Mwamulizo 36

Zindelo za Esawu

(1Zin 1:34-37)

1Azi zo ndelo za Esawu, nha cinji yo Edomu. 2Esawu yatola wacekulu we Cikanani, Ada mwana we cicekulu wa Eloni Muhiti, na Oholibama mwana we cicekulu wa Ana, u mwizukulu wa Sibeyoni Muhivi, 3na Basemati mwana we cicekulu wa Ishumayeli, u lumbulye wa Nebayoti. 4Ada yakamulelela Esawu mwana litagwa Elifazi, nayo Basemati yakamulelela mwana litagwa Lewuyeli. 5Nayo Oholibama yakamulelela Yewushi, Yalamu na Kola. Wawa wo wana wa Esawu wono wagolece zakwe wamulelela lono yekalaga mu yisi ya Kanani.

6Hanyuma Esawu yakawa kuwasola i wagolece zakwe, hamonga ne wanagwe, ne wanhu wose wa mukaya yakwe, ne zing'ombe zakwe, ne zimitugo zakwe zose, hamonga ne sawo yakwe yose yono yayisawila mu yisi yiyo ya Kanani. Yakawa kuhamila hanhu hanji, kutali no mwanakwawe Yakobo. 7Esawu yanoza nhavivyo, vyono sawo zawo zali nyinji muno, mu nghango yono wali si wasume kwikalana hamonga. Yisi yono wekalaga nha wajenzi, si yali yiwakwile ku soko yo winji we mitugo zawo. 8Holeka Esawu yakabita kwikala mu yisi ye matunda ga Seyili. Litagwa linji lya Esawu, yo Edomu. 9Awa wono wetyatizye, zo ndelo za Esawu u sogo ye Waedomu, mu yisi ye matunda ga Seyili. 10Nawo wana wa Esawu wali wo awano, Elifazi mono yalelwa na Ada mugolece wakwe, na Lewuyeli mono yalelwa na Basemati u mugolece yunji wa Esawu. 11Nawo wana wa Elifazi, wali wa Temani, Omali, Sefo, Gatamu na Kenazi. 12Nayo Elifazi yali yena mujitulwa, litagwa lyakwe yali Timuna. Yuyu Timuna yakamulelela Elifazi mwana litagwa lyakwe Amaleki. 13Na Basemati mugolece wa Esawu, yakamulela Lewuyeli. Nawo wana wa Lewuyeli wali Nahati, Zela, Shama na Miza.

14Nayo Oholibama mwana we cicekulu wa Ana, mwizukulu wa Sibeyoni, yamulelela Esawu mulume wakwe, wana wadatu, nawo wowa, Yewushi, Yalamu na Kola. 15Awa nawo wono wetyatizye ahano, wo walongola we zimbeyu zono zilawiliye muli Esawu. Yo Elifazi mono yali mulelwa mulongozi kuli Esawu, yuyo yakawalela wa Temani, Omali, Sefo na Kenazi. 16Kola, Gatamu na Amaleki na wose wakawa walongola, munhu na lwakwe mu mbeyu yakwe. Na wawo wose wo wana wa Elifazi mu yisi ya Edomu, wono walawilila muli Ada mugolece wa Esawu. 17Nayo Lewuyeli mwana wa Esawu, yakawalela Nahati, Zela, Shama na Miza. Nawo wose wakawa walongola munhu na lwakwe mu mbeyu yakwe. Na wawo wose wo wana wa Lewuyeli mu yisi ya Edomu, wono walawilila muli Basemati u mugolece wa Esawu.

18Ne wana wa Oholibama u mugolece wa Esawu, wali wo awano, Yewushi, Yalamu na Kola, nawo wose wakawa walongola, munhu na lwakwe mu mbeyu yakwe. Na wawo wose wo wana wa Oholibama mwana we cicekulu wa Ana mugolece wa Esawu. 19Ale, wawano zo ndelo za Esawu, nha cinji yo Edomu, nawo wose wakawa walongola munhu na lwakwe mu mbeyu yakwe.

Zindelo za Seyili

(1Zin 1:38-42)

20Awano zo ndelo za Seyili Muholi, nawo wawa wo wanyawusi we yisi yiyo, Lotani, Shobali, Sibeyoni, Ana, 21Dishoni, Eseli, na Dishani, nawo wose wakawa walongola, munhu na lwakwe mu mbeyu yakwe, muli Waholi wo lulelo lwa Seyili mu yisi ya Edomu.

22I wana wa Lotani, wali, Holi na Hemani, no lumbulye wa Lotani yakacemwa Timuna.

23Nawo i wana wa Shobali, wali Alwani, Manahati, Ebali, Shefo na Onamu.

24Ne wana wa Sibeyoni, wali, Ayiya, na Ana. Nayo yuyuno Ana yo yayiwona i mimvwilo ye malenga ge moto mu nyika, lono yazidimaga zindogowe zo sogwe Sibeyoni.

25Wana wa Ana nawo wali Dishoni hamonga no mwana we cicekulu monga, litagwa lyakwe Oholibama.

26Nawo wana wa Dishoni, wali, Hembani, Eshibani, Ifilani, na Kelani.

27Wana wa Eseli wali, Bilihani, Zayawani na Akani.

28I wana wa Dishani nawo wali, Usi na Alani.

29Ale, wawo wo walongola we Waholi, Lotani, Shobali, Sibeyoni, Ana, 30Dishoni, Eseli na Dishani. Na wawano wose wakawa walongola, munhu na lwakwe mu mbeyu yakwe mu yisi ya Seyili.

Watemi we yisi ya Edomu

(1Zin 1:43-54)

31Awa nawo, wo watemi wono wali wayitemile yisi ya Edomu, lono hali hakali si hanawa na mutemi wo wose mono yali yawatemile Waisilayeli.

32Bela u mwana wa Beyoli, yali yatemile yisi ya Edomu, no wikalo wakwe wuwaha wali mwi'kaya lya Dinihaba. 33Nayo Bela yali yeza kufwa, Yobabu mwana wa Zela, mulawilila Bosila, yakahalila wutemi wakwe. 34Yobabu nayo yali yeza kufwa, Hushamu we yisi ye Watemani, yakahalila wutemi. 35Hushamu nayo yali yeza kufwa, Hadadi mwana wa Bedadi yakahalila wutemi, no wikalo wakwe wuwaha wali ku Awiti. Yuyu yo yawahoma no kuwasumiza Wamidiyani mu yisi ya Mowabu. 36Nayo Hadadi yali yeza kufwa, Samula mulawa ku Masileka, yakahalila wutemi. 37Samula nayo yali yeza kufwa, Shawuli mulawa ku Lehoboti, mbavu ze likolongo lya Efulata, yakahalila wutemi. 38Shawuli yali yeza kufwa, Baali-hanani, mwana wa Akiboli, yakahalila wutemi. 39Nayo Baali-hanani, mwana wa Akiboli yali yeza kufwa, Hadali yakahalila wutemi, no wikalo wakwe wuwaha, wukawa ku Pawu. Mugolece wa Akiboli, yacemwaga Mehetabeli mwana we cicekulu wa Matiledi u mwizukulu wa Mezahabu.

40Nawo i walongola we zimbeyu zono zalawilila muli Esawu, mu nghango ye zimbeyu zawo ne hanhu hawo, wo awano, Timuna, Alwa, Yeteti, 41Oholibama, Ela, Pinoni, 42Kenazi, Temani, Mibisali, 43Magidiyeli na Ilamu. Wawo wo walongola wono walawa mu mbeyu ya Edomu, wo wutya Esawu. Nawo matagwa gawo, matambulwe mu wulawa hanhu hawo, mu zi'si zono wali wazitemile.

Currently Selected:

Mwamulizo 36: LLKWW

Highlight

Compare

Copy