Mwamulizo 29

Yakobo yakufika ku kaya ya Labani

1Hodu, Yakobo yakawa kujendelela no muhinzo wakwe, sunga yakawa kufika mu yisi ye wanhu wa kucilima. 2Ale kuko, yakawona lisima, ne matewa madatu ge zingholo gali gagonile baho. I zingholo zizo zang'wezaga malenga ge lisima lilyo lyono lyagubicizwaga ne'bwe yiwaha muno. 3Nayo yali yili nhavi, Matewa gose lono getang'anilaga baho so wung'wa malenga, na vyono libwe lilyo lyali yiwaha muno, wadimi wetazaga wose hamonga kuliwusa libwe lilyo, ku wulawa mwi'sima, na kolo wakondya kuzing'wesa zimitugo zawo, wakuligubiciza kanyhi libwe lilyo mwi'sima.

4Ale baho, Yakobo yakawa kuwawuza i wadimi yakawatya, “Nye wandugu zangu, alu mukulawilila hayi behi?” Nawo wakamupitula wakatya, “Ase wayiko, cikulawilila ku Halani.” 5Yakawawuza kanyhi yakutya, “Wulenyi, kowa mumumanyile munhu yunji yakucemwa Labani, mwana wa Naholi?” Nawo wakamutya, “Yuyo Labani, heya cimumanyile.” 6Nayo yakawa kuwatambuza yakawatya, “Wulenyi, muswanu?” Nawo wakatya, “Heya, mwene muswanu du, hasina hamba linji. Sunga no mwanagwe Laheli nayo, ayulya akulya yakuza yena ne zingholo zakwe!” 7Nayo Yakobo yakawatya, “Ane nghuwona lizuwa likali misi muno, na simosuma kuzigomola zingholo ku kaya mu madaha gagano. Holeka muzing'wesaje malenga, na hanyuma muzilece zijendelele kudima du. Magu! Wulenyi, mukuwona wule?” 8Ninga wene wakamupitula wakatya, “Alu ase vyono cizoweye, sicosuma kunoza nhavivyo, langa sunga matewa gose gawe gakondya kwikongholela hamonga bahano, ne libwe liwe lyakondya kuwuswa mu mulomo we lisima, baho langa, ho ciwa kuzing'wesa zingholo.”

9Nayo Yakobo lono yali yakali vikulongana na wawo wadimi, Laheli nayo yakawa kuficilila hamonga ne zingholo zo sogwe Labani, hambi u mwene nha yali yo mudimi wazo. 10Kukawa Yakobo yali yeza muwona Laheli mwana wa Labani u lumbulye wo nyina, yena ne zingholo za Labani u lumbulye wo nyina. Hodu yakawa kubita kulibidusa libwe mu mulomo we lisima, yakawa kuling'wesa litewa lya Labani u lumbulye wo nyina. 11Yakobo yakawa kumunonela Laheli akuno yakulila so nyemo. 12Hanyuma Yakobo yakawa kumumanyiza Laheli vyono wene Yakobo na Laheli wali ndugu, na vyono mwene Yakobo, yaleligwe na Labeka lumbulye wo sogwe Labani. Nayo Laheli yakawa kuwuya ku kaya mbela mbela no kumuloloseza u sogwe zizo zose. 13Nayo Labani yali yeza kuzihulika za Yakobo u mwana wa Labeka u lumbulye, hodu yakawa kutuluka lumangho kumuhinjiliza, yakamukumbatila, yakamunonela muno, yakawa kumuleta ko ku kaya kwakwe. Nayo Yakobo yakamuloloseza zinghani zizi zose zono zali zejela. 14Nayo Labani yakawa kumutya, “Mbeka, agwe wuli 'fupa lyangu ne sakami yangu!” Nayo Yakobo vikekalana na Labani u lumbulye wo nyina yipango lya mwezi monga.

Yakobo yakumwitumamila Labani so kumutola Laheli na Leya

15Hodu, Labani yakamulonjela Yakobo yakatya, “Gwe Yakobo, ane nghuwona si yowa viswanu wunyitumamile bwete, ati vyono wuli mwihwa wangu! Holeka nghukunena wunonjele, kosaka nghulipe cici?” 16Ale, Labani yali yena wahinza wejete, u muwaha yacemwaga Leya, no mudodo nayo yacemwaga Laheli. 17Ninga Leya, yali yena meso macefu, langa Laheli yali muswanu muno ku wulangwe kanyhi yendezaga muno muno. 18Nayo Yakobo yakamwenda muno Laheli, holeka yakamupitula Labani yakamutya, “Ane nokwitumamila myaka mupunghati, ho wunhoze Laheli mwanago mudodo.” 19Labani nayo yakamutya, “Heya, na mbeka yowa yili ciba hono nghutoze gwegwe Laheli, si nha kumutoza kuli munhu yunji wo wose. Holeka, ale du wujendelele kwikalana nane.” 20Yakobo yakajendelela kumwitumamila Labani myaka mupunghati, ku soko yo kusaka kumutola Laheli. Ninga i myaka yiyo mupunghati vikawa nha vilo vicefu du kuli mwene Yakobo, vyono yali yamwendile muno Laheli.

21Ale, Yakobo yakawa kumulonjela Labani, yakamutya, “Gwe bulayi, i vilo vyangu vyakwilanicila, holeka lu, nghukunena wumhele mugolece wangu.” 22Hodu, Labani yakawa kunoza ndigwa nyinji zo wutole, yakawalalika wanhu wose wa kuko. 23Ninga caza kwinala, Labani yakamusola u mwanagwe Leya yo yakawa kumutegulila Yakobo. Nayo Yakobo yakawa kumutola yuyo Leya. 24Labani yakawa kumusola Zilipa u mwitumami wakwe, yakamupela Leya, ho yawe mwitumami wakwe wa mu kaya. 25Wali weza kwela hakali mitondo, Yakobo nhondo, ho yakawa kumanya nha vyono ayu kumbe Leya hamba si Laheli yaye! Ale, yakawa kumuwuza Labani yakatya, “Alu bulayi, ho kunhendela nghanici yiyi? Alu ane si kotya nali kukwitumamila ku soko ya Laheli? Alu nhawule kunghonga nhavivi?” 26Labani yakamupitula yakamutya, “Alu ase, mwanangu mu yisi yetu, sicinozaga nhavivyo, wo si moto wetu kwamula kumutoza u mwana mudodo, lono u muwahawe yakali si natolwa. 27Holeka alu wamule wumufisilizizaje yuyo Leya i vilo vyakwe vyo mupunghati, nase ho cokutoza Laheli, ninga du langa hono wuvumile vyono, kunyitumamila kanyhi myaka yinji mupunghati.” 28Nayo Yakobo hodu yakawa kuvumila. Nayo Yakobo yali yeza kukondya kumufisiliziza Leya i vilo vyakwe vyo mupunghati, Labani ho yakawa kumutoza kanyhi Yakobo u mwanagwe mudodo Laheli. 29Nayo Labani yakamusola Biliha u mwitumami wakwe, yakawa kumupela Laheli, ho yawe mwitumami wakwe wa mu kaya. 30Hodu Yakobo yakawa kumutola na Laheli nhavivilya. Ninga hamba nhavivyo, Yakobo yakamwenda muno muno Laheli si nha Leya. Ale du, yakajendelela kumwitumamila Labani myaka yinji kanyhi mupunghati.

I wana wa Yakobo

31Nayo Muwaha Mulungu yali yeza kuwona vyono Yakobo si yamwendile Leya, Mulungu yakawa kumupela Leya, wana. Ninga Laheli si yatuga wana. 32Leya yakadinghula 'nda, yakasawa mwana wa cilume, yakamucemela litagwa lya Lubeni, yakutya, “U Muwaha Mulungu kawuwona u wugaye wangu, alu nitumbiye vyono mulume wangu konyenda.” 33Leya yakadinghula kanyhi 'nda, yakasawa kanyhi mwana wa cilume, yakamucemela litagwa lya Simiyoni, yakutya, “U Muwaha Mulungu kamhela mwana yunji kanyhi wa cilume, hambi nha kahulika vyono ane suligwe.” 34Yakadinghula 'nda kanyhi, yakasawa kanyhi mwana yunji wa cilume, yuyo nayo yakamucemela litagwa lya Lawi, yakutya, “Alu nhondo cokwilunza no mulume wangu, vyono luno nakondya kumulelela wana wadatu wose wa cilume.” 35Leya yakadinghula kanyhi 'nda, yakasawa kanyhi mwana wa cilume, yakamucemela litagwa Yuda, yakutya, “Alu nhondo nomukumya u Muwaha Mulungu.” Nhondo Leya ho yakawa kuduma kuwudinghula mida.

Currently Selected:

Mwamulizo 29: LLKWW

Highlight

Copy