mulece kwihwelela hamba kuwa no woga. Mulungu wenyu, u Mulungu wo sogo yenyu, yo yuyo mono yamugomolelenyi zipesa zizo mu zimhinda zenyu. Ninga ane nha nazibocela zipesa zangu.” Hanyuma yakawa kumuleta muyawo Simiyoni hali wene. 24Nayo u mulindilizi yuyo, yakawa kuwenjiza mu kaya ya Yusufu, yakawapela malenga ho wezuguze migulu yawo, yakawa kuzilisa ne zindogowe zawo. 25Nawo wakawa kuviwikaniza vipegwa vyawo ho wamupele Yusufu, hambi nha wali wakondya kuhulika vyono wolizana nayo. 26Nayo Yusufu yali yeza kuwuya ha kaya, wene wakamuletela vipegwa vyono wali wena navyo, wakamwinamila. 27Nayo Yusufu yali yeza kukondya kuwatambuza, ale, yakawa kuwawuza yakatya, “Nghumbuciye vyono mwanonjela zo sogo yenyu, Alu wulenyi, muswanu? Wulenyi yakali cawumi?” 28Nawo wakamupitula wakamutya, “Mwitumami wako sogo yetu, yali baho muswanu du, yakali cawumi.” Hanyuma wakawa kumwinamila so cogopo. 29Nayo Yusufu yelanje nhavi, yakawa kumuwona mwanakwawe Benyamini, u mwana wo nyina, hodu yakawa kutya, “Nitumbiye vyono ayuno yo Benyamini u mwanakwawenyu mudodo mono mwanonjela. Ale du Mulungu yakumotye mwanangu!” 30Hodu Yusufu yakawa kuwuka musunho hanhu baho, hambi mahozi nha galengalengaga mu meso gakwe ku soko ye cisukwa co mwanakwawe Benyamini. Yakawa kwinjila mu cumba cakwe yakalila muno. 31Nayo yali yeza kukondya kwizuguza ha meso, hodu yakawa kulawila akuno yakwikamiliza, yakalajiliza zindigwa zitengwe. 32Wakamutenjela Yusufu ndigwa yakwe du yali wene, wawahaze nawo wakatenjelwa ndigwa yawo nawo wali wene, kanyhi sunga ne Wamisili wono vyalizanaga nayo nhondo zose, nawo nhavivyo, wakatenjelwa ndigwa yawo nawo wali wene, hambi nha iwifyo kuli Wamisili kulizana ndigwa hamonga ne Wahebelaniya. 33Nawo wawahaze wa Yusufu wakekala ha mwande ya Yusufu nha vyono wali wetyatizye mu ndelwa yawo, kwamuliziza u mulongozi kulelwa, sunga wo mudumo, nawo wakawa welanjile ko wizine wuwaha. 34Ne ndigwa yasolwaga ha meza yono yali yekaye Yusufu, ho wawa kuwategulila wene. Ninga Benyamini yakagawilwa ndigwa yono yali yicizize nghanghulo yihano ye nghango yono wapegwa i wawahaze. Ale du, wakang'wa no kusangalalana nayo.

Currently Selected:

Mwamulizo 43: LLKWW

Highlight

Compare

Copy